22
1 Innde gasunde na ɓuri jawdi keewndi,heɓude darja du na ɓuri cardi e kaŋŋe.
2 Ko hawti talkaajo e diikuɗo woni ɗum ɗo:
ɓe ɗiɗo fuu, wo Joomiraaɗo tagi ɓe.
3 Ƴoƴuɗo ina yi'a bone de suuɗo,
mo ƴoƴaa kaa, ina warda dow muuɗum, de nawnoo.
4 Leeƴinkinaare e kulol Joomiraaɗo
na ngadda jawdi e teddeengal e nguurndam.
5 Gi'e e tuugol ngoni dow laawol oonyiiɓe,
kakkilanɗo yonki mum woɗɗoto ngol.
6 Hollu suka laawol ngol jokkata,
ndeen si mawnii fu, yoppataa ngol.
7 Jogiiɗo ina mara talkaajo,
adoowo nyamaande du wo maccuɗo nyalmotooɗo ɗum.
8 Aawuɗo oonyaare taƴan bone,
sawru bone muuɗum helan.
9 Moƴƴuɗo barkinte,
sabo na yeɗa talkaaɓe nyaamdu muuɗum.
10 Riiwu jalnortooɗo, ndeen hamre re'an,
durwo e yawaare du timman.
11 Jiɗuɗo ɓernde laaɓunde,
e haala caahiika,
woni yigoo kaananke.
12 Joomiraaɗo ina hakkilani anndal,
ina sankita haalaaji jambotooɓe.
13 Jaayɗo ina wi'a «Laddeeru woni dow laawol!
Mi waawaa wurtaade sabo mi warete.»
14 Haala debbo pijoowo, ngayka lugguka,
mo Joomiraaɗo tikkani saamata nder makka.
15 Puuyndam na haɓɓii e ɓernde suka,
loosol eeltol riiwata ɗam.
16 Torroowo talkaajo faa ɓeyda keɓal mum
e gaɗanoowo jogiiɗo moƴƴere, talkiɗan.
Haalaaji hakkillo capanɗe tati
17 Fiɗɗu noppi maa, hettina haalaaji jom'en hakkillo,
omtu ɓernde maa saabe anndal am.
18 Nde njokkuɗaa ɗum ley ɓernde maa fu,
a weltoto,
a segilto dursitaade ɗum wakkati fuu.
19 Wo faa kooloɗaa Joomiraaɗo
miɗo hokke ɗi hannden,
aan e hoore maa ni.
20 Ley haalaaji am, mi limtante laabi capanɗe tati.
Wanaa tindinooje e annde ina tawaa ley majje naa?
21 Kanje anndinte haalaaji goongalaaji tabitooji,
heɓa njaaboroɗaa neluɓe ma no wooɗiri.
Haala arana
22 Taa nyaamu talkaajo ngam o talkaajo,
taa limnu ɓilliiɗo nder kiite,
23 sabo Joomiraaɗo wallan ɗum'en,
o bonnan nguurndam bonnuɓe ɗum'en fuu.
Haala ɗiɗaɓa
24 Taa yigondir e ɓernoowo,
taa yaadu e ɓernilawoowo
25 faa taa woowtu jikku makko,
de yonki maa saama nder tuugol.
Haala tataɓa
26 Taa fiyu ɓernde, mbi'aa
a yoɓan nyamaande goɗɗo,
27 sabo si a yoɓaay nde,
fay leeso ngo pukkiɗaa dow muuɗum teetete.
Haala nayaɓa
28 Taa sottin keerol ngol maamiraaɓe maa ndarni.
Haala njoyaɓa
29 Karwuɗo ley golle mum ndaroto yeeso laamiiɓe,
o tawataake ley famɗuɓe.