No Haman saamiri
7
1-2 Kaananke e Haman ngardi weltaare Ester ɗiɗaɓerde ndeen. Wakkati ɓe njarannoo cabijam, kaananke ƴami Ester katin wi'i:— Ɗume woni ŋaarnde maaɗa, Ester? Miɗo yardi hokkude ma huunde fuu ko kaajaɗaa. Fay si wo ɗum feccere laamu am, a heɓan ɗum.
3 Ndeen Ester jaabii mo wi'i:
— Si nii kaananke yardake, si miin mi keɓɗo hinney yeeso muuɗum, si ɗum na fotani mo fuu, mi wuura woni ko kaajaami; lenyol am hisa woni ŋaarnde am. 4 Miin e lenyol am min connaama faa min kalkee, min mbaree, min timminee. Si nii wo min connirano hono maccuɓe fu, mi deƴƴintono sabo ɗuum hewtaay mi tampina kaananke.
5 Ndeen kaananke ƴami Ester wi'i:
— Moy woni oon? Toy cuusuɗo waɗude ɗum oon woni?
6 Ester jaabii wi'i:
— Ganyo kabdoo e amin oon, wo Haman bonɗo o!
Kulol manngol nanngi Haman yeeso kaananke e deekum. 7 Kaananke ummodii e mettorgal ɓernde manngal, dilli weltaare ɗoon, yehi ley sardiŋe laamordu. Haman du, heddi ina ŋaaro Ester sawranoo ɗum faa yonki muuɗum hisa maayde sabo o faami kaananke anniyake warude mo. 8 Wakkati kaananke Jerjes yeccotono weltaare ɗoon, tawi Haman na hippi dow jooɗorgal Ester. Ndeen kaananke feeki wi'i:
— Ndelle Haman na anniyii nanngude deekam, miɗo tawa ley laamordu am ɗo na?
Kaananke timminaay haala kan de gollooɓe muuɗum njottii cuddi yeeso Haman. 9 Harabona, gooto e gollooɓe kaananke wi'i:
— Haman moƴƴinaniino Mordakay kisinɗo kaananke maayde oon leggal faa njorfitoree. Leggal ngaal na woni ley suudu makko. Tooweefi maggal, wo piyanɗe 50. Kaananke jaabii wi'i:
— O jorfitore ngal!
10 Noon Haman jorfitoraa dow leggal ngal moƴƴinanno Mordakay ngaal. Ɗum feewtini ɓernde kaananke.