6
So amminan a imbut ira a minangikkurug, ilawareno amurera takesi awan a masapit ino tolayera metulyat sike Dios anna so ituntu-tunturutam. 2 E nu minangikkurug pay yo amura, ammera maawanan si pangilawa sikwara gumafu se mawwayiyera si angngurug. Nabu, mas annanot kepay a serbiyandera si mapiya gumafu se kaminangikkuruggera yo makapammakapiya so asserbira anna iddu-iddukan payera i Dios.Na Sasan-Annunturu anneno Gakkurug a Wara-wara
Itunturum anna ipakaammum iyawera sikwara. 3 Nu wara manunturu si korwan a annunturu anna ammena meyannung so gakkurug a annunturu i Afutam a i Jesu Kristo anna so ituntu-tunturutam meantu so annuntul so uray i Dios, 4 mabbalagasay iyaw a tolay udde awan ke ammuna. Kanggamma lamang a makitinnabbag anna makipakwa meafu si sapit a paggabwatan ino pafu, pattitinnulyat, panandaral, anna pammaliwat si korwan a tolay. 5 E maumid baggina a makitinnulyat so tolayera a maral yo agginonotanda anna ammeran ammuweno kagakkuruwan. Arigga a megafu si angngurugga sike Dios e maddammak ira. 6 Gakkurug a dokal lud yo mapammakapiyan so pangwa si kiya-kiyan meantu so uray i Dios udde nu nad lamang makuntentuwera nu nenay yo ana sikwara, 7 se awan nekangkalintam sito lubag sin neyanak etam anna awan pay mekangkalintam nu matay etam. 8 Udde nu wara akkanan anna barasitam, makuntentu etam. 9 Udde inoyera a manggam a maddammak, malan ira a makakkap a manilla masiluwera si appan. Panggammandeno oddu a maral a kiya-kiyan a pakadarallandengkena. 10 Se yo panggam si pirak antu yo paggabwatan ino amminan a garannud a kamarallan anna si panggammanda a maddammak, oddu yo nattalekkud so angngurugga sike Dios anna nangadda si oddu a paddiriyat si akkatolera.
Na Pannunturuwera i Pablo sike Timoteo
11 Udde ikka, Timoteo, a gumasserbi i Dios, aroyuwannu amminan iyawera a maral a kiya-kiyan. Kumanannu a manolay si matunung anna meantu so uray i Dios, ana angngurugnga sike Kristo, ana idduk, ana pàattam, anna maumid a masimpat so korwan a tolayera. 12 Kumanannu si amminan a tuyagngu a manolay meantu si angngurugngu anna sikwam a akwan iyaw, ibali-balinnu a manolay a bulun i Dios amu-amu gumafu se antu iyan yo nakapiliyan i Dios sikwam sin tinaddannuwengke a nangurug sike Kristo so allangan na tolayera. 13 Testigu i Dios a mangadda si angat anni Kristo Jesus a nanestigu si kagakkuruwan sike Poncio Pilato sikwak a idundun iyaw sikwam: 14 makimoreka si mapiya so nedundun sikwam a akwannu a awan pakaliwatan onnu pakkurangan makiyad so pannuli i Afutam a i Jesu Kristo. 15 Se si fustu a tiyempu e mepaammunana i Dios i Kristo a mepangngat a madayaw anna mittata a mapakandama a Dios, baggina lamang yo mattangngal si amminan, Patul ino amminan a patul ira anna Afuweno amminan a afu-afuwera. 16 Baggina lamang yo awan patena anna sigigyan si sirwat a mabaggawengke a ammena dama maaranniyan. Awan a tolay a nakaita onnu makaita sikwana. Sikwaneno kadayawan anna pakapangwa amu-amu. Amen.
17 Idundunnu so dammak ira a ammera mappeyatannang, ammera a innanaman ino wara-warara a awan keyantuwanna, nu bakkan sike Dios a baggineno mangadda sikwatam si amminan a maawagtam takesi maanggamman etam. 18 Tunturuwannuwera a mangwa si mapiya anna bastantera nad si mapiya a taddera, minaggiyaddera anna nakaparan a mangiballay si kasittolera. 19 Si kunna sinay, manillera a mimfun si pakkukwa para sikwara ingkepay si langit a mattabali si masiggat a fundasyon para so dumatang a akkatolera antu yo gakkurug a akkatolay.
20 Timoteo, imurannu si mapiya yo netalak i Dios sikwam. Aroyuwannuweno tolayera a mabi-abid si awan serbina anna inoyera a mattitinnulyat meafu si aggammu udde awan a kagakkuruwanna. 21 Se ana yo korwan ira a kunda a ana gakkurug a aggammura udde neyaroyuwerengke si angngurugga.
Idasalku a masimpat i Dios sikwayu.