18
1 Ceeduɗo e lenyol fu, wo muuyɗe muuɗum tan jokki,imo yedda dabare lobbere fuu.
2 Puuyɗo yiɗaa faamude,
sanaa haalude ko woni ley miiloo mum.
3 Si bonɗo warii, yawugol warii,
semteende ina halka ndimaaku.
4 Haalaaji neɗɗo wo ndiyam lugguɗam,
to hakkillo ƴuwata wo ildude wubboore.
5 Haanaa neɗɗo daranoo bonɗo,
de saloo goonga dartiiɗo.
6 Ɗemngal puuyɗo na fooɗa hamre,
ingal rimana ɗum loosol.
7 Wo hunnduko puuyɗo halkata ɗum,
ɗemngal muuɗum wo tuugol nanngoowol ɗum.
8 Haala nyo'oowo wo nyaamdu welndu,
diƴƴooru faa ley reedu nanoowo ka.
9 Jeebotooɗo golle mum,
kam e kalkuɗo njaadata.
10 Innde Joomiraaɗo woni suuɗorde,
to dartiiɗo doggirta, de hisa.
11 Jom jawdi ina ndaara keɓal mum hono ndeenaagu mum,
ley miiloo makko huunde fuu hewtataako ngal.
12 Manngu becce na wadda halkere,
leeƴinkinaare kaa, na wadda teddeengal.
13 Jaabiiɗo illa hettindaaki,
wo puuyɗo cemtuɗo.
14 Ɓernde neɗɗo na waawi jaalaade nyawu,
ɓernde mettunde kaa, moy semmbinɗinta ɗum?
15 Jom caral heɓan anndal,
wo kanngal jom hakkillo filotoo hettindaade.
16 Dokkal na omta laawol,
na hoyna yi'ude mawɓe.
17 Ley kiite, artuɗo haalde nanndi e jom goonga,
faa nde kiitodotooɗo oon warii yeddi ɗum.
18 Cumnal na sennda hamre,
na timmini haala hakkunde jom'en semmbe.
19 Si ɓernde banndiiwo bonii, nde yooran hono hayre,
hamre na sennda yimɓe hono tigge dammbugal jamndi.
20 Haalaaji neɗɗo nyaamnata ɗum,
gasuka ka haali kaan wuurnata ɗum.
21 Ɗemngal na halka, na hisina,
tilaay jewtoowo jaɓa ko ngal rimata.
22 Keɓuɗo deekiyo heɓii ko wooɗi,
heɓii moƴƴere to Joomiraaɗo.
23 Talkaajo ina ŋaaroroo e leeƴinkinaare,
jom jawdi na jaaboroo e daande sattunde.
24 Ina woodi yigiraaɓe wattooɓe neɗɗo ley bone,
ammaa yigiiyo goongalaajo kaa ina ɓuri sakiike.