17
1 Keltel buuru ley hakkillo fukkiingo,na ɓuri suudu heewndu nyaamdu ley hamre.
2 Maccuɗo jom hakkillo laamoto ɓiɗɗo cemtinoowo,
o heɓan hawtude e ɓiɓɓe joomiiko ndongu.
3 Yiite rimɗinta cardi e kaŋŋe,
Joomiraaɗo du kam fonndata ɓerɗe.
4 Bonɗo ina hettinoo haalaaji jaayɗi,
penoowo du ina hettinoo haalaaji liɓooji woɓɓe.
5 Jawuɗo talkaajo felii Taguɗo ɗum,
beltortooɗo bonanda daɗataa masiiba.
6 Kufune teddeengal nayeeɓe woni taaniraaɓe muɓɓen,
teddeengal ɓiɗɗo woni saara mum.
7 Haalaaji gasuɗi kegitaaki to puuyɗo,
sakko fewre dow ɗemngal tedduɗo.
8 Dokkal na nanndani gaɗuɗo ɗum e ko waddata saa'a,
to o yehi fuu, o heɓan.
9 Mo jogitataako gacce, ina wadda yidde,
de jogitotooɗo kaa ina sennda yigiraaɓe
10 Felude jom anndal nde wootere,
ɓuri fiyude puuyɗo nde hemre.
11 Bonɗo tefoowo muurtere,
nelaaɗo cattuɗo neldetee.
12 Hawrude e laddeeru ndu ɓiɓɓe mum kooƴaa,
na ɓuri hawrude e puuyndam puuyɗo na ummii.
13 Joɓiroowo jam e ko boni,
bone woɗɗataako suudu mum.
14 Fuɗɗude hamre, wo sukkitinde ilam
dillude fadde mayre ummaade ɓuri.
15 Carotooɗo joofuɗo bonɗo e carotooɗo jukkuɗo laaɓuɗo,
ɓe ɗiɗo fuu wo nyiddiniiɓe yeeso Joomiraaɗo.
16 Ɗume ceede puuyɗo nafata?
Yalla o tefiran ɗe hakkillo naa?
A'aa, o walaa muuyɗe majjum.
17 Giɗo ina yiɗi wakkati fuu,
sakiike du rimaama saabe nyannde ɓillaare.
18 Dekuɗo nyamaande goɗɗo dow muuɗum walaa hoore.
19 Jiɗɗo hamre wo hakke yiɗi,
toownuɗo hoore fooɗanan hoore muuɗum halkere.
20 Jom ɓernde oonyiinde saaman nder bone,
ɗemngal kaaloowal ko oonyii du heɓataa jam.
21 Dimuɗo puuyɗo, kam e mettorgal,
baaba puuyɗo, heɓataa seyo.
22 Ɓernde welnde na sawra,
mettorgal ɓernde du na yoorna ƴi'e.
23 Bonɗo ina yeenee ceede ley cuncukka
faa halka goonga.
24 Gite jom paamal ina ngoni dow hakkillo,
gite puuyɗo kaa, na puttinii nokku fuu.
25 Puuyɗo ina waddana baaba mum torra,
imo haaɗi rok to inniiko.
26 Yomnaade dartiiɗo wooɗaa,
piiɗe ardoriiɓe laaɓal du haanaa.
27 Baawɗo hunnduko mum ina jogii anndal,
keesindiiɗo wo jom paamal.
28 Fay puuyɗo si deƴƴii ina nanndi e jom hakkillo,
si waawi ɗemngal muuɗum du, ina nanndi e jom paamal.