Kagagangayan ira na Afu-afuwera na Minangikkurug ira
3
Gakkurug yo kasapitan a seanya yo manggam a mattabali si afu-afu na minangikkurug ira e manggam si melawa a aggangwa. 2 Kunnantu, yo afu-afu na minangikkurug ira e awan nad pakaliwatanna, namitta lamang a natawa, ana nad a pangigaggad si baggina, nannakam, melawa nad na tolayera, mapappadulot anna makatunturu baggina si mapiya, 3 bakkan a gumàinum, ammena madungit udde masinak, ammena gumakkipakwa anna ammena maagum si pirak. 4 Matabbudna si mapiya yo familyana ingkepay anneno anakngera e makimoray sikwana anna minangilawera. 5 Se nu ammena ammu a ingguran ino familyana, kasannana a tabburan ino minangikkurug ira i Dios a mammu-ammung? 6 Bakkan nad a bawu a minangikkurug baggina se tantaro nu mabbalagasay e makastiguna a kakunna i Satanas. 7 Tata kepay, maawag ana mapiya a testimonyana so aggiteno amme mangikkurug ira takesi ammena a maarariyan anna ammena baggina a masilu i diyablu.Kagagangayan ira na Taga-duffun ira na Afu-afuwera na Minangikkurug ira
8 Kunnapay so taga-duffun ira na afu-afu na minangikkurug ira, melawera nad na tolayera, massapit si gakkurug, ammera a gumàinum anna maagum si pirak. 9 Maawag a ibali-balinda a mangurug so mensahe a nepakaammuna i Dios sikwatam a ana malinis a konsensiya. 10 Anna maawag a mapureban ira abbu udde nu nepruwebara ingkepay a awan pakaliwatanda, makaserbiyera a taga-duffun ira na afu-afuwera. 11 Si kakunna keppay, yo bafabbayeraa e melawera nad na tolayera, ammera nad manandaral si kasittolera, ana nad pangigaggad si baggira, anna matalakkan ira nad si amminan a akwanda. 12 Para so taga-duffun ira na afu-afuwera, tata nad lamang yo atawara anna ingguranda nad yo anakdera anna katabbalera si mapiya. 13 Nu masserbiyera si mapiya, melawera na tolayera anna matuyag yo nakamda a massapit meafu si angngurugga sike Kristo Jesus.
Na Kagakkuruwan ira na Angngurugtam
14 Innanamangku a makkainnita eta si malan a tiyempu, udde iturakku iyaw sikwam takesi 15 nu matalantanak, maammuwannu nu kasanna a manolay yo tolayera so katabbalay i Dios a antu yo assimban na aggatolay a Dios. Baggira yo arì anna fundasyon na kagakkuruwan. 16 Awan pabbabang yo kadayawan na kagakkuruwan antu yo netunturu a nepakaammuna i Dios sikwatam.
Nappadda baggina a tata a tolay,
Tinaddan ino Espiritu i Dios a fustu baggina anna naiteno anghel ira.
Nebalaggaw si amminan a bakkan a Hudyuwera,
kinurug na tolayera si interu a talubaggan,
anna netullu si langit a kadayawanna.