Tindinooje Aguur
30
1 Inan haalaaji Aguur ɓii Yake. O wi'i:«Yaa Laamɗo am, mi tampii! Mi tampii! Mi ronkii!»a
2 Miɗo ɓuri neɗɗo fuu mbaanyaaraaku,
mi walaa anndal ɓii Aadama.
3 Mi waɗaay hakkillo,
mi anndaa faa'e dow Ceniiɗo.
4 Moy yehii dow kammu warti?
Moy nanngi henndu nder junngo mum?
Moy tiigorii ndiyam kolte mum?
Moy darni keeri adunaaru?
Noy woni innde joomum?
Noy woni innde ɓiyiiko?
Si ni a anndii ɗum.
5 Haala Laamɗo fuu fonndaama tawaa wo ndima,
kanko woni wawaade moolotooɓe mo.
6 Taa ɓeydu dow haala makko,
heɓa taa o fele, o wanngina fewre maa.
7 Yaa Laamɗo am, kujje ɗiɗi ŋaarotomaami,
taa salanan ɗe fadde am maayude!
8 Woɗɗinam fewre e haalaaji meereeji,
taa waɗam talkaajo naa jom jawdi keewndi,
hokkam haddu haaju am tan.
9 Sabo si a waɗii kam jom jawdi keewndi,
miɗo waawi salaade ma, mi wi'a:
«Moy woni Joomiraaɗo?»
Si mi jogaaki faa'e du, miɗo waawi wujjude,
de mi famɗina innde maa, yaa Laamɗo am.
10 Taa mbonkoɗaa golloowo to joomum.
Heɓa taa o huɗe, aan du, de cemtaa.
11 Ina woodi kuɗooɓe saaraaɓe,
ɓe njettataa ɗum'en du.
12 Ina woodi ndaardooɓe ko'e muɓɓen laaɓuɓe,
fay ko ɓe laatii nyiddiniiɓe ɗum.
13 Ina woodi heewɓe mawnitaare,
e ƴeewɗe yawaare.
14 Ina woodi ɓe nyiiƴe kaafaahi,
ɓe gaggitte nannduɗe e laɓe,
faa ƴakka talkaaɓe,
heɓa ɓe timmina ɗum'en ley adunaaru.
15 Mbalku woodaana ɓikkoy ɗiɗoy,
inɗe makkoy ngoni «Hokkaram» e «Kokkoraa kam».
Kujje tati faa nay mbi'ataa heƴii abada,
tati arane ɗeen ngoni:
16 laakara, dimaro, leydi ɗomɗundi,
nayaɓere woni: yiite.
17 Jawuɗo baaba mum e inna mum,
salii ɗowtanaade ɓe,
daawle coppan yitere mum,
jigaaje nyaaman nde.
18 Kujje tati faa nay kaayɗinii kam, mi faamaay ɗe.
Tati arane ɗeen ngoni:
19 laawol dutal e kammu,
laawol mboddi dow kaaƴe,
laawol laana ndiyam dow maayo.
Nayaɓere ndeen woni: laawol yidde hakkunde gorko e debbo.
20 Inan laawol debbo pijoowo: o waaldan e gorko,
weeta, o wi'a: «Mi waɗaay ko boni fey»,
hono nyaamuɗo de mooyti hunnduko mum.
21 Kujje tati faa nay umminta hakkillo duuniyaaru, ɗe mbaawaa yardeede.
Tati arane ɗeen ngoni:
22 maccuɗo keɓuɗo laamu,
puuyɗo kaaruɗo neema,
23 debbo banyaaɗo keɓuɗo ɓaŋeede.
Nayaɓere ndeen woni: Korɗo loomtuɗo joomum.
24 Kujje pamare nay ngoni nder duuniyaaru,
ammaa iɗe mari hakkillo sanne.
25 Mettelli, ɗi ngalaa semmbe,
ammaa iɗi kawrani nyaamdu majji ƴaamnde.
26 Gaynaaje, ɗe ngalaa semmbe,
ammaa iɗe ngaɗa cuuɗi majje ley tefaaje.
27 Baɓɓatti ngalaa kaananke,
ammaa iɗi njokkondira no wooɗiri ley kawtal.
28 Pallangal, na waawi nanngireede junngo,
ammaa ingal naata fay nder suudu kaananke.
29 Kujje tati faa nay na ngoodi nyaaƴo ley yaadu muɓɓen.
Tati arane ɗeen ngoni:
30 Laddeeru, na ɓuri daabaaji fuu semmbe,
ndu yoofanta fay gootum laawol,
31 Hono noon ndontoori e ndamndi du ngorri.
Nayaɓere ndeen woni: kaananke ngonɗo yeeso sordaasiiɓe mum.
32 Si puuyndam wattii ma e mawnitaare,
si a anniyake dabare bonde du, muɓɓu hunnduko maa.
33 Ngam tilay si kosam yonkaama,
nebbam wurtoo.
Si hinere hamƴaama, ƴiiƴam wurtoo.
Si ɓernde du umminaama, hamre waɗa.