No wayɓe Alhuudiyankooɓe kalkiraa
9
1 Nyalaande sappo e tataɓerde lewru sappo e ɗiɗaɓurdu (lewru Adar) ndeen yottii. Tawi nyalaande ndeen woni nde wayɓe Alhuudiyankooɓe podinoo heɓude baawɗe dow muɓɓen fodde no Haman yamirnoo e innde kaananke. Ammaa aadi oon waylitake de Alhuudiyankooɓe keɓi baawɗe dow wayɓe muɓɓen. 2 Alhuudiyankooɓe fuu na kawrita nokku gooto ley galluuje muɓɓen nder leyɗe laamu Jerjes fuu, faa kabda e filotooɓe waɗude ɗum'en ko boni. Walaa fuu bawɗo daraade yeeso maɓɓe saabe kulol manngol ngol lenyi keddiiɗi fuu kulata ɓe. 3 Ardiiɓe leyɗe e goforneere'en e gollidooɓe e howruuɓe kaananke fuu na mballita Alhuudiyankooɓe saabe iɓe kula Mordakay sanne. 4 Mordakay laatii neɗɗo teddinaaɗo sanne ley laamordu kaananke Jerjes. Kabaaru teddeengal makko sankiti e leyɗe fuu, wooɗi manngu innde makko na ɓeydoo weeti fu. 5 Alhuudiyankooɓe coppiri wayɓe muɓɓen kaafaaje, mbari ɗum'en, kalki ɓe, ngaɗi ɓe ko kaajaa. 6 Ley piilol laamordu huɓeere Suus ɗon tan, Alhuudiyankooɓe mbari, kalki worɓe 500, 7-10 tawti ɓiɓɓe Haman (ɓii Hammedata ganyo Alhuudiyankooɓe) sappo. Ɗum woni Parsandata e Dalfon e Aspata e Poorat e Adaliya e Aridata e Parmasta e Arisay e Ariday e Wayjaata. Ammaa ɓe adaay jawdi muɓɓen. 11 Nyannde majjum kaananke haalana limoore yimɓe ley piilol laamordu huɓeere Suus ɓe Alhuudiyankooɓe mbari. 12 Ndeen kaananke wi'i deekum Ester:— Ley piilol laamordu huɓeere Suus ɗo tan, Alhuudiyankooɓe mbarii yimɓe 500 tawti ɓiɓɓe Haman 10. Yimɓe foto tawetee ɓe mbari ley leyɗe laamu am goɗɗe? Ammaa fay e noon, si nii a ŋaarake kam goɗɗum feere katin, mi hokkete, mi waɗante ko muuyɗaa fuu.
13 Ester jaabii wi'i:
— Si nii kaananke yardake, jaango katin Alhuudiyankooɓe tawaaɓe ley huɓeere Suus fuu ngaɗa hono noon fodde ko winndaa ley ɓataakiiji ɗiin; ɓiɓɓe Haman maayɓe ɓeen du, ɓilee.
14 Kaananke waɗi yamiroore ndeen gooyna ley huɓeere Suus ɗon, ɓiɓɓe Haman du, ɓilaa. 15 Alhuudiyankooɓe huɓeere Suus kawriti katin ley nyalaande sappo e nayaɓerde lewru Adar, ɓe mbari worɓe 300 ammaa ɓe adaay faa'e e jawdi muɓɓen. 16 Alhuudiyankooɓe galluuje keddiiɗe du, kawriti ndaranii yonkiiji muɓɓen, mbari wayɓe muɓɓen 75 000 faa keɓa njooɗoo e jam, ammaa ɓe adaay fay huunde e jawdi muɓɓen. 17 Ɗum waɗii nyannde 13 lewru Adar. Nyannde 14 lewru nduun, ɓe powtinii de ɓe ngaɗi weltaare mawnde.
18 Alhuudiyankooɓe Suus du, mbariri wayɓe muɓɓen balɗe ɗiɗi (nyalaande 13 e nde 14) de powtinii. Ɓe ngaɗi weltaare maɓɓe mawnde nyannde sappo e joy lewru Adar. 19 Ɗum hollata ko saabi de Alhuudiyankooɓe gure ladde e galluuje pamare na kiira nder seyo manngo e hokkondirgol dokke nyannde sappo e nay lewru Adar.
No hiiro Purim tabintiniraa
20 Mordakay winndi ko waɗi fuu de neldi ɓataakiiji ɗiin Alhuudiyankooɓe jooɗiiɓe leyɗe ɓattiiɗe e boɗɗuɗe ɗe Jerjes laami dow muɓɓen fuu. 21 O wi'i ɓe, ɓe ngaɗa weltaare mawnde hitaande fuu nyannde sappo e nay e sappo e joy lewru Adar. 22 Saabe balɗe ɗeen Alhuudiyankooɓe keɓunoo baawɗe dow wayɓe muɓɓen. Ley lewru nduun, suno maɓɓe waylitii seyo, mettorgal maɓɓe du, waylitii weltaare mawnde. Iɓe ngaɗa hiirooji hitaande fuu wakkati lewru nduun, iɓe ceyoo, iɓe kokkondira dokke e nyaamdu, iɓe mballita talkaaɓe saabe ɓe keɓii jooɗaade e jam hakkunde wayɓe maɓɓe.
23 Alhuudiyankooɓe njaɓi ko Mordakay winndi, ɓe ngaɗi weltaare ndeen hitaande go'aɓerde de ɗum laati finaatawaa maɓɓe. 24-26 Nyalaaɗe ɗeen na inndiree Purim, ɗum woni cumnal, sabo Haman ɓii Hammedata Agaagiyanke, ganyo maɓɓe oon, waɗiino cumnal faa faama wakkati mo halkere maɓɓe ndeen haani waɗeede. Ammaa nde kabaaru oon yottinoo kaananke fu, anniya makko bonɗo oon yecci e makko. Noon kanko e ɓiɓɓe muuɗum fuu njorfitoraa.
Alhuudiyankooɓe njogiti ɓataaki Mordakay, ko winndaa ley makki e ko njiiri gite muɓɓen fuu. 27 Ɓe kunii tabintinde waɗugol weltaare ndeen e ko ɗowtata nde fuu finaatawaa maɓɓe, kamɓe e ɓiɓɓe maɓɓe, e taaniraaɓe maɓɓe e tokkuɓe diina Alhuudiyankooɓe. Ley hitaande fuu balɗe ɗiɗi ɗeen cuɓana waɗeede hiirooji ɗiin fodde ko Mordakay yamiri. 28 Nyalaaɗe Purim ɗeen na miccitee ley cuuɗi e leyɗe e galluuje ley jamaanuuji fuu. Alhuudiyankooɓe accitataa waɗude hiirooji Purim ɗiin faa abada.
29 Ester ɓii Abihayil dey kaananke e Mordakay Alhuudiyanke mbinnditi ɓataakiiji dow hiiro Purim ngon faa ngo tabintinee. 30 Ɓe neldi Alhuudiyankooɓe leyɗe laamu Jerjes 127 fuu ɓataakiiji burwaaga jam e hoolaare. 31 Ley ɓataakiiji ɗiin na winndaa ko Ester e Mordakay njamiri dow nyalaaɗe Purim ɗeen e dow suumayeere e boytaali. 32 Jamirooje Ester ɗeen ɓeydi tabintingol hiirooji Purim ɗiin de ɗum winndaa nder dewtere kabaaruuji.