21
1 Ɓernde kaananke wo hono gooruwol e junngo Joomiraaɗo.Imo ɗowira nde no o yiɗiri.
2 Wakkati fuu neɗɗo ina miiloo laawol mum na dartii,
ammaa Joomiraaɗo woni etoowo ɓerɗe.
3 Gollude ley goongalaaku e dartaare,
na ɓurani Joomiraaɗo sadakaaji.
4 Manngu ɓecce e daarɗe mawnitaare,
wo ko bonɓe njalbirta.a
5 Dabareeji tinniiɗo na ngoodi barke,
golliroowo e haraare talkiɗan.
6 Jawdi keɓiraandi fewre,
sankitoto hono cuddi,
indi ɗowira faro maayde.
7 Toonyaare bonɓe halkan ɗum'en,
ngam ɓe calake gollude ko dartii.
8 Laawol jom feloore na oonyii,
golleeji laaɓuɗo kaa, na ndartii.
9 Wuurude dow soɓɓundu suudu,
na ɓuri wondude e debbo kaɓeteeɗo ley mayru.
10 Bonɗo ina fooɗanoo waɗude bone,
o yurmataake fay yigiiko.
11 Si mo semtataa jukkaama fu, mo ƴoƴaa heɓan hakkillo,
si jom hakkillo jannginaama, heɓan anndal.
12 Laamɗo dartiiɗo ina taykoo suudu bonɓeb
kam wattata ɓe ley kulol manngol.
13 Banyuɗo nanude bojji talkaajo,
kam du woyan de hettintaake.
14 Moƴƴere nder cuncukka na feewna ɓernde,
dokkal ley suuraare na jippina tikkere.
15 Kiite goongalaajo na welna ɓernde dartiiɗo,
ammaa ɗum kulol manngol to bonɓe.
16 Caliiɗo laawol hakkillo,
fowtidowan e maayɓe.
17 Jiɗɗo weltaare talkiɗan,
jiɗɗo cabijam e nebbam riikataake.
18 Yonki bonɗo loomtanan ponnditiiɗo,
yonki bonnooɓe amaana du loomtanan dartiiɓe.
19 Wuurude ley ladde yeerumbere
na ɓuri wuurdude e debbo kaɓeteeɗo.
20 Jawdi korsundi e nebbam tawete ley wuro jom hakkillo,
de puuyɗo kaa, ina moɗilawa ɗum fuu.
21 Jokkuɗo dartaare e hinney,
heɓan nguurndam e dartaare e teddeengal.
22 Jom hakkillo honan huɓeere semmbiɗinɓe,
de jaaloo nde, kayre nde ɓe koolii.
23 Baawɗo hunnduko mum,
hiini hoore mum e bone.
24 Mawnitiiɗo mo walaa ngo, innde mum woni jalnortooɗo,
golleeji mum na paltii ƴukkinaare mawnde.
25 Eelgal jaayɗo waran ɗum,
ngam juuɗe muuɗum calake gollude.
26 Abada gite jaayɗo kaarataa muuyude,
ponnditiiɗo kaa ina hokka, ɗawataa faa'e.
27 Sadaka bonɓe na nyiddinii yeeso Joomiraaɗo,
sakko nde ɓe ngaɗirii ɗum anniyaaji bonɗi.
28 Seede fewreejo halkan,
ammaa haala kettindiiɗo kaa tabitan.
29 Bonɗo ina yoorna gite mum,
ponnditiiɗo kaa, ina hakkilani laabi mum.
30 Walaa hakkillo, naa paamal, naa dabare
waawoore jaalaade yeeso Joomiraaɗo.
31 Pucci na cegilanee nyannde konu,
de wo Joomiraaɗo hokkata jaalagol.