Fii no Yaaquuba Du'orani Ɓiɓɓe Yuusufu ɓen
48
1 Ɓawto ɗun, Yuusufu wi'aa wonde: «Ben mon no fooyi.» O ƴetti ɓiɓɓe makko ɓen ɗiɗo, ɗun ko Manasse e Efrayiima, o yaadi e maɓɓe. 2 Ɓe yeetii Yaaquuba: «E hino ɗaa Yuusufu geɗal mon on ka arata.» Onsay Isra'iila etii haa immii jooɗii ka danki mun.3 O wi'i Yuusufu: «Allaahu, Jom Bawgal on, feeɲanno lan e ndee nokkuure wi'eteende Luuzu, ɗun ko e ndii leydi Kanaana, o barkinimmi. 4 O daalanimmi: ‹Mi ɗuɗɗinay jiidi maa ndin, mi yaɲɲe, wontaa moftal jamaaji. Mi okkoyay jurriya maa aroyoowo ɓaawo maa on ndii leydi, ndi wonana ɓe halal haa poomaa.›
5 «Jooni non, ɓee ɓiɓɓe ɗiɗo ɓe jibinanaɗaa e nder ndii leydi Misira ado mi arde wontanii lan. Efrayiima e Manasse wontanii lan wano Ruubaynu e Sim'uunu woniranimmi non. 6 Kono ɓiɓɓe ɓe jibinanoyteɗaa ɓaawo ɓee ɗoo ɓen, ko an wonanta. Ko e inɗe kotiraaɓe maɓɓe ɓen ɓe hendoroyta ndondi maɓɓe ndin. 7 Fewndo mi iwi Fadaani-Araama, Raahiilu maayirimmi leydi Kanaana ka laawol, hari men siwaa hewtude Ifraata seeɗa. Mi wattini mo ka sera laawol Ifraata (ɗun ko Bayti-Lahiimi).»
8 Isra'iila ndaari ɓiɓɓe Yuusufu ɓen, wi'i: «E ko homɓe nii?»
9 Yuusufu jaabii ben mun: «Ko ɓee ɓiɓɓe Allaahu on okkimmi ɗoo.»
Isra'iila wi'i: «Ɓannanan ɓe ɗoo, mi du'anoo ɓe.»
10 Hari Isra'iila nawyii haa gite makko ɗen minɗii, o accii yi'ude. Yuusufu ɓanni ɓe takko makko. Onsay Isra'iila hirbii ɓe, lunnii. 11 Isra'iila wi'i Yuusufu: «Mi sikkaano mi yi'ete e nder ngurndan an, e hino non jooni Allaahu on hollii lan hay jurriya maa on.»
12 Onsay Yuusufu itti ɓe ka hoore koyɗe ben mun, o sujji e leydi. 13 Ontuma Yuusufu jogodi ɓe ɗiɗoo non, Efrayiima ka jungo makko ɲaamo, fii yo on hikkor ko nano Isra'iila, Manasse ka jungo makko nano, fii yo on hikkor ka ɲaamo Isra'iila. Onsay o ɓanni ɓe takko ben makko. 14 Kono Isra'iila fawi jungo mun ɲaamo ngon ka hoore Efrayiima, toolaajo on, o fawi jungo makko nano ngon ka hoore Manasse. O luutindiri juuɗe makko ɗen, fii kala ko Manasse woni afo on.
15 O du'anii Yuusufu, o wi'i: «Yo oo Allaahu, mo ɓee maamaaɓe an Ibraahiima e Issaaqa, jokkinoo e mun fewndo ngurndan maɓɓe ɗan, ɗun ko oo Allaahu Ngaynaako an, gila mi daɲaa haa hande, 16 yo oo Malaa'ikaajo sortuɗo lan e boneeji fow barkin ɓee fayɓe, yo ɓe nodditire innde an, e inɗe ɓee maamaaɓe an Ibraahiima e Issaaqa, yo ɓe ɗuuɗu ka hoore leydi haa ɓe wona jamaa moolanaaɗo.»
17 Onsay Yuusufu ndaari tawi ko ka hoore Efrayiima ben makko fawi jungo mun ɲaamo ngon, ɗun metti mo. O nangi jungo ben makko ngon fii ittugol ngo ka hoore Efrayiima, o fawa ngo ka hoore Manasse. 18 Yuusufu wi'i: «Hinaa nii, yo baaba en, ɓay ko oo woni afo on, fawee sookewo mon ɲaamo ngon ka hoore makko.»
19 Kono ben makko salii ɗun, wi'i: «Miɗo andi yo ɓiɗɗo an, miɗo andi, kanko kadi o wontay jamaa, o wona mawɗo. Kono miɲan makko ɓuray mo mawnude, jurriya makko on wonay jamaaji ɗuuɗuɗi.» 20 Nden ɲande o du'anii ɓe, o wi'i: «Ko eɓɓude e maa, Banii-Isra'iila'en du'orta, ɓe wi'a: Yo Allaahu on waɗire wa Efrayiima e Manasse!» Ko nii o hikkiniri Efrayiima yeeso Manasse.