29
1 Tindinteeɗo de yoorni hoore mumboɓɓoto hela,
hunngoo ummaade.
2 Si dartiiɓe ina ɓeydoo, yimɓe ceyoto,
de si bonɗo laamake, yimɓe uuman.
3 Jiɗɗo hakkillo, seyo baaba mum,
jokkoowo rewɓe fijooɓe, halkan jawdi.
4 Laamiiɗo na semmbinɗira leydi mum e goongalaaku,
ammaa si o tiinnanii yimɓe dow yoɓugol lampo, o halkan ndi.
5 Maniroowo neɗɗo belɗi,
tuufinii koyɗe joomum.
6 Bonɗo boɓɓoto ley tuugol hakke mum,
ponnditiiɗo kaa, yimiran seyo.
7 Ponnditiiɗo na anndi hakkilande talka ley kiite,
bonɗo kaa, walaa iri anndal ngaal.
8 Jalnortooɓe ina njiiba huɓeere,
hakkilanteeɓe na nyifa tikkere.
9 Si jom hakkillo yeddondirii e puuyɗo,
puuyɗo oon feekoto, jalan, geddim timmataa.
10 Baroowo yimɓe ina wanyi laaɓuɗo,
ammaa dartiiɓe ina njiɗi mo.a
11 Puuyɗo na ɓangina ko ɓernde mum maati fuu,
jom hakkillo kaa, ina nannga hoore mum.
12 Si kaananke hakkilanii fewre,
ɓattiiɓe ɗum laatoto bonɓe.
13 Ko talkaajo e torroowo ɗum kawti woni ɗum ɗo:
ɓe ɗiɗo fuu, Joomiraaɗo yaynata gite maɓɓe.
14 Laamiiɗo kiitotooɗo talkaaɓe e goonga,
laamu mum duumoto.
15 Sawru e eeltol ina kokka hakkillo,
de suka accaaɗo, wo semteende inna mum.
16 Si bonɓe ɗuuɗii, bone ɗuuɗan,
ammaa dartiiɓe nji'an saamugol maɓɓe.
17 Eeltu ɓiya, o fowtinte,
o hebbinte seyo.
18 Si annabaaku walaa, jiiɓaare laamoto,
barke woodanii jokkuɗo jamirooje.
19 Maccuɗo tindinirtaake haala tan,
sabo fay nde o faami, o jaɓataa.
20 Yalla a yi'ii mo miilataako de haala naa?
puuyɗo na ɓuri ɗum cakitte.
21 Maccuɗo korsinaaɗo faa faltii illa cukaaku mum,
timmoode majjum laatoto bone.
22 Ɓernoowo law na ummina hamre,
na ɗuuɗina hakke mum du.
23 Mawnitaare neɗɗo famɗinan ɗum,
leeƴinɗo hoorem kaa, heɓan teddeengal.
24 Kawtuɗo e gujjo hakkillo wanyii hoore mum.
Yamiraa hunoo, de wi'aay faa'e.
25 Hulu neɗɗo, naataa tuugol,
hoola Joomiraaɗo, kisaa.
26 Heewɓe na piloo jaɓeede yeeso kaananke,
de kiite goonga to Joomiraaɗo ƴuurata.
27 Ponnditiiɗo na nyiddinii to bonɗo,
bonɗo du na nyiddinii to ponnditiiɗo.