20
1 Cabijam lamminaaɗam na fooɗana neɗɗo yawaare,bagi du hamre,
culiiɗo walaa hakkillo.
2 Ummagol ɓernde kaananke na nanndi e bojji laddeeru,
umminɗo ɓernde makko sonnii yonki mum.
3 Boɗɗiiɗo hamre wo tedduɗo,
puuyɗo tan ɓadoto nde.
4 Si ndunngu waɗii, jaayɗo remataa,
wakkati tayri o tefan, de o waasa.
5 Miilooji neɗɗo na nanndi e ndiyam lugguɗam,
de jom paamal ina nyeɗa ɗam.
6 Yimɓe heewɓe ina ndaarda ko'e muɓɓen hinniiɓe,
de koolniiɗo le, moy heɓata ɗum?
7 Dartiiɗo ina njokka laawol hoolaare,
ɓiɓɓe muuɗum mbeltoto caggal muuɗum.
8 Si kaananke jooɗake faa hiitoo,
gite muuɗum annditan bonɗo.
9 Moy waawi wi'ude:
«Miin kaa, ɓernde am na laaɓi far,
mi walaa hakke»?
10 Ponndirɗe e etirɗe ɗe kuuɓaay
ina nyiddinii yeeso Joomiraaɗo.
11 Fay suka na anndiree golle muuɗum,
si nguurndam muuɗum na laaɓi, na ndartii.
12 Nowru nanooru e gite ji'ooje,
ɗum fuu Joomiraaɗo tagi ɗum.
13 Yiɗa ɗoyngol, waasa,
feerta gite, haara.
14 Coodoowo ina wi'a: Wooɗaay, wooɗaay!
De si tottitake fu, mana ko soodi.
15 Kaŋŋe na weƴƴitii, kaaƴe dime du na ɗuuɗi,
ko tiiɗi woni haalaaji anndal.
16 Jaɓu saaya dekuɗo nyamaande janano dow muuɗum,
si o jaɓanii janano du, yamir o wadda tolma.
17 Nyaamdu keɓiraandu fewre na weli neɗɗo,
de gaɗa ɗuum ndu laatoto kaaƴe nder hunnduko muuɗum.
18 To tindinooɓe ngoni, ɗoon dabare adetee,
jiɗɗo yaade konu, sanaa dabare lobbere.
19 Keewɗo haala ina wanngina sirri,
ndeen le, taa yigondir e makko.
20 Kuɗuɗo inna mum e baaba mum,
hoodere mum nyifan mup.
21 Ndongu keɓaangu law,
barke mum juutataa.
22 Taa mbi'a a yoɓtoto,
ammaa hoola Joomiraaɗo, kam dannete.
23 Ponndirɗe jaccuɗe
na nyiddinii yeeso Joomiraaɗo.
Imo wanyi du etirɗe fewreeje.
24 Joomiraaɗo kam ɗowata neɗɗo,
noy tagaaɗo faamirta laawol mum?
25 Taa yaawu waɗande Joomiraaɗo amaana
de cakitoɗaa mbi'aa, «Si mi annduno!»
26 Laamiiɗo kakkilɗo ina ƴaroo sennda bonɓe,
imo una ɓe nder wowru makko.
27 Yonki tagaaɗo wo lampal ngal Joomiraaɗo hokki,
ingal taarta ko woni nder makko fuu.
28 Hinney e hoolaare njogotoo kaananke,
hinney woni tiggere laamu makko.
29 Darja sukaaɓe, semmbe muɓɓen,
ndanandi du, teddeengal nayeeɓe.
30 Piiɗe naawɗe na ndiiwa bone,
loosol du na dartina yonki.