Na Palungu a Turak i Pablo sike
Timoteo
1
Naggabwat iyaw sikwak, i Pablo a apostol i Kristo Jesus meantu si dundun i Dios a Mannabbuttam anni Kristo Jesus a inanamatam.2 Antuweyaw yo turakku sikwam Timoteo a ibilangku a gakkurug a anakku si angngurug.
Idasalku sike Dios a Amatam anni Afutam a Kristo Jesus a ibali-balinda a massimpat sikwayu, allakkan dakayu anna indan dakayu si piya.
Na Pappalán metulyat so Sasan-Mestruwera
3 Ilelawitku sikwam kakunna yo inangwak sin inangngak so Macedonia a mabattangka so Efeso takesi dundunannuweno korwan a tolayera sinay a ammera manunturu si sasan-tunturuwera. 4 Anna itunduyu sikwara a ammera sayangan ino tiyempura si awan serbina a yayam ira anna aroddag a allistan ino ngan ira na aggidiyafuwantam ira a pakegafuwan ino tolayera a mattulyat imbes a akakwandeno planu i Dios megafu si angngurug sike Jesu Kristo. 5 Udde yo gakkad na iyaw a dundun e makkaiddu-idduk kayuna a naggabwat si makurug a nakam, wara malinis a konsensiya anna makurug a angngurug. 6 Ana korwan a tolayera a nattalekkud sitawera a gakkurug a tunturuwera anna mabid ira meafu si awan serbina a kiya-kiyan. 7 Kanggammanda a mattabali si mestruwera na katunungan udde ammera ke maintindiyan nu nenay yo sapi-sapitanda onnu yo kiya-kiyan meafu so sapi-sapitanda a maintindiyandengke. 8 Ammutam a yo katunungan i Dios a neyaddana sike Moises e mapiya nu meyusa si fustu. 9 Ammutam pay a yo katunungan e ammena neyadda para so matunung ira udde neyadda iyaw para so inoyera a amme makimoray si katunungan anna marrebelde metulyat so mapakandamera, para so sinaliwat ira anna para so inoyera a amme mangikakwa sike Dios, para so tolayera a makalussaw sike Dios, para so mamapatay si amarera onnu inarera anna para so gumappatayera, 10 para so tolayera a makidurug si bakkanda atawa, para so lallakiyera a makidurug si kalalakiyanda, para so tolayera a mallaku si imbut ira, para so masiriyera anna so testiguwera a amme massapit si gakkurug anna para so inoyera a mattulyat so gakkurug a tunturu i Dios. 11 Iyaw a gakkurug a tunturu e meantu so Mapiya a Baga meafu sike Jesu Kristo a netalak sikwak na madayaw a Diostam a mepangngat a medayaw.
Na Appabala-balat i Pablo so Allak i Dios
12 Mabbalatak sike Kristo Jesus a Afutam a nappatuyag sikwak, nebilangngak a matalakkan anna dinutukannak a masserbi sikwana, 13 maski nu nassipittaak sikwana sinoy. Nelupetku anna madungitak ingke so dumaladandannera. Udde naallakkan i Dios sikwak gumafu se ammek naintindiyan a nangwa-angwaak si maral sin ammek kepay nangurug sikwana. 14 Na simpat i Afutam a Jesus e mallifiyengke sikwak anna napangurugngak sikwana anna middukak si korwan ira gumafu se nakisittataak sike Kristo Jesus. 15 Iyaw a kasapitan e gakkurug anna maawag a maarasaw a awan pabbabang: Inang i Kristo Jesus sito talubaggan takesi tabbutanneno sinaliwat ira anna ikkanak ino karakkattan si amminan a sinaliwat ira. 16 Udde inallakkannak i Dios takesi sikwak a yo karakkattan si amminan a sinaliwat ira, nepaitana i Kristo a yo pasensiyana e awan pakiyaranna anna kanggammak a pangngarigan para so inoyera a mangurug sikwana anna matolenera a bulun i Dios amu-amu. 17 Baggineno Patul a awan pakiyaranna, awan katayanna anna ammena maita. Baggineno mittata a Dios. Madayawengke baggina amu-amu. Amen.
18 Timoteo a anakku si angngurug, yo idundungku a akwannu e meantu so netunduweno korwan a profetera meafu sikwam sinoy sin nepaammuweno Espiritu i Dios sikwara takesi maangga-anggammangkana a mangilaban si fustu para si Mapiya a Baga meafu sike Jesu Kristo kakunna yo tata sundalu a makigiyera 19 a ana mapaddat a angngurug anna malinis a konsensiya. Ana tolayera a ammera dumandan si konsensiyara anna gumafu sitaw, yo angngurugga e nekunna si tata bapor a nadaral. 20 Nebilang sikwara i Himeneo anni Alejandro a nedawawak sike Satanas takesi mimemmakin ino passipittara sike Dios.