Timmoode laamu Yerobaam
— Umma, uddu hoore maaɗa taa fay gooto annditaa wo a deekam, de njaha wuro Silo. A tawan toon annabaajo bi'eteeɗo Ahiya. Wo kanko wi'i mi laatoo kaananke yimɓe ɓe. 3 Kooƴa buuruuje sappo e maasaaje seeɗa e jollooru njuumndi de njaha to makko, kanko hollete ɗume laatantoo suka o.
4 Dey Yerobaam waɗi ko wi'a ɗuum. O yehi to Ahiya, wuro Silo. Tawi Ahiya naywi sanne faa yi'ataa. 5 Ammaa Joomiraaɗo haaldiino mo wi'i:
— Dey Yerobaam waran faa ƴame kabaaru nyawu ɓiyum. Inan ko mbi'ata mo.
Nde debbo oon yottinoo fu, wattinkini wo goɗɗo. 6 Ammaa nde Ahiya nannoo sawtu koyɗe makko dammbugal suudu fu, wi'i:
— Dey Yerobaam, naatu. Ko waɗi de aɗa nanndinkinoo e goɗɗo? Miin mi nelaaɗo to maaɗa e kabaaru tiiɗuɗo haalude. 7 Inan ko mbi'oyta Yerobaam:
«Joomiraaɗo Laamɗo Israa'iila wi'i: Mi ɓantii ma hakkunde yimɓe, mi waɗii ma ardiiɗo yimɓe am Israa'iila. 8 Miin Joomiraaɗo teeti laamu Israa'iila e lenyol Daawda de hokki ma. Ammaa aan, a laataaki hono maccuɗo am Daawda ɗowtaniiɗo jamirooje am, jokkirɗo kam e ɓernde wootere, de waɗi ko fonnditii yeeso am oon. 9 Aan kaa, aɗa ɓuri artiiɓe maa fuu bonde. A yehi a waɗowi tooruuji tafiraaɗi jamɗe faa a tikkinii kam. A salake kam fey! 10 Saabe majjum mi waddan bonanda dow suudu maaɗa, mi halkan worɓe lenyol maaɗa aan Yerobaam, maccuɓe e rimɓe fuu. Mi halkan ƴuwdi maaɗa faa ndi hantoo hono no birgi wulirte faa timma ni. 11 Jeyaaɗo e lenyol Yerobaam si maayii ley galluure fu, dawaaɗi nyaamata ɗum, si maayii ley ladde du, pooli piirooji nyaamata ɗum. Noon Joomiraaɗo wi'i.»
12 Aan du, umma hootu wuro maa. Nde koyɗe maaɗa naatowi galluure ndeen fu, cukalel ma ngeel maayan. 13 Israa'iila fuu nyonotoo ngel de mooɓa ngel. Suudu Yerobaam fuu kangel tan heɓata mooɓeede ley saabeere sabo Joomiraaɗo Laamɗo Israa'iila tawi wo kangel tan jogii mbooɗirka. 14 Katin du, Joomiraaɗo ɓantanan hoore muuɗum kaananke dow Israa'iila kantoowo ƴuwdi Yerobaam. Ɗum fuɗɗan hannden — ayyo, joonin pay! 15 Joomiraaɗo fiyan Israa'iilankooɓe, ɓe ndimmborto hono no huɗo daande maayo dimmborto ni. Joomiraaɗo ɗoofan ɓe e leydi lobbiri ndi hokkunoo maamiraaɓe maɓɓe, de sankita ɓe faa gaɗa maayo Efrat, sabo ɓe tikkiniri ɗum ko ɓe ngaɗi tooruuji bi'eteeɗi Asira ɗuum. 16 O yoppan Israa'iilankooɓe saabe hakkeeji ɗi Yerobaam watti ɗum'en ɗiin.
17 Dey Yerobaam ummii dilli, hooti Tirisa. Nde o yottinoo o yaaɓi dammbugal suudu makko fu, suka oon maayi. 18 Israa'iilankooɓe fuu nyonii mo de cakiti mooɓi mo. Ɗum fuu ɗum hawri e haala ka Joomiraaɗo haaliri e hunnduko annabi Ahiya kaan.
19 Kabaaru Yerobaam keddiiɗo, woldeeji ɗi waɗi e no laamorii fuu, na winndaa ley dewtere Kabaaruuji Kaanankooɓe Israa'iila. 20 Yerobaam laamorii duuɓi 22 de maayi, hawritowi e maamiraaɓe muuɗum. Ndeen Ɓiyiiko Nadab loomti mo laamii.
No Rehabaam laamorii dow Yahuuda
(2 Kabaaruuji 12:1-16)
21 Nde Rehabaam ɓii Suleymaana laamotono Yahuuda ndeen na wondi duuɓi 41. O laamorii duuɓi 17 ley Urusaliima, galluure nde Joomiraaɗo suɓii ley Israa'iila faa tabintina Innde ndeen. Inna Rehabaam wo Na'ama Amoninkeejo. 22 Yimɓe Yahuuda ngaɗi ko boni yeeso Joomiraaɗo. Ɓe umminiri tikkere muuɗum hakkeeji maɓɓe bonɗi faa ɓuri ɗi maamiraaɓe maɓɓe ngaɗunoo. 23 Saabe nyiɓande ko'e maɓɓe cuuɗi tooruuji e bimmbeeje kaaƴe e kujje diina Asira dow baamle toowɗe e ley leɗɗe bilitinɗe fuu. 24 Ley leydi ndiin, na woodi du worɓe e rewɓe laatiiɓe woykuruuɓe saabe tooruuji muɓɓen. Iɓe nyemmita golleeji lenyi nyiddiniiɗi ɗi Joomiraaɗo riiwnoo yeeso Israa'iila.
25 Ley hitaande joyaɓerde laamu Rehabaam, Siisak kaananke Misira wari haɓdi e Urusaliima. 26 O hooƴi jawdi ndesaanoondi ley Suudu Dewal Joomiraaɗo e ley suudu laamordu fuu. O hooƴi du bawaaɗe kaŋŋe ɗe Suleymaana waɗuno ɗeen fuu. 27 Kaananke Rehabaam waɗi bawaaɗe jamɗe boɗeeje, halfini ɗe hooreeɓe reenooɓe dammbuɗe suudu muuɗum. 28 Nde o yahata Suudu Dewal Mawndu fu, reenooɓe ɓeen kooƴa bawaaɗe ɗeen de caggal ɗuum, ɓe njeccina ɗe suudu reenooɓe toon.
29 Kabaaru Rehabaam keddiiɗo e ko waɗi fuu, na winndaa ley dewtere Kabaaruuji Nyalaaɗe Kaanankooɓe Yahuuda. 30 Wolde na wonnoo hakkunde Rehabaam e Yerobaam wakkati fuu. 31 Ndeen Rehabaam maayi, hawritowi e maamiraaɓe muuɗum. Ɓe mooɓi mo to maamiraaɓe makko ley Galluure Daawda. Inniiko wo Na'ama Amoninkeejo. Ɓiyiiko Abiiyam loomti mo laamii.