12
1 Jiɗɗo tindinoore yiɗi anndal,banyuɗo feloore kaa, na fuuyi.
2 Joomiraaɗo na moƴƴani gaɗoowo ko wooɗi,
de na hiitoo cegiltooɗo bone.
3 Bone tabintintaa fay gooto,
de dartiiɗo kaa, wo lekki ki ɗoofataako.
4 Debbo jom needi, wo kufune gorum,
ammaa gaɗoowo ko semtinii, na nyolna ƴi'e makko.
5 Miilooji fonnditiiɓe ina ndartii,
de gaɗoowo ko semtinii kaa, ɗi mum wo jammbi.
6 Haalaaji bonɓe, tuugol baroowol,
ɗi dartiiɓe kaa, na kisina ɗum'en.
7 Si bonɗo saami fu, jikke mum timmii,
de wuro ponnditiiɗo kaa, heddoto.
8 Jom caral kam heɓata manoore,
jom ɓernde oonyiinde du, yawaade.
9 Pamɗuɗo darja gooduɗo maccuɗo,
na ɓuri mawninkiniiɗo,
de walaa ko nyaama.
10 Ponnditiiɗo ina hakkilani dammuuli muuɗum,
ɓernde bonɗo kaa yurmataako fey.
11 Demoowo ngesa mum haaran,
jokkuɗo henndu wo puuyɗo.
12 Bonɗo na muuya jawdi mbujjaandi,
de ɗaɗi ponnditiiɓe kaa riman ko nafata.
13 Mbonka bonɗo saaman dow mum,
ponnditiiɗo kaa, hisan bone.
14 Kaaloowo lobbi heɓan ko wooɗi,
neɗɗo heɓataana ko juuɗe mum ngolli.
15 E jiiɗe puuyɗo laawol mum na fonnditii,
jom hakkillo kaa, na hettindoo tindinooje.
16 Puuyɗo na hollilawa tikkere mum,
jom anndal kaa, na sudda yennoore.
17 Kaaloowo goonga na seedoo ko fonnditii,
ammaa ceedotooɗo fewre, sanaa jamba.
18 Haala kaaliraaka fuunyaare na yuwa hono laɓi,
de ka jom hakkillo kaa na sawra.
19 Hunnduko goongalaaho nduumoto,
ammaa ko penoowo ɓooyataa fey.
20 Dabareeji bonɓe sanaa jamba,
waddooɓe jam ceyoto.
21 Bone fuu saamataa dow ponnditiiɗo,
de bonɓe kaa, kaaran ko boni.
22 Fewooɓe ina nyiddinii yeeso Joomiraaɗo,
imo welnana jogotooɓe amaana.
23 Caruɗo na suuɗa anndal mum,
ammaa puuyɗo na wanngina puuyndam mum.
24 Tinniiɗo e gollal laatoto dawroowo,
de jaasuɗo kaa, laatoto maccuɗo.
25 Kaɓɓu-ko'u ina teddina ɓernde,
haala moƴƴuka na seyna nde.
26 Ponnditiiɗo na holla yigoo mum ko dartii,
laawol bonɓe majjinan ɗum'en.
27 Jaayre dekataa fayannde,
wo tinnaade waddata keɓal korsungal.
28 Dow laawol fonnditaare nguurndam tawaa,
maayde walaa dow maggol fey.