28
1 Bonɗo doggan fay si riiwaaka,ponnditiiɗo kaa, ina suusi hono laddeeru, o hulataa.
2 Si yimɓe leydi ina muurta, ndi waɗan laamiiɓe ɗuuɗɓe,
jom anndal mo hakkillo kaa, laamorto ndi e jam.
3 Talkaajo torroowo talkaaɓe,
ina nanndi e ƴuwoonde mawnde bonnoore gese.
4 Joppuɗo jamirooje teddinii bonɓe,
jogiiɗo ɗe ina haɓda e maɓɓe.
5 Bonɓe paamataa kiite goongalaajo,
jokkuɓe Joomiraaɗo kaa,
na paama ɗum no wooɗiri.
6 Talkaajo golliroowo goongalaaku,
na ɓuri diikaaɗo jokkuɗo oonyaare.
7 Jokkuɗo jamirooje wo ɓiɗɗo gooduɗo hakkillo,
jokkuɗo guugaaɓe, semteende baaba mum.
8 Ɓeydiroowo jawdi mum e tino bonɗo,
hawriranii ndi moƴƴanɗo talkaaɓe.
9 Udduɗo noppi mum, salii hettindaade jamirooje,
fay du'aare mum na nyiddinii yeeso Laamɗo.
10 Bosinɗo dartiiɓe de watti ɗum'en dow laawol bonngol,
saaman ley ngayka ka wasi,
laaɓuɗo kaa, ronan ko wooɗi.
11 Jom jawdi ina miiloo wo jom hakkillo,
de talkaajo jom caral kaa, na anndi ko o laatii.
12 Si dartiiɓe njaalake fu, wo ɗum teddeengal manngal.
Si bonɓe ummake, neɗɗo fuu suuɗoto.
13 Cuuɗoowo hakkeeji mum heɓataa barke,
ɓanginɗo ɗi, acci ɗi, yaafete.
14 Jom barke wo kulɗo waɗude ko boni,
yoora-hooreejo kaa, saaman nder bone.
15 Laamiiɗo bonanɗo talkaaɓe
ina nanndi e laddeeru ŋorɓooru naa cirgu ndafaangu.
16 Laamiiɗo mo walaa paamal hebbinan torra yimɓe,
banyuɗo keɓal fewreyal kaa, juunnan balɗe mum.
17 Dufuɗo ƴiiƴam goɗɗo, yonki mum wulan ɗum
faa doggana saabeere, taa neɗɗo fuu faddoo ɗum.
18 Jokkuɗo laawol dartiingol hisan,
jokkuɗo laabi oonyiiɗi kaa, halkilawan.
19 Demoowo ngesa mum haaran,
jokkuɗo henndu kaa, talkiɗan.
20 Koolniiɗo barkinte faa ɗuuɗa,
jiɗɗo heɓude jawdi law kaa, hisataa kiite.
21 Haanaa neɗɗo jaɓana ɓe ɗo, de salanoo ɓe to,
e noon fuu, fay heltere buuru heƴii faa wosina carotooɗo.
22 Ɗawɗo ina tefa heɓude jawdi law,
o anndaa talkaaku na ɗappinanii mo.
23 Dartinɗo neɗɗo heɓowan moƴƴere makko
faa ɓuri manoowo mo.
24 Bujjoowo saaraaɓe mum,
de wi'a wanaa gujjo wo jaado bonnoowo.
25 Mo eelgal ɗuuɗungal na wadda hamre,
kooliiɗo Joomiraaɗo kaa, woodan jawdi ɗuuɗundi.
26 Kooliiɗo hoore mum wo puuyɗo,
jokkuɗo laawol hakkillo kaa, hisinte.
27 Kokkoowo talkaajo waasataa heɓude,
de joorɗo junngo kaa, kuddi saaman dow muuɗum.
28 Si bonɗo laamake, neɗɗo fuu suuɗoto,
si halkii du, dartiiɓe ɓeydoto.