No kaananke hisiniri Alhuudiyankooɓe
8
1 Nyalaande ndeen pay, kaananke Jerjes hokki deekum Ester ko Haman, ganyo Alhuudiyankooɓe oon jeynoo fuu. Mordakay du, yottii yeeso kaananke nyannde ndeen sabo Ester haalanii mo ko woni hakkunde muuɗum e Mordakay oon. 2 Kaananke Jerjes hooƴi hootonnde honndu nde hokkunoo Haman ndeen, de ɓorni nde e honndu Mordakay. Ester du, halfini mo jawdi suudu Haman fuu.3 Katin, Ester hofii ɗakkol koyɗe kaananke, ina haalda e muuɗum, ina woya, ina ŋaaro ɗum fiirta anniya Haman Agaagiyanke dow halkere Alhuudiyankooɓe ndeen. 4 Kaananke ɓantani Ester sawru kaŋŋe, ndeen Ester ummii, darii yeeso makko, 5 wi'i:
— Si nii kaananke yardake, si miin Ester mi keɓuɗo hinney to muuɗum, si ɗum na fotani kaananke fu, waɗa ɓataakiiji mbinndee de nelde leyɗe laamu muuɗum to Haman nelduno ɓataakiiji dow halkugol Alhuudiyankooɓe fuu. Kaananke fiirta anniya Haman ɓii Hammedata Agaagiyanke bonɗo mo anniyino oon. 6 Noy mbaawirmi munyirande halkere hono nde saama dow lenyol am? Noy mbaawirmi daraade miɗo yi'a fiɗɗeede suudu baaba am?
7 Kaananke Jerjes jaabii deekum Ester e sakiike mum Mordakay wi'i ɗum'en:
— Kettinee, mi waɗii Haman jorfitaama saabe imo fodinoo ittude yonkiiji Alhuudiyankooɓe fuu. Wooɗi du, mi waɗii jawdi makko fuu laatake dongu maaɗa aan Ester. 8 Ndelle joonin mi hokkii on laawol mbinndanon ko'e mooɗon e innde am, ko kaajaɗon dow Alhuudiyankooɓe fuu. Ndeen maandiniron ɗum e hootonnde honndu am sabo ko winndanoo de maandiniraa innde am fuu, fay gooto waawaa fiirtude ɗum. 9 Wakkati oon pay, winndanooɓe kaananke nelanaa. Nyannde noogay e tati lewru tataɓurdu, ɗum woni lewru Siwan, ɓataakiiji ndiin mbinndaa hono no Mordakay yamiri mbinndiree noon. Ɗi neldaa Alhuudiyankooɓe e hooreeɓe leyɗe e goforneere'en e tinndinooɓe jooɗiiɓe ley leyɗe feere feere 127 gilla leydi Indiya faa yotti Etiopiya. Ɗi mbinndiraa siiji mbinndi leyɗe fuu e ɗemle lenyi fuu, Alhuudiyankooɓe du, e sifa binndi muɓɓen e ɗemle muɓɓen. 10 Mordakay waɗi ɓataakiiji ɗiin mbinndaa e innde kaananke de maandiniraa e hootonnde honndu muuɗum. Caggal ɗuum, yimɓe gollooɓe bangal yaarude kabaaruuji, waɗɗotooɓe pucci karwuɗi maranaaɗi laamordu njaari ɓataakiiji ɗiin nokku fuu to ɗi kaani yaareede.
11 Inan ko winndaa ley ɓataakiiji ɗiin:
Kaananke hokki Alhuudiyankooɓe tawaaɓe ley galluuje feere feere fuu laawol kawrita de ndaranoo yonkiiji muɓɓen, kalka, mbara, timmina yimɓe tiigiiɓe kaɓitirɗe, ummaniiɓe ɗum'en fuu. Iɓe mbaawi warude fay rewɓe muɓɓen e sukaaɓe muɓɓen. Wooɗi du, ɓe njeyta jawdi muɓɓen. 12 Nyalaande wootere, ɗum woni nyannde sappo e tati lewru sappo e ɗiɗaɓurdu, lewru Adar, yamiroore kaananke ndeen tilsinaa goyneede nder leyɗe ɗe laami dow muɓɓen fuu.
13 Hooreeɓe leyɗe anndina yimɓe fuu yamiroore winndaande ley ɓataakiiji ɗiin faa Alhuudiyankooɓe keɓa cegilano nyannde majjum de njoɓto wayɓe muɓɓen. 14 Nde kaananke hokkunoo ɓe laawol fu, kabaaru oon gooyna ley huɓeere laamorde Suus mawnde, yaarooɓe ɓataakiiji ɓeen du, ndillidi e haraare faa njaara ɗi leyɗe feere feere. 15 Wakkati oon, Mordakay wurtii ley laamordu na ɓornii kaddule kaanankooɓe daneeje e bulabulaaje e forgo nyootiraango leppi ɗaatuɗi daneeji e leppi bojjitooji, kufune kaŋŋe mawɗo na hippi dow hoore muuɗum. Galluure Suus fuu wurtodii e seyo manngo e kelle e kilinaali. 16 Nyalaande ndeen laatanii Alhuudiyankooɓe seyo manngo e welwelo e teddeengal. 17 Leyɗe e kuɓeeje to kabaaru oon yotti fuu, Alhuudiyankooɓe na ceyo sanne, na ngaɗa weltaare e hiirooji feere feere. Yimɓe lenyi keewɗi mbiiti wo Alhuudiyankooɓe saabe kulol manngol ngol kulata ɗum'en.