Tindinooje Lemuwiila
31
1 Inan haalaaji Lemuwiila kaananke,ɗi inna muuɗum janngini ɗum.
2 Inniiko wi'i mo: Aan ɓiyam,
ɗume mbi'anmaami, aan ɓiyam reedu?
Ɗume mbi'anmaami, aan ɓii du'aare am?
3 Taa hokku rewɓe semmbe maa,
laabi maa du, taa hokku ɗi halkooɓe laamiiɓe.
4 Lemuwiila am, laamiiɓe kaanaa yarude bagi.
Goonga, noon ardiiɓe ngoni kaandiraa yarude,
ardiiɓe ngaɗanaaka njaram.
5 Sabo si ɓe njarii, ɓe njeggitan jamirooje,
ɓe miilataako ɓillaaɓe.
6 Gonɗo daande maayde, kam haandi e bagi,
gooduɗo mettorgal ɓernde, kam jeyi yarude.
7 Ɓe njara, ɓe njeggita talkaaku maɓɓe,
heɓa taa ɓe miccitoo torraaji maɓɓe.
8 Omtu hunnduko maa,
haalu jaɓanaa ɓe mbaawaa haalande ko'e muɓɓen,
haalu jaɓanaa ɓe ngalaa faa'e.
9 Toownu daande maa,
kiitoroɗaa goonga,
keedanaa talkaajo e kaajaaɗo walleede.
Manoore deekiyo jom teddeengal
10 Debbo mo jikku lobbu, moy heɓata ɗum?
Imo ɓuri jawe kaŋŋe dimo sanne.
11 Ɓernde goriiko na hoolii mo,
waasataa moƴƴere fey.
12 Ko weli goriiko tan o waɗata,
haddu balɗe makko fuu.
13 O mottan haabu, kam e leeɓi baali,
o waɗiran ɗum ɓernde wootere.
14 Imo itta nyaamdu makko to woɗɗi,
hono no laanaaji ndiyam luumoytooɗi ngaɗirta noon.
15 Illa weetaay o finata,
o hokka ɓaade makko neema,
ndeen o hokka horɓe makko fuu gollal muɓɓen.
16 O miiloto coggu ngesa, o sooda nga,
ko o heɓiri golle makko o aawirta ngesa cabiije.
17 Imo gollira ɓernde wootere,
wo o tinniiɗo e golle.
18 Imo yi'a gollal makko na heɓa tino,
fay si jenngi du, lampal makko nyifataa.
19 Juuɗe makko na motta,
kolli makko na canya kolte.
20 Imo omtana talkaaɓe ɓernde makko,
imo foortana tampuɓe junngo.
21 O hulantaa ɓiɓɓe makko jaangol,
ɓe fuu, o nyootanii ɓe kolte tekkuɗe.
22 Imo sanyana hoore makko gude,
kolte boɗeeje ɗaatuɗe o holtirta.
23 Goriiko na teddinee ley kawrital mawɓe,
imo nananee ley kabaaruuji wuro ngoon.
24 Debbo oon na nyoota kolte na sonna,
imo sonnira luumotooɓe kaɓɓorɗi.
25 Semmbe e teddeengal ngoni kaddule makko,
o hulataa ko warata jaango.
26 Hakkillo o omtirta hunnduko makko,
wo e njinngu koolniingu o ekintinirta.
27 Imo ndaara no wuro makko yahirta,
abada o nyaamataa nyaamdu hoyfere.
28 Ɓiɓɓe makko na ndaroo, inndiraa o barkinaaɗo,
goriiko du na mana mo, na wi'a:
29 «Rewɓe ɗuuɗɓe na ngaɗa ko teddi,
de aan kaa aɗa ɓuri ɓe, ɓe fuu.»
30 Dawla na hiila,
ŋari du na paltoo hono henndu,
ammaa debbo kuloowo Joomiraaɗo, kam manetee.
31 Moƴƴinanee mo saabe barke juuɗe makko
golle makko manee yeeso lenyol fuu.