23
Haala njeegaɓa1 Si aɗa nyaamda e kaananke,
hakkilan ko woni yeeso maa.
2 Si a guugaaɗo fu,
ndeentoɗaa.
3 Taa muuye neema makko belɗo,
jammbi woni nder mum.
Haala njeɗɗaɓa
4 Taa waru hoore maa dow filagol jawdi,
kakkilaa, ndeentoɗaa.
5 Ngam fadde maa e feertude gite dow mayri,
tawan ndi halkii,
ndi waɗan bippeele,
ndi fiira hono gabuure.
Haala njeetataɓa
6 Taa nyaamu nyaamdu ɗawɗo,
taa suune neema muuɗum belɗo,
7 ngam si goonga, wo o liman lonnge maa.
Imo wi'ee: «Nyaamu, yaru!» tawee ɓernde makko yardaaki ɗum fey.
8 Ndeen a tuutan longere nde moɗuɗaa fuu,
mbonnaa haalaaji maa belɗi.
Haala njeenayaɓa
9 Taa haaldu e puuyɗo,
o yawan haalaaji maa gasuɗi.
Haala sappoɓa
10 Taa sottin hayre resaande dow keerol ngesa maaɗa,
taa naatu du nder ngesa atiime.
11 Sabo Laamɗo daraniiɗo mo oon ina semmbiɗi,
o haɓdan e maaɗa, o heedana oon.
Haala sappo e go'aɓa
12 Omtu ɓernde maa saabe tindinooje,
noppi maa du, saabe anndal.
Haala sappo e ɗiɗaɓa
13 Taa sala eeltugol suka,
ngam loosol warataa ɗum.
14 Nde piiruɗaa mo loosol,
a hisinan mo maayde.
Haala sappo e tataɓa
15 Ɓiyam, si a waɗii hakkillo,
ɓernde am weltoto, miin du.
16 Si aɗa haala ko dartii,
mi heewan weltaare pet.
Haala sappo e nayaɓa
17 Taa ɓernde maa hiru waɗooɓe hakke,
ammaa hulu Joomiraaɗo wakkati fuu.
18 Ndeen cakitte maa mbooɗan,
jikke maa du tabitan.
Haala sappo e njoyaɓa
19 Ɓiyam, hettina, laatoɗaa jom hakkillo,
ngattaa ɓernde maa dow laawol dartiingol.
20 Taa taweɗaa hakkunde yarooɓe,
e guuganaaaɓe teewu.
21 Sabo jaroowo e guugaaɗo talkiɗan,
ŋoŋugol du na ɓorna neɗɗo tekke.
Haala sappo e njeegaɓa
22 Hettina bammaa kolluɗo ma adunaaru,
taa famɗin inna maa fay nder nayeewu.
23 Nanngu goonga faa wooɗa, taa conna ɗum.
Keɓaa hakkillo, e eeltol, e paamal,
ley ko ngaɗataa fuu, taa yeeba ɗum.
24 Baaba dimuɗo dartiiɗo na fittira kuyam,
dimuɗo jom hakkillo seyanto ɗum.
25 Ndelle, accu saaraaɓe maa ceyoo,
accu dimuɗo ma oon weltoo.
Haala sappo e njeɗɗaɓa
26 Ɓiyam, hokkam ɓernde maa,
laabi am mbela gite maa.
27 Woykuuru wo ngayka luggiɗinka,
debbo pijoowo wo hono saamude ley ɓunndu faaɗundu.
28 Iri rewɓe ɓeen ina cuuɗoo, ɗappinoo hono yanooɓe,
ɓe mbonnii hoolaare worɓe ɗuuɗɓe.
Haala sappo e njeetataɓa
29 Moy bone e mimsitingol ngonani?
Moy hamre e felbugol ngonani?
Moy barme ɓolum ngonani?
Moy gite mum mbojjata?
30 Wo baaloowo na yara,
e yarooɓe culnoojam faa diwta.
31 Taa ndaaru njaram saabe mbooɗirka majjam,
taa beege ɗam wakkati ɗam siiwetee nder nyeɗirde,
iɗam muuynii nder hononnde.
32 Si a yarii ɗam,
ɗam soppete hono mboddi,
ɗam yuwete hono tooke fooskere.
33 Gite maa nji'an ko ɗe mboowaa yi'ude,
ɓernde maa du wurtinan ko jiiɓii.
34 A laatotoo hono pukkiiɗo hakkunde bempeƴƴe,
hono ɗaaniiɗo sera laana.
35 A wi'an hoore maa: «Mi fiyaama, de mi maataay,
mi tappaama, de mi maataay naawɗum.
Ndeye pinanmi faa mi ɓeyda yarude?»