16
1 Ɓii-Aadama e dabare mum,Joomiraaɗo du e jaabum.
2 Neɗɗo ina miiloo laabi mum fuu wo laaɓuɗi,
ammaa Joomiraaɗo woni etoowo anniyaaji.
3 Halfin Joomiraaɗo golle maa,
ndeen ko cegiliɗaa fuu tabitan.
4 Ko Joomiraaɗo tagi fuu na woodi sabaabu,
fay bonɗo du saabe nyalaande bone.
5 Mawnitiiɓe ina nyiddinii yeeso Joomiraaɗo,
sikke fuu walaa ɓe njukkete.
6 Hinney e hoolaare ina mooyta gacce,
kulol Laamɗo du wo ko woɗɗinta neɗɗo e bone.
7 Nde nguurndam neɗɗo welii Joomiraaɗo fu,
wattan potal hakkunde joomum e wayɓe mum.
8 Heɓude seeɗa ley dartaare,
na ɓuri ɗuuɗal ley oonyaare.
9 Neɗɗo na miiloo to yahata,
de wo Joomiraaɗo tabintinta to yaaɓata.
10 Ko hunnduko kaananke haali na woodi baawɗe hono ɗe Laamɗo,
o haanaa woofude ley kiite makko.
11 Etirɗe potuɗe ina ƴuura to Joomiraaɗo,
ponndirɗe ɗeen fuu kanko waɗi ɗe.
12 Gaɗol bone na nyiddinii yeeso kaananke,
sabo e dartaare laamu makko darniraa.
13 Kaananke na seyna ɗemngal goongalawal,
kaaloowo kujje dartiiɗe o yiɗi.
14 Tikkere kaananke na itta yonki,
de hakkilanteejo na feewna ɓernde makko.
15 Moƴƴere kaananke na nanndi e ƴuwoonde feewnoore,
mooso makko du na wadda jam.
16 Heɓude hakkillo ina ɓuri heɓude kaŋŋe,
suɓaade paamal du ina ɓuri cardi.
17 Laawol goongalaaɓe na sela bone,
deenɗo laawol mum hisan.
18 Mawnitaare ardii halkere,
manngu becce du ardii saamugol.
19 Leeƴinde hoorem, wonndu e talkaaɓe,
ina ɓuri hawtude e mawninkiniiɓe keɓal.
20 Jaɓuɗo waaju heɓan ko wooɗi,
kooliiɗo Joomiraaɗo, kam woni barkinaaɗo.
21 Jom hakkillo inndirte annduɗo,
jannde feewnde ɓuri faameede.
22 Caral lobbal laatanii joomum ildude nguurndam,
puuyɗo du puuyndam mum eelta ɗum.
23 Ɓernde jom hakkillo na dawrana hunnduko muuɗum,
ko o wi'ata du ina jaɓee.
24 Haalaaji peewɗi na nanndi e beɗi njuumndi,
iɗi mbeli e hononde, iɗi njokka ƴi'e.
25 Laawol na nanndana neɗɗo e kegitiingol,
jaka maayde woni timmoode maggol.
26 Rafo gollinta golloowo,
ko nyaametee harwinta mo.
27 Jaayɗo ina segilanoo bone,
haala muuɗum na wuli hono yiite.
28 Oonyiiɗo na fooɗa hamre,
nyo'oowo ina habdina yigiraaɓe.
29 Toonyotooɗo ina eyta banndum,
ina watta ɗum dow oonyiingol.
30 Maƴƴinoowo gite, ŋata toni,
segilanoo ko boni, waɗataana bone.
31 Ndananndi wo lefol teddeengal,
ingol tawee dow laawol ponnditiingol.
32 Munyal na ɓuri semmbe,
baawɗo hoore mum ina ɓuri jaaliiɗo huɓeere.
33 Cumnal waɗaama faa suɓoo,
de wo Joomiraaɗo, kam fodotoo ɗum fuu.