13
1 Ɓiɗɗo jom hakkillo na jaɓa eeltol baaba mum,de jalnortooɗo kaa jaɓataa feleede.
2 Ɗemngal neɗɗo lobbo na nyaamna ɗum ko weli,
de bonɗo kaa na suunee toonya.
3 Baawɗo hunnduko mum reenan yonki mum,
mo reenaay ko du, halkan ki.
4 No muuyɗe jaasuɗo mawniri fu, heɓataa faa'e,
de haaju tinniiɗo kaa, humtoto faa hiɓɓa.
5 Ponnditiiɗo na wanyi fewre,
de bonɗo kaa, na waɗa ko nyiddinii e ko semtinii.
6 Fonnditaare na reena dartiiɗo,
ammaa bone halkan bonɗo.
7 Woni adoowo hoore mum wo jom jawdi, de walaa faa'e,
woni du adoowo hoore mum wo talkaajo, de na jogii sanne.
8 Jawdi neɗɗo na waawi rimɗinde yonki mum,
de talkaajo kaa hillaaka e yanooɓe.
9 Hoodere fonnditiiɓe na yaynira seyo,
ammaa nde bonɓe kaa nyifete.
10 Mawnitaare walaa ko waddata sanaa rafi potal,
wo jaɓooɓe tindinoore kam'en ngoodi hakkillo.
11 Jawdi keɓilawaandi na hantoo law,
kawrondiroowo ndi seeɗa seeɗa ɓeydan ndi.
12 Yiɗa heɓaay, naawalla ɓernde,
tefa heɓa, lekki mbuurnoohi.
13 Jawuɗo tindinooje fooɗanan hoore mum halkere,
de teddinoowo ɗe kaa, barkinte.
14 Janngingol jom hakkillo na laatii ildude nguurndam,
ingol reena neɗɗo e tuugol maayde.
15 Caral lobbal na rima moƴƴere,
laawol jambotooɓe kaa, walaa burtorgol.
16 Jom caral fuu na gollira anndal,
de puuyɗo kaa, puuyndam tan ɓanginta.
17 Nelaaɗo bonɗo saaman nder bone,
de nelaaɗo koolniiɗo kaa, wo gaddoowo jam.
18 Talkaaku e semteende, woni ngeɗu mo jaɓataa feleede,
de jaɓoowo tindinoore kaa, teddinte.
19 Si ko ɓernde yiɗi heɓaama, iɗum weli,
puuyɗo kaa, na wanyi yoppude bone.
20 Jaadoowo e hakkilante laatoto hakkilante,
jaadoowo e puuyɗo du, yaran naawalla.
21 Bone jokkan waɗooɓe hakke,
de fonnditiiɓe kaa weltaare woni njobdi muɓɓen.
22 Gaɗoowo ko wooɗi accanan taaniraaɓe mum ndongu,
ammaa jawdi bonɗo resante dartiiɗo.
23 Gese talkaaɓe na ngaɗa nguurey sanne,
ammaa oonyooɓe goonga na teeta ɗe.
24 Wanyu ɓiya, cemtaa loosol,
yiɗu mo, eeltaa mo no haaniri.
25 Ponnditiiɗo nyaaman faa haara,
reedu bonɗo kaa, iidan rafo.