No Annabi Natan feliri Daawda
12
1 Joomiraaɗo neli Natan to Daawda. Nde o warnoo to Daawda ndeen, o wi'i:— Ina woodunoo ley wuro gomma worɓe ɗiɗo. Gooto wo jom jawdi, gooto du wo talkaajo. 2 Jom jawdi oon ina woodi baali e na'i faa heewi. 3 Ammaa talkaajo oon fay huunde walaa si wanaa ɓinngel baalel bortel ngel o soodi. Imo nyaamna ngel, ngel mawnidi e sukaaɓe makko ley wuro makko. Imo nyaamna ngel nyaamdu makko, imo yarna ngel e jardugal makko, ingel ɗaanoo e ley juuɗe makko. Ngel laatii hono ɓinngel makko dewel. 4 Nyannde gomma jom jawdi oon heɓi beero. Ammaa jom jawdi oon muuyaay nanngude fay ngootu hakkunde baali mum naa na'i mum faa hirsana beero oon. O nanngi baalel talkaajo oon de o hirsani ngel beero makko oon.
5 Daawda tikkani gorko oon tikkere mawnde, wi'i Natan:
— Mi hunorake Joomiraaɗo buurɗo, gorko oon na jeyi wareede! 6 Katin du, o yoɓtan ɓinngel baalel ngeel kile nay saabe ko o waɗi ɗuum e saabe o walaa yurmeende.
7 Ndeen Natan wi'i Daawda:
— Aan woni gorko oon! Inan ko Joomiraaɗo Laamɗo Israa'iila wi'i, «Mi joorii hoore maa nebbam faa laatoɗaa kaananke Israa'iila, mi dannii ma e junngo Sawulu. 8 Mi hokkii ma suudu jooma, mi wattii deekiraaɓe jooma du e ley juuɗe maaɗa. Mi hokkii ma laamu dow Israa'iila e Yahuuda fuu. Si ɗum heƴaayno du, mi hokketeno ko ɓuri ɗum. 9 Ko waɗi njawuɗaa haala am, miin Joomiraaɗo, de ngaɗuɗaa ko boni yeeso muuɗum? A fiyirii Uriya Hittiyankeejo oon e kaafaahi. Ndeen du, a hooƴii deekum faa laatoo deeka. A waɗii faa Amoninkooɓe mbardi Uriya kaafaahi. 10 Joonin le, saabe ko njawuɗaa kam de kooƴuɗaa dee Uriya Hittiyankeejo oon faa o laatoo deeka ɗuum, abada kaafaahi dillataa suudu maaɗa.»
11 Inan ko Joomiraaɗo wi'i, «Ndaar, mi umminan baasi e dow maaɗa ƴuuruɗo e lenyol maaɗa. Mi hooƴan deekiraaɓe maaɗa e gite maaɗa, mi hokka ɓe gondo maaɗa faa fukkodoo e maɓɓe nyalooma. 12 Aan, a waɗii ɗum e ley cuncukka, de miin, mi waɗan ɗum nyalooma yeeso yimɓe Israa'iila fuu.»
13 Ndeen Daawda wi'i Natan:
— Mi waɗii hakke to Joomiraaɗo.
Natan jaabii, wi'i:
— Joomiraaɗo ittii hakke maaɗa, a maayataa. 14 Ammaa e ley ko ngaɗuɗaa ɗuum, a hokkii wayɓe Joomiraaɗo laawol faa ɓe mbonkoo ɗum. Saabe majjum, suka mo ndimanaɗaa oon du maayan.
15 Wooɗi, caggal ɗuum Natan hooti wuro muuɗum.
Joomiraaɗo nyawni cukalel ngel dee Uriya rimani Daawda ngeel faa ngel ɓadii maayde. 16 Daawda nyaagake Laamɗo saabe cukalel ngeel, suumii, naati ley suudu, waalii e leydi. 17 Mawɓe ɓaade makko ngari ɗakkol makko faa ummina mo. De o jaɓaay, o salii nyaamdude e maɓɓe du.
18 Nyannde jeɗɗaɓerde ndeen cukalel ngeel maayi. Maccuɓe Daawda kuli hollude Daawda cukalel ngeel maayii. Ɓe mbi'i:
— Nde cukalel ngeel wuurnoo ndeen, en kaaldii e makko de o jaɓaay hettindanaade en. Noy mbaawruɗen hollude mo cukalel ngeel maayii? Hasii o naawnan hoore makko.
19 Daawda taykii maccuɓe muuɗum na cowndoo, o annditi suka oon maayii. O ƴami:
— Yalla suka oon maayii naa?
Ɓe njaabii, ɓe mbi'i:
— Ayyo, o maayii.
20 Ndeen Daawda ummii e leydi, lootii, wujii nebbam, wayliti kaddule mum. Ndeen o naati ley suudu Laamɗo, o sujidani ɗum. O hooti, o wi'i o hokkee nyaamdu, de o fuɗɗi nyaamude.
21 Maccuɓe makko mbi'i mo:
— Min paamaay no ngaɗataa nii. Wakkati cukalel ngeel wuurnoo ndeen, a suumake, a woyii ngel. Ammaa joonin ko ngel maayi, a ummake, aɗa nyaama.
22 Daawda jaabii, wi'i:
— Nde cukalel ngeel wuurnoo ndeen, mi suumake, mi woyii. Mi miilake, «Moy anndi, hasii Joomiraaɗo yurmoto kam faa cukalel ngeel wuura.» 23 Ammaa joonin ngel maayii. Ko waɗi mi suumoo? Yalla miɗo waawi wartirde ngel naa? Miin, mi yahan to maggel, de kangel kaa, ngel wartataa to am.
24 Ndeen Daawda yeewtinowi deekum Batseeba. O yehi to muuɗum, o naaddi e muuɗum. Caggal ɗuum, adi reedu, de rimi suka gorko. Daawda inndiri ɗum Suleymaana.
Joomiraaɗo na yiɗi ngel, 25 de nuli annabaajo Natan faa inndira ngel Yedidiya. Innde nde na fiirta «jiɗaaɗo Joomiraaɗo».
No Daawda teetiri ngalluure Rabba
26 Wooɗi, Yo'ap haɓi e wuro Rabba ngalluure Amoninkooɓe mawnde, de nanngi suudu kaananke reenaandu nduun. 27 Yo'ap nuli nulaaɓe to Daawda wi'i:
— Mi haɓii e Rabba, mi nanngii ngalluure nde diyeele. 28 Jonle hawrundur Israa'iila'en heddiiɓe ɓeen, piiloɗon ngalluure ndeen, nanngon nde. Si wanaa noon fu, mi nanngan nde miin e hoore am, de mi inndira nde innde am.
29 Ndelle Daawda hawrunduri yimɓe mum fuu, njehi ngalluure Rabba ndeen, kaɓi e mayre, nanngi nde. 30 O ittii kufune kaananke maɓɓe e dow hoore muuɗum. Teddeefi kufune oon wo kilooji kaŋŋe capanɗe tati e nay. Kaaƴe tiiɗɗe coggu na ngoni e makka. Nde yowaa dow hoore Daawda. O hooƴi gineeji e ngalluure ndeen faa heewi. 31 O wurtini yimɓe tawaaɓe toon faa ɓe ngollana mo, e kuusirɗe leɗɗe e pingaasia e jammbe. Noon o waɗi du faa ɓe ngolla fiyugol pereeje. Nii Daawda waɗiri e gure Amoninkooɓe fuu. Ndeen Daawda e sordaasiiɓe mum ngarti Urusaliima.