No Joomiraaɗo neldiri kuddi dow hirsirde Baytila.
13
1 Wakkati oon, nelaaɗo Laamɗo ƴuuri Yahuuda wari wuro Baytila sabo konngol Joomiraaɗo warii e makko. O yottii toon wakkati Yerobaam wulata ure dow hirsirde ndeen. 2 O feekorani hirsirde ndeen e haala Joomiraaɗo, o wi'i:— Hirsirde, hirsirde! Inan ko Joomiraaɗo wi'i: «Ɓiɗɗo gorko rimete e lenyol Daawda, o inndirte Yosiya. Dow maaɗa o hirsata almaami'en wulooɓe ure nder cuuɗi tooruuji, dow maaɗa du o wulata ƴi'e tagaaɓe.»
3 Nelaaɗo Laamɗo oon hokki maande nyannde majjum, ina wi'a:
— Inan maande holloore wo Joomiraaɗo haali. Hirsirde nde seekoto, ndoondi mayre du sankito.
4 Kaananke Yerobaam nani haala ka nelaaɗo Laamɗo oon haali ley feekaango dow hirsirde Baytila kaan. Ndeen o foorti junngo makko dow hirsirde ɗoon, o feekii o wi'i: «Nanngee neɗɗo o!» Wakkati oon pay, junngo makko foortiingo ngoon waati, o waawaay yeccinde ngo. 5 Katin du, hirsirde ndeen seekii, ndoondi mayre fuu sankitii hono no nelaaɗo Laamɗo oon wi'iri ley yamiroore Joomiraaɗo noon. 6 Kaananke wi'i mo:
— Ŋaaranam yurmeende Joomiraaɗo, Laamɗo maaɗa, ndu'anoɗaa kam faa junngo am warta no worrunoo.
Nelaaɗo Laamɗo oon du'i Joomiraaɗo de junngo makko warti no worrunoo. 7 Kaananke haaldi e makko, wi'i:
— En njahada ley suudu am, nyaama de mi hokke dokkal.
8 Ammaa o jaabii kaananke oon, o wi'i:
— Fay si kokkuɗaa kam feccere suudu maaɗa, en njahadataa, mi nyaamataa, mi yarataa. 9 Sabo inan ko Joomiraaɗo yamiri wi'i: «Taa nyaama, taa njara, wooɗi du, taa njeccoroɗaa laawol ngol ngardunoɗaa.»
10 Ndelle o hooƴi laawol gonngol, o yeccoraaki ngol o wardunoo ngool.
11 Tawi annabaajo nayeejo na jooɗii ley wuro Baytila. Ɓiɓɓe muuɗum worɓe ngari kaalani ɗum ko nelaaɗo Laamɗo oon waɗi nyannde ndeen ley Baytila. Ɓe kumpiti ɗum haalaaji ɗi o haaldi e kaananke. 12 Baabiiɓe ƴami ɓe laawol ngole o dilliri. Ɓiɓɓe makko kolli mo laawol ngol nelaaɗo Laamɗo oon hooƴi. 13 Baabiiwo oon wi'i ɓe kirkinanoo ɗum araawa. Ɓe kirkinanii mo araawa ngaan, o waɗɗii nga, 14 o tewniti nelaaɗo Laamɗo oon, o tawi ɗum ina jooɗii ley lekki makki. O wi'i ɗum:
— Yalla aan woni nelaaɗo Laamɗo ƴuuruɗo Yahuuda oon naa?
O jaabii o wi'i:
— Wo miin pay.
15 Ndeen o wi'i mo:
— En koota wuro am, nyaamen.
16 Ammaa nelaaɗo Laamɗo oon jaabii o wi'i:
— Mi waawaa yeccaade, mi waawaa yaadude e maaɗa, mi nyaamdata e maaɗa, mi yardata e maaɗa ɗo. 17 Sabo konngol Joomiraaɗo wi'i kam taa mi nyaama, taa mi yara, wooɗi du, taa mi yeccoroo laawol ngol ngardunoomi.
18 Annabaajo oon jaabii mo wi'i:
— Miin du wo mi annabaajo hono maaɗa. Maleyka Joomiraaɗo haaldi e am konngol Joomiraaɗo, wi'i mi hoodda e maaɗa wuro am faa nyaama wooɗi njaraa.
Ammaa wo o fenu. 19 Ndelle nelaaɗo Laamɗo oon yeccodii e annabaajo oon wuro muuɗum, o nyaami, o yari.
20 Nde ɓe njooɗinoo iɓe nyaama fu, konngol Joomiraaɗo wari e annabaajo oon. 21 O feekii o wi'i nelaaɗo Laamɗo ƴuuruɗo Yahuuda oon:
— Inan ko Joomiraaɗo wi'i: «A ɗowtanaaki konngol Joomiraaɗo, a jokkaay yamiroore nde Joomiraaɗo, Laamɗo maaɗa yamiri ma ndeen, 22 a yeccake, a nyaami a yari ley nokkuure nde o yamiri ma taa nyaama, taa njaraa. Saabe ɗuum, ɓanndu maa mooɓataake ley caabeeje maamiraaɓe maaɗa.»
23 Caggal ko o nyaami de o yari ɗuum, annabaajo oon hirkinanii mo araawa. 24 Nde o wonnoo na o yaha dow laawol fu, rawaandu ladde hawri e makko, wari mo. Ɓanndu makko na waalii dow laawol, araawa ngaan e rawaandu ladde nduun du na ndarii ɗakkol mayru. 25 Yimɓe faltotooɓe nji'i ɓanndu nduun na waalii dow laawol, nji'i rawaandu ladde du ɗakkol mayru. Ɓe ngari ɓe kumpiti ɗum ley galluure ɗo annabaajo oon jooɗii ɗoon.
26 Nde annabaajo oon nannoo kabaaru majjum fu, wi'i:
— Ɗum woni nelaaɗo Laamɗo mo ɗowtanaaki konngol Joomiraaɗo. Ndelle Joomiraaɗo hokkii mo rawaandu ladde, faa seeka mo, wara mo. Ɗum fuu ɗum laatorake hono no Joomiraaɗo haaldirno e makko noon.
27 O wi'i ɓiɓɓe makko kirkinana mo araawa. Ɓe kirkini nga. 28 O yehi o tawoy ɓanndu nduun na waalii dow laawol, o tawi araawa ngaan e rawaandu ladde nduun na ndarii ɗakkol makko. De rawaandu ladde nduun nyaamaay mo, seekaay araawa ngaan du. 29 Annabaajo oon hooƴi ɓanndu makko, yowi dow araawa, yeccini mo ley galluure faa woya mo de mooɓa mo. 30 O watti mo ley saabeere makko. Yimɓe mboyi mo, na mbi'a: «Wayyoo, sakiike amin!»
31 Nde o mooɓunoo mo fu, o haaldi e ɓiɓɓe makko o wi'i:
— Nde maayumi fu, mooɓon kam ley saabeere ɗo nelaaɗo Laamɗo o mooɓaa ɗo. Ngatton ƴi'e am ɗakkol ƴi'e makko. 32 Sabo tannyoron, konngol ngol o haali ley yamiroore Joomiraaɗo dow hirsirde Baytila e dow cuuɗi tooruuji gonɗi ley gure Samariya ngool tabitan.
33 Ammaa e noon fuu, Yerobaam wattitaay laawol muuɗum bonngol ngool. Imo heddi imo suɓoo yimɓe hakkunde jamaare imo waɗa ɗum'en almaami'en cuuɗi tooruuji. Kaajaaɗo laataade almaami fu, imo hokka ɗum baawɗe waɗude almamaaku. 34 Nii lenyol Yerobaam waɗiri hakke. Ɗum saabii de lenyol mum halkaa, fiɗɗaa ley adunaaru.