No wayɓe Nehemiya pilorii darnude gollal kokuwol ngal
6
1 Sanbalat e Tobiya e Gesem Laarabuujo e wayɓe amin heddiiɓe nani mi timminii nyiɓitagol kokuwol piiliingol huɓeere Urusaliima ngool. Ɓe nani nokkuuje boɓɓinooɗe fuu moƴƴintinaama, fay ko tawaa mi wattaay ombooɗe dammbuɗe maggol tafon. 2 Wakkati oon Sanbalat e Gesem neli mbi'aami:— War kawren ley Kefiira, ley naɗɗol Oono.
— Miɗo woodi gollal manngal, ndelle mi waawaa warude to mooɗon, ko saabi mi wara toon, de gollal ngaal ndaro?
4 Ɓe nelani kam faa waɗi kile nay, miin du, jaaboriimi ɓe hono no artorinoomi noon.
5 Sanbalat neli golloowo muuɗum joyaɓerde, o hokki ɗum ɓataaki, iki udditii faa neɗɗo fuu na waawi yi'ude ko winndaa ley makki. 6 Inan ko winndaa ley ɓataaki kiin:
Kabaaru yottake nokku fuu nder leyɗe, Gesem du seedake, wi'aama ko aan e Alhuudiyankooɓe heddiiɓe oɗon kaɓɓi dabare muurtude. Ɗuum waɗi oɗon nyiɓitoo kokuwol piiliingol huɓeere ngool. Katin du, min nanii aɗa yiɗi waɗude hoore maaɗa kaananke maɓɓe. 7 Wooɗi a yamirii annabaaɓe anndina huɓeere Urusaliima kabaaru maaɗa, mbi'a: «Na woodi kaananke ley leydi Yahuuda!» Sikke walaa kabaaru oon yottoto kaananke Artajerjes. Kanjum waɗi de miɗen yiɗi ngaraa kawren, kaalden dow majjum.
8 Ndeen nelumi to makko, mbiimi:
— Ko mbiiɗaa ɗuum wanaa goonga, wo ɗum fewre. Aan e hoore maa iimii ɗum ley ɓernde maaɗa.
9 Ɓe fuu, iɓe njiɗi hulɓinde min. Ɓe miilii si ɓe ngaɗii noon kulol nanngan min, de gollal ngaal daroo. Ngaɗumi du'aare, mbiimi:
— Yaa Laamɗo, semmbinɗin juuɗe am.
10 Nyannde gomma njahumi to Semaya ɓii Delaaya taan Mahiitabel, ombitiiɗo ley suudu muuɗum. O wi'i kam:
— En njaha Suudu Dewal Laamɗo, naaten, ommben dammbuɗe mayru, cuuɗooɗen toon ngam iɓe ngara faa ɓe mbare. Ɓe ngaran jemma o faa ɓe itta yonki maaɗa.
11 Ndeen njaabiimi o mbiimi:
— Miin, mi wanaa neɗɗo doggoowo suuɗoo. Yalla neɗɗo hono am, na waawi naatude ley Suudu Dewal Joomiraaɗo de wuura na? Mi naatataa toon!
12 Katin mi faami Laamɗo nelaay mo. Fay ko o waɗi annabaaku dow am, mi faami wo Tobiya e Sanbalat kokki mo ceede e cuccukka faa o hiila kam. 13 Ɓe njoɓu mo ceede faa o hulɓina kam, mi waɗa ko ɓe mbi'i, de ɗum laatanoo kam hakke. Ndeen ɓe keɓa no ɓe mbonnira innde am, ɓe ngaɗa mi ndaardee mbonkotooɗo.
14 Yaa Laamɗo am, miccitoɗaa ko Tobiya e Sanbalat ngaɗi. Miccitoɗaa No'aadiya, annabaajo debbo e annabaaɓe heddiiɓe filiiɓe hulɓinde kam.
Timmingol gollal nyiɓitaade
15 Nyannde 25 lewru Eluula, gollal nyiɓitaade kokuwol ngaal timminaa. Ngal golliraa balɗe 52 de ngal timmi. 16 Nde wayɓe amin e lenyi jooɗiiɗi ɗakkol amin nannoo ɗum fu, ɓe kuli sanne. Ɓalli maɓɓe mbaati ngam ɓe paamii gollal ngaal wo e ballal Laamɗo amin yottiniraa. 17 Ley balɗe 52 ɗeen, mawɓe Yahuuda neldi Tobiya ɓataakiiji ɗuuɗɗi. Kanko du, o jabori ɓe ɓataakiiji. 18 Yimɓe heewɓe ley Yahuuda kunanii Tobiya, mbi'i njokkan mo ngam o esoo Sekaniya, taan Aarah, neɗɗo Yahuuda. Katin du, Yahuuhanan ɓii Tobiya ɓaŋi ɓii Meesullam, taan Barakiya. 19 Yimɓe mani Tobiya yeeso am saabe ko waɗani ɗum'en. Ɓe kaalani mo ko mbiimi fuu. Ndeen o neldi kam ɓataakiiji faa o hulɓina kam.