Pannunturuwera meafu si Dasal
2
Kunnantu, si mas kaawan si amminan, ilelawitku a idutung diyaw sike Dios ino arangngan diyawera, dasal diyawera, pakigumallak diyawera anna appabala-balat para si amminan a tolayera. 2 Idasallan diyaw pay yo gumattangngala ira anneno amminan a ana pakandamara so tarabbunan takesi manolay etam si masinak anna maimammak a akkatolay meantu so uray i Dios anna mangwa si fustu anna mepangngat so allangan na korwan a tolayera. 3 Fustu iyaw anna kaangga-anggam si aggita i Dios a Mannabbuttam 4 a kanggamma a matabbut amminan a tolayera anna maammuwandeno kagakkuruwan. 5 Seana lamang tata a Dios anna
ana tata pay a tolay a mangipadafung sike Dios anna so tolayera.
Iyan a tolay e i Kristo Jesus ingkepay.
6 Natay baggina a pannubbut tapenu amminan a tolayera e ammeranna makastigu so liwa-liwatda.
Iyaw a kagakkuruwan e prinuweba i Dios so fustu a tiyempu. 7 Gumafu sitaw e nadutukanak a tata apostol a mangitundu so tolayera iyan a mensahe. (Itundu-tunduk ino kagakkuruwan. Ammek a massalasiri.) Nadutukanak a manunturu so bakkan a Hudyuwera a mangurug anna maintindiyan ino kagakkuruwan.
8 Kunnantu, kanggammangku a si kada lugar a paddarafungan ino lallakiyera a minangikkurug ira a maddayaw, sikwara a maddasal a iyuttu-uttundeno kamatdera e mangikakwera nad sike Dios. Awan nad a allang sikwara anna ammera nad a mappaparakwa si kasittolera.
9 Kunnapay so bafabbayera e maawag a mainggud anna disente si pabbarasira anna pinggud si būkda. Ammera maawag a magarbu si pabbarasi anna pangiyusa si mangingina a alahas a bulawan onnu perlas. 10 Imbes, kaangga-anggam ira nad so mapiya a akakwanda. Mas mepangngat iyan para si bafabbayera a massapit a mangikakwera sike Dios. 11 Na bafabbayera e maawag nad a makkalakammu sikwara a masinak a maningngag si sapit i Dios a netunturu sikwara. 12 Ammek ipabulun ino bafay a manunturu onnu mappakandama si lalaki. Suminak nad baggina. 13 Se i Adam yo palungu a naparatu liye i Eva, 14 anna bakkan i Adam yo nailloku udde yo bafay anna nattabali si sinaliwat. 15 Udde matabbutneno bafabbayera megafu si panakda nu ibali-balinda a mangurug sike Jesu Kristo, midduk si korwan ira anna manolay a kaangga-anggam sike Dios anna ana mapiya a aggalangwa.