Fii no Yaaquuba Du'orani Ɓiɓɓe mun ɓen Sappoo e Ɗiɗo
49
1 Yaaquuba nodditi ɓiɓɓe mun ɓen, o wi'i ɓe: «Mooɓondiree, mi yeetoo on ko aroyta on heɓude e ɗee ɲalaaɗe aroyayɗe. 2 Ko onon yo ɓiɓɓe Yaaquuba, mottondiree, heɗoɗon, heɗee ben mon Isra'iila.3 «Ko an yo Ruubaynu afo an, doole an e mo mi dikkori aƴƴere cukankaaku an, ko a ɓurɗo e teddungal e doole: 4 Hiɗa ɲaaɗiri wa ndiyan. A heɓataa ɓural hande kadi, ɓay a ƴawii ka danki ben maa, a ƴawii, a tuuninii mbalndi an ndin.
5 Sim'uunu e Lewi kan ko neene-gootooɓe, kaafaaje maɓɓe ɗen ko aalaaji masinbinirɗi. 6 Wota mi tawe e fewjooje maɓɓe ɗen, wota mi tawde e mottondiral maɓɓe ngal, ko fii ɓe ittii wonkii e nder ɲaande maɓɓe, awa kadi ɓe taƴii codduli ga'i ɗin e nder fijindaaru maɓɓe ndun. 7 Yo kuddi wonan tikkere maɓɓe nden, ko fii hinde tiiɗi. Yo kuddi wonan monee maɓɓe on, ko fii himo hunƴi. Mi senditay ɓe e nder jurriya an on, min Yaaquuba, mi saakita ɓe e nder leydi Isra'iila ndin.
8 Ko an yo Yahuuda, ben-gootooɓe maa ɓen mantete, a faway jungo maa ngon e hoƴƴudu ayɓe maa, awa kadi ben-gootooɓe maa ɓen sujjante. 9 Ko an yo Yahuuda, ko a ngayuuri hecciri, hiɗa iwri waaɲugol mbaroodi, yo ɓiɗɗo an! Hiɗa helti koppi maa, waalori wa ngayuuri. Wa ngayuuri ndeyri, ko hombo dillinay-maa ɗon? 10 Labbooru laamu ndun iwataa e juuɗe Yahuuda, awa kadi tuggordu laamu ndun ko ka jurriya makko luttata, haa tuma mo ɗun wonanta on ari, on mo jamaaji ɗin fow ɗoftoytoo. 11 Ko ka delbol wiiɲu o humata mbabba makko mban, o huma ɓikkun mabba on ka salndu maggol. Ko njaram wiiɲu o wuppirta conci makko ɗin, ko ƴiiƴan ɓiɓɓe wiiɲu o wuppirta burumusu makko on. 12 Gite makko ɗen no ɓuri njaram wiiɲu wojjude, ɲiiƴe makko ɗen no ɓuri ɓiraaɗan rawnude.
13 Zabuluunu kaɲun hoɗoyay ka daande baharu, ka makko wona darorde laaɗe ndiyan, keerol makko ngol ko Siduuna haaɗata.
14 Yassaakara no yeɗɗiri wa mbabba, waalaymba hakkunde orɗe ɗiɗi baali. 15 Nde o ndaaroyi, o tawi fowtorde makko nden no moƴƴi, awa kadi leydi ndin no wooɗi, o sornoyay walbo makko ngon ka ley dongal, o wonoya maccuɗo kurketeeɗo.
16 Daana kaɲun ɲaawoyay jamaa mun on, wano goɗɗo e bolondaaji Isra'iila ɗin. 17 Daana wa'oyay wa mboddi e hoore laawol, wa kuuraari e hoore ɗatal, soppayndi puccu e coddungol, ɗun wona sabu yanirgol jom maggu ɓaawo.
18 «Yaa an Joomiraaɗo, miɗo tanƴinor maa kisiyee!
19 Gaada kaɲun, radotooɓe radoyto mo, kono o raɗoo ɓe, o eppa nangude.
20 Asiira kaɲun, leydi makko ndin heeway nguureeji newiiɗi, ndi funtina dakammeeji lanɗo.
21 Naftali no wa'i wa jawre accitaande, rimaynde ɓikkoy fotukoy.
22 Yuusufu no wa'i wa bilitol moƴƴol, funtungol e binde ɓundu, ngol calɗi mun feƴƴitii tataaji. 23 Fampotooɓe laaɲe holli mo ngayngua, ɓe monanii mo, ɓe fampii mo. 24 Kono hay laaɲal makko ngal dillaali, juuɗe makko ɗen aƴƴani ngal e nder doole, sabu sookewo dolnungo Alla Jom Bawgal Yaaquuba on, e sabu Ngaynaako on, ɗun ko Fetere Isra'iila nden, 25 e sabu oo Alla ben maa, on wonɗo Ballo maa, e sabu oo Alla Jom Bawgal barkinirɗo ma barkiiji kammuuli ɗin ka dow, e barkiiji ɗan ndiyan wonɗan ka kattudi luggeendi ley, e barkiiji enɗi e ndimdimol. 26 Pellet ɗii du'aaji ɗi min ben maa Isra'iila mi du'ani-maa no ɓuri du'aaji ɗee pelle kiɗɗe tabitude, no ɓuri moƴƴuki ɗee cehe poomayankeeje ɲiiɓude. Yo ɗin du'aaji fow wonu e hoore Yuusufu, yo ɗi wonu ka ɗuure oo ɓurɗo e hakkunde ben-gootooɓe mun.
27 Buniyamiinu ko saafaandu ɲaaɗundu. Bimbi o ɲaamay ko o waaɲi kon, kiikiiɗe o sendita ko o jattoyi kon.»
28 Ko ɓee ɗoo sappoo e ɗiɗo woni bolondaaji Isra'iila ɗin. Ko ɗunɗoo wonnoo ko ben maɓɓe haalannoo ɓe fewndo o du'antoo ɓe, o du'anii mo kala e maɓɓe du'aa mo ontigi handi e mun on.
Fii Mayde Yaaquuba Nden
29 Onsay o yamiri ɓe, o wi'i: «Jooni miɗo tawtoyde maamaaɓe an ɓen, on surroyay lan takko maɓɓe e nder ndee fammeere wonnde ka ngesa Ifruuna, oo Hissiyankeejo, 30 ɗun ko e ndee fammeere wonde ka ngesa wi'eteemba Makfilati takko Mamra e nder leydi Kanaana, mba Ibraahiima soodunoo e juuɗe Ifruuna, oo Hissiyankeejo, ɗon wonti berɗe makko halal. 31 Ko ɗon Ibraahiima e sonna mun Saarata wattinaa, awa kadi ko ɗon Issaaqa e sonna mun Rifqatu wattinaa, ko ɗon kadi mi wattini Layyatu. 32 Mban ngesa e nden fammeere wonnde e nder mun ko e juuɗe Hissiyankeeɓe ɓen soodanoo.»
33 Ɓay Yaaquuba lannii yamirde ɓiɓɓe mun ɓen ɗun fow, o watti koyɗe makko ɗen ka danki, o foofi foofaango makko sakkitoro ngon, o tawtoyi maamaaɓe makko ɓen.