27
1 Taa manu hoore maa dow ko warata,sabo a anndaa ko hannden rimata.
2 Taa manu hoore maa,
accu maneɗaa.
3 Tefaare na teddi, leydi du wo donngal,
de bone puuyɗo kaa, na ɓuri ɗum fuu teddude.
4 Tikkere na nyaaɗi,
nyanngere ɓernde du hawjataake,
de moy waawi munyude kiram?
5 Goonga mo suuɗaaka
na ɓuri njinngu cuuɗaangu.
6 Naawalla pelooje giɗo na hoolnii,
ganyo kaa, fay si moosi hoolnaaki.
7 Kaaruɗo ina yaaɓa beɗi njuumndi,
dafaaɗo kaa, na nyaama fay ko haaɗi.
8 Jiiltotooɗo to woɗɗi e wuro mum
wo hono foondu fiirooru to woɗɗi e suudu mum.
9 Nebbeele urɗe na ceyna ɓernde,
mbelirka yigiiyo na ƴuura e tindinooje mum gaɗiraaɗe yidde.
10 Taa yoppu yigoo maa, naa yigoo bammaa.
Taa yahu wuro sakiike maa nyannde bone hewtii ma,
sabo gondo ɓadiiɗo na ɓuri sakiike boɗɗuɗo.
11 Ɓiyam, laatoɗaa jom hakkillo, welnu ɓernde am,
faa mi heɓa no jaaboriimi yawuɓe kam.
12 Ƴoƴuɗo ina yi'a bone de suuɗo.
Mo ƴoƴaa kaa, na warda dow muuɗum, nawnoo.
13 Jaɓu saaya jowuɗo nyamaande goɗɗo dow muuɗum,
si o adanii janano du, yamir mo tolma.
14 Si goɗɗo toownii daande mum,
jowtii gondo mum illa fajiri,
ɗum ndaardete hono kuddi.
15 Deekiyo kaɓeteeɗo wo hono wudde suudu,
si ƴuwoonde na toɓa fu, na si'a, na si'a.
16 Jiɗɗo jogaade mo,
ina nanndi e tefoowo tiigaade henndu naa nebbam.
17 Hono no njamndi welnirta njamndi,
noon neɗɗo welnirta giɗo mum.
18 Kakkilanɗo ƴibbi nyaaman ɓiɓɓe makki,
kakkilanɗo mawɗo mum teddintee.
19 Hono no neɗɗo ndaardata ley ndiyam yi'a yeeso mum,
noon ɓernde joomum hollirta jikku mum.
20 Maayde e laakara,
abada keewataa,
Muuyɗe e gite,
abada kaarataa.
21 Kaŋŋe e cardi ndaartindorte yiite,
neɗɗo du ndaartindorte manoore mum lobbere.
22 Fay si cokkuɗaa puuyɗo hono gabbe,
puuyndam muuɗum timmataa.
23 Anndu dammucce maa fuu,
hakkilan gootel majji fuu,
24 ngam riiku duumataako,
laamu du na woodi haddi.
25 Si huɗo wa'aama, heso fuɗii,
faa ko baamle du hawrunduraama,
26 ndeen baali maa koltinte,
damɗi maa du keɓante ngesa,
27 kosam be'i maa du wuurnete,
aan e ɓaade maa e horɓe maa fuu.