14
1 Debbo jom hakkillo na nyiɓa suudu mum,ammaa debbo puuyɗo na sankita ndu.
2 Jaaroowo dartaare na hula Joomiraaɗo,
de jom alhaali oonyiiɗo kaa, na yawii mo.
3 Hunnduko puuyɗo fooɗanan ɗum loosol,
ko jom hakkillo du, reenan ɗum.
4 Si ga'i demooji ngalaa, akalawal wo laaɓungal,
ammaa tayri ɗuuɗundi na heɓoo to ɗi ngoni.
5 Seedeejo goongalaajo fenataa,
ceedantooɗo fewre kaa, na tuuta pene.
6 Hakkillo na tiiɗani jalnortooɗo,
anndal na hoyani jom paamal.
7 Woɗɗa laawol puuyɗo,
sabo a heɓataa paamal to makko.
8 Hakkillo caruɗo na holla ɗum to jeyi yahude,
de puuyndam puuyɗo kaa, majjinan ɗum.
9 Puuyɗo hillaaka e moƴƴinde luttal mum,
de wo hakkunde dartiiɓe yardaa-muye tawetee.
10 Ɓernde kam anndi mettorgal mum,
welwelo mayre du, goɗɗo waawaa meeɗude ɗum pay pay.
11 Suudu bonɗo sankitete,
ammaa hukum dartiiɗo kaa barkinte.
12 Laawol na nanndana neɗɗo e kegitiingol,
jaka maayde woni timmoode maggol.
13 Ɓernde ina metta fay nder jaleeɗe,
seyo du na waawi timmirde mettorgal.
14 Joppuɗo goonga haaran ko aawi,
gaɗoowo ko wooɗi du, haaran ko aawi.
15 Mo ƴoƴaa ina jaɓa ko wi'aa fuu,
de jom caral kaa, ina hakkilani laabi mum.
16 Jom hakkillo na hula bone, de woɗɗoo ɗum,
de puuyɗo kaa hillaaka, ina hoolii hoore mum.
17 Mo walaa munyal na waɗa puuyndam,
mo dabareeji bonɗi du wanyete.
18 Ngeɗu mo ƴoƴaa woni puuyndam,
de jom caral kaa, heɓan kufune anndal.
19 Bonɓe leeƴinkinto yeeso lobbuɓe,
ɓe kofoto dammbugal fonnditiiɓe,
20 Talkaajo, fay yaadiraaɓe mum na mbanyi ɗum,
de jom jawdi kaa, yigiraaɓe mum na keewi.
21 Jawuɗo goɗɗo waɗii hakke,
ammaa kilniiɗo talkaajo kaa wo barkinaaɗo.
22 Yalla segilantooɓe bone kalkataa naa?
Ammaa hinney e hoolaare ina ngonani segilantooɓe ko wooɗi.
23 Torra gollal ina wadda barke,
«Faa, faa» ina wadda talkaaku tan.
24 Kufune darja jom hakkillo woni jawdi mum,
mo puuyɗo du, puuyndam mum.
25 Ceedotooɗo goonga na hisina yonki,
poofoowo pene kaa, wo jambotooɗo.
26 Kuloowo Joomiraaɗo ina woodi hoolaare mawnde,
ɓiɓɓe muuɗum du keɓii to cuuɗoo.
27 Hulude Joomiraaɗo wo ildude nguurndam,
iɗum hisina neɗɗo e tuugol maayde.
28 Ɗuuɗal yimɓe, teddeengal kaananke,
pamɗal yimɓe, boɓɓagol makko.
29 Jom munyal ina woodi paamal manngal,
ammaa ɓernilawoowo na wanngina puuyndam mum.
30 Ɓernde fukkiinde ina sellina ɓanndu,
ammaa kiram kaa na nyolna ƴi'e.
31 Tiinnanɗo talkaajo felii Taguɗo ɗum,
de jurmiiɗo mo kaa, teddinii Taguɗo mo.
32 Bonɗo saaman saabe bonde mum,
ponnditiiɗo kaa heɓan suuɗorde, fay si maayi.
33 Hakkillo ina woni ley ɓernde jom caral,
ammaa ngo tawataake ley ɓerɗe fuuyɓe.
34 Fonnditaare na mawnina leydi,
de hakke kaa wo semteende lenyi fuu.
35 Golloowo jom hakkillo heɓan hinney kaananke,
de gaɗoowo ko semtinii kaa, yi'an tikkere makko.