Na Pappalán Metulyat so Sasan-Mestruwera
4
Maski nu kunna sinay, mabaggaweno sinapit ino Espiritu i Dios a sito uddi a tiyempuwera e talekkuran ino korwan a tolayera ino angngurugga. Makimorayerana so espirituwera a massalasiri anna tuntulandaneno tunturuwera na demonyuwera. 2 Iyawera a garannud a tunturuwera e naggabwat so mappesimpat ira anna masiriyera. Mabannaddin ino konsensiyara a manilla nadaral si mapatu a baliyang. 3 Iyallanggeno aggatawa anneno korwan a garannud a maakkan ira. Udde pinaratu i Dios inoyera a maakkan si appabala-balat na minangikkurug ira a mangammu si kagakkuruwan. 4 Se amminan a pinaratu i Dios e mapiya anna awan a maammayan nu naarasaw si appabala-balat. 5 Se yo maakkan e kaangga-anggam megafu so neturak a sapit i Dios anna megafu si dasal.Na Mapiya a Gumasserbi i Jesu Kristo
6 Megafu si pangitukkal sitawera a kiya-kiyan so wawwayim si angngurug, mattabalikana si mapiya a gumasserbi i Kristo Jesus. Sikwam a akwannu iyawera, ibali-balinnuna a mattuyag si angngurugngu anneno gakkurug a tunturuwera a tinuntulnu. 7 Ammem sayangan ino tiyempum si awan serbina a yayam ira na aggidiyafuwantam ira. Udde tunturuwannuweno baggim ingkepay a manolay meantu so uray i Dios. 8 Ana pammakapiyan si pappatuyag si baggi udde yo pakkumanan a manolay meantu so uray i Dios e mas makapammakapiya si amminan a kiya-kiyan. Gumafu se ana tambana iyaw bakkan lamang sitoye a akkatolay udde maski so akkatolay akkabalinna patay. 9 Gakkurug iyaw e maawag a kuruwan ino amminan a tolayera. 10 Antuweyaw yo gafuna nu saay a mappakel anna mappursigi etam gumafu se ana inanamatam so aggatolay a Dios antu yo Mannabbut si amminan a tolayera metalwaring so minangikkurug ira.
11 Idundunnu anna itunturum iyawera a kiya-kiyan. 12 Ammem ipabulun a arariyan daka gumafu si kinaabbingngu, udde mappangngarigangka so minangikkurug ira so assapitannu, si akkatolem, si idduk, si angngurug anna si malinis a akkatolay. 13 Makiyad si dumatangak, ibali-balinnu a bibbiran ino neturak a sapit i Dios so allangan na tolayera, patuyaggannuweno nakamda anna tunturuwannuwera. 14 Ammem purayan a usan nu nenay a neyaddeno Espiritu i Dios sikwam megafu si labbun sin nepotun ino affuyug na afu-afuwera na minangikkurug ira yo kamatdera sikwam. 15 Ibali-balinnu a akwan iyawera, mangikakwaka ingkepay sikwara takesi amminan a tolayera e maitarana nu kasannam a palabwakan ino akkatolem a tata a Kristiyanu. 16 Imurannuweno aggalangwam anneno annunturum. Ibali-balinnu a manolay anna manunturuka si fustu. Antu tabbutannakana i Dios anneno gumaddingngagnguwera si pannunutna.