19
1 Talkaajo anndiraaɗo hoolaare,ina ɓuri puuyɗo mo haalaaji jaayɗi.
2 Ciinal nafataa to anndal walaa,
to yaawugol woni, boofi kunngataako.
3 Puuyndam ɓii-Aadama na bonna laawol mum,
de o ɓernana Joomiraaɗo.
4 Jawdi na wadda yigiraaɓe ɗuuɗɓe.
Talkaajo kaa, fay yigoo mum yoppan ɗum.
5 Seedeejo fewreejo hisataa kiite,
kaaloowo pene kam du daɗataa.
6 Yimɓe heewɓe ina tefa moƴƴere neɗɗo tedduɗo,
neɗɗo fuu na yigondira e moƴƴuɗo.
7 Talkaajo, fay sakiraaɓe mum ina mbanya ɗum,
sakko yaadiraaɓe muuɗum,
si o fuɗɗii haalude, ɓe cankitoto.
8 Kakkilɗo nafii hoore mum,
kilniiɗo paamal heɓan riiku.
9 Seede fewreejo hisataa kiite,
kaaloowo pene kam du halkan.
10 Hono no puuyɗo fotaay riikeede,
noon maccuɗo du woni fotiraay laamaade ɓiɓɓe laamu.
11 Annduɗo ko haani ɓernilawtaa,
accanɗo goɗɗo boofi, wo teddinteeɗo.
12 Tikkere kaananke, wo bojji laddeeru,
moƴƴere muuɗum du, saawandere dow huɗo.
13 Ɓiɗɗo puuyɗo na torra baaba mum,
Deekiyo kaɓeteeɗo, wo suudu si'ooru wakkati fuu.
14 Neɗɗo ina waawi ronude cuuɗi e jawdi to maamiraaɓe,
de deekiyo mo caral kaa, wo dokkal Joomiraaɗo.
15 Jaayre na wadda ɗoyngol teddungol,
jaasuɗo du, rafete.
16 Jogiiɗo jamirooje jogake yonki mum,
jawuɗo ɗe maayan.
17 Moƴƴanɗo talkaaɓe wuƴake Joomiraaɗo,
Joomiraaɗo du yoɓan joomum.
18 Eeltu ɓiya illa jenngaay,
si wanaa noon o halkan.
19 Ɓernoowo law, tilay yoɓa gacce mum,
si a hisinii mo ɗum, a ɓeydanan mo ɗum.
20 Hettina tindinooje, njaɓaa tindinoore,
timmoode majjum laatante hakkillo.
21 Ɓernde neɗɗo na diida dabareeji ɗuuɗɗi,
de wo dabare Joomiraaɗo tan tabitata.
22 Ko neɗɗo yiɗiraa woni hinney koolniiɗo,
talkaaku na ɓuri fewre.
23 Kulol Joomiraaɗo na yaada e nguurndam,
kiirtoɗaa, pukkoɗaa,
bone fuu hewtataako ma.
24 Jaayɗo watti junngo nder le'al,
ammaa waawaay fay muɗɗaade.
25 Fiyu jalnortooɗo, ndeen mo ƴoƴaa hakkilan,
felu ɓennduɗo, ndeen ɓeydan anndal.
26 Torruɗo baaba mum, riiwi inna mum,
huyfii, semtinii lenyol.
27 Ɓiyam, si a salake tindinoore,
a woɗɗoto haalaaji anndal.
28 Ceediiɗo fewre ina yawii hiitorde,
bonɓe ina mbeltoroo ko boni.
29 Kiite na ɓadii jalnortooɗo yimɓe,
puuyɗo du, cabbi dow kunkuuru mum.