26
1 Hono no jaangol fonnditoraaki ceeɗu naa kenehenam nder ƴaamnde,hono noon woni teddeengal haandiraa e puuyɗo.
2 Kuddi ɓolum nanngataa.
Indi nanndi e foondu teetiindu,
naa wugaandu wonundu na fiira.
3 Puccu jeyi labangal, araawa loosol,
puuyɗo du, sawru dow kunkuuru.
4 Taa jaaba puuyɗo fodde puuyndam
sakko laatoɗaa hono makko.
5 Jaaba puuyɗo fodde puuyndam mum,
taa o miilu imo woodi hakkillo.
6 Nelal puuyɗo fewnataa ɓernde.
Ingal nanndi e taƴugol koyɗe,
naa yarugol tooke.
7 Banndol ley hunnduko puuyɗo
na nanndi e koyɗe bonnguujo.
8 Manude puuyɗo nanndaana
e haɓɓugol hayre e piwlol.
9 Banndol ley hunnduko puuyɗo
na nanndi e liccal gi'e nder junngo culotooɗo.
10 Adoowo puuyɗo naa paltotooɗo faa hokka ɗum golle,
na nanndi e piɗoowo kure mo taykataako.
11 Puuyɗo coƴƴiiɗo nder puuyndam,
na nanndi e rawaandu nyaamtiindu ko tuuti.
12 A yi'ii ndaardoowo hoore mum wo jom hakkillo naa?
Puuyɗo na ɓuri ɗum jikke.
13 Jaayɗo ina wi'a laddeeru woni dow laawol,
rawaandu ladde woni nder laabi.
14 No dammbugal waylitortoo, si na ommbee, na ommtee,
noon jaasuɗo waylitortoo dow leeso muuɗum.
15 Jaayɗo watti junngo ley le'al,
hunngii wartirde ngo e hunnduko mum.
16 Jaasuɗo na miiloo kam ɓuri
yimɓe jeɗɗo waawuɓe jaaboraade hakkillo.
17 Naatuɗo ley hamre nde walanaa ɗum,
na nanndi e nannguɗo noppi rawaandu faltotoondu.
18 Kaaŋaaɗo piɗoowo kure yiite barooje,
19 kam e kiiluɗo gondo mum, de sakitii wi'i wo toolo tan.
20 Si leɗɗe timmii yiite nyifan,
si naafiki walaa, hamre feewan.
21 Kaɓeteeɗo pooɗoowo hamre
na nanndi e ƴulɓe dekaaɗe dow pette
naa leɗɗe dekaaɗe dow yiite.
22 Haala nyo'oowo wo nyaamdu welndu,
diƴƴooru faa ley reedu nanoowo ka.
23 Ɗemngal belngal e ɓernde bonde
na nanndi e njamndi ɗelkoori mbujaandi dow loonde leydi.
24 Jom nganyaandi na haala mbelka,
de jammbi saawii ley ɓernde mum.
25 Nde o waɗani ma haalaaji belɗi, taa hoola mo,
ngam imo suuɗi miilooji nyiddiniiɗi jeɗɗi.
26 Nganyaandi makko na suuɗii nder ƴoyre,
bone makko wanngan yeeso yimɓe fuu.
27 Basuɗo ngayka saaman ley makka,
tallitinɗo hayre, kam nyoƴƴintee.
28 Hunnduko penoowo ina wanyi mo fewani,
kaalanɗo goɗɗo belɗi liɓii ɗum.