Fii no Yaaquuba Yaari Misira
46
1 Isra'iila iwdi ɗon e kala ko o jeyi. Ɓay o hewtii Birsabaa, o waɗani Allaahu ben makko Issaaqa on sadakaaji. 2 Onsay Allaahu on daalani Isra'iila jemma e nder koyɗol, o wi'i mo: «Yaaquuba! Yaaquuba!»O nootii, o wi'i: «Naamu! E hino lan!»
3 Allaahu on daalani mo: «Ko min Allaahu on, on Alla ben maa. Wota a hulu yahugol Misira, ko fii ko ton mi waɗoyte leɲol mawngol. 4 Mi yaaday e maa Misira, awa kadi ko min tigi artiroyay-maa. Ko jungo Yuusufu ngon tigi omboyta gite maa ɗen nde timmuɗaa.»
5 Ɓay Yaaquuba fokkitii iwugol Birsabaa, ɓiɓɓe makko ɓen baki mo kanko e rewɓe maɓɓe ɓen e ɓiɓɓe maɓɓe ɓen ka giri-giriije ɗe Fir'awna addani mo ko o yaara. 6 Ɓe ƴetti kadi gureele maɓɓe ɗen e kala jawle ɗe ɓe mooɓunoo leydi Kanaana. Onsay Yaaquuba yaadi e jurriya mun on fow Misira, 7 gila e ɓiɓɓe makko haa e taaniraaɓe makko worɓe e rewɓe. O addori jurriya makko on fow Misira.
8 E hino ɗoo inɗe ɓiɓɓe Isra'iila ɓe o ardunoo Misira ɓen, ɗun-le ko Yaaquuba e ɓiɓɓe mun ɓen:
Afo Yaaquuba on ko Ruubaynu.
9 Ɓiɓɓe Ruubaynu ɓen ko Hanuuka e Fallu e Hasruunu e Karmi.
10 Ɓiɓɓe Sim'uunu ɓen ko Yamu'iila e Yaamiinu e Uuhadu e Yaakiina e Suuhara e Saa'uulu, onɗon neene mun ko Kanaaniyankeejo.
11 Ɓiɓɓe Lewi ɓen ko Gersuunu e Qahaatu e Maraari.
12 Ɓiɓɓe Yahuuda ɓen ko Iira e Uunaana e Siila e Faarisa e Zaaraha, (kono Iiri e Uunaana kaɲun maayuno leydi Kanaana). Ɓiɓɓe Faarisa ɓen ko Hasruunu e Haamuula.
13 Ɓiɓɓe Yassaakara ɓen ko Toola e Fawwa e Yuuba e Simruunu.
14 Ɓiɓɓe Zabuluunu ɓen ko Saarada e Iiluunu e Yaahaliilu. 15 Ko ɓee ɗoo ɓiɓɓe worɓe Layyatu jibinani Yaaquuba Fadaani-Araama wondude e oo jiwo gooto wi'eteeɗo Diinatu. Hawtitude maɓɓe kamɓe ɓiɓɓe ɓen e taaniraaɓe ɓen fow hawray cappanɗe tato e tato.
16 Ɓiɓɓe Gaada ɓen ko Sifyuunu e Hajji e Suuni e Asbuunu e Iiri e Aruudi e Areeli.
17 Ɓiɓɓe Asiira ɓen ko Yimna e Yiswa e Yiswi e Bariiya e Saaraha, on ko bandiraawo maɓɓe. Ɓiɓɓe Bariiya ɓen ko Haabara e Malki'iilu. 18 Ko ɓee ɗoo woni ɓiɓɓe Zilfatu, oo korɗo mo Labaanu okkunoo Layyatu mo mun. Ɓiɓɓe ɓe Zilfatu jibinani Yaaquuba ɓen e taaniraaɓe ɓen wondude e jaatiraaɓe ɓen ko ɓe sappoo e njeegoo.
19 Ɓiɓɓe ɓe Raahiilu jibinani Yaaquuba ɓen ko Yuusufu e Buniyamiinu.
20 Asnaatu, ɓiɗɗo Fuuti-Feera, yottinoowo sadaka on Uuna, jibinanno Yuusufu ɓiɓɓe ɗiɗo e nder leydi Misira, ɗun ko Manasse e Efrayiima.
21 Ɓiɓɓe Buniyamiinu ɓen, ko Bela e Baakar e Asbiilu e Giira e Na'amaana e Iihi e Ruusu e Muffiimu e Huffiimu e Ardu. 22 Ko ɓee ɗoo woni ɓiɓɓe ɓe Raahiilu jibinani Yaaquuba ɓen. Ɓiɓɓe ɓe Raahiilu jibinani Yaaquuba ɓen e taaniraaɓe ɓen ko ɓe sappoo e nayo.
23 Ɓiɗɗo Daana on ko Huusiima.
24 Ɓiɓɓe Naftali ɓen ko Yaahas'iilu e Guuni e Yisru e Silliima. 25 Ko ɓee ɗoo woni ɓiɓɓe Bilhatu ɓen, oo korɗo mo Labaanu okkunoo Raahiilu mo mun. Ɓiɓɓe ɓe Bilhatu jibinani Yaaquuba ɓen e taaniraaɓe ɓen ko ɓe njeeɗiɗo.
26 Jurriya Yaaquuba mo o yaadunoo Misira on, hara rewɓe ɓiɓɓe makko ɓen tawaaka, ko ɓe cappanɗe njeegoo e njeegoo. 27 Ko ɓiɓɓe ɗiɗo Yuusufu daɲanaa leydi Misira. Adadu ɓeynguure Yaaquuba arnde Misira nden ko ɓe cappanɗe njeeɗiɗo.
Fii no Yaaquuba Hewtiri Misira
28 Yaaquuba hikkini Yahuuda yeeso fii yiidoygol e Yuusufu, on ardoo ɓe no ɓe hewtira leydi Gaasaana. Ko nii ɓe hewtiri leydi Gaasaana. 29 Ontuma Yuusufu jolki pucci mun ɗin ka giri-giriwal mun, o yahi Gaasaana fii fottoygol ton e Isra'iila ben makko. No ɓe yiidirnoo, Yuusufu hirbii ben mun ka daande, o fesi ɗon ko juuti.
30 Onsay Isra'iila ben makko wi'i Yuusufu: «Jooni non, ɓay mi seedorii ɗee gite an wonde hiɗa wuuri, accu mi maaya.»
31 Yuusufu wi'i ben-gootooɓe mun ɓen e ɓeynguure ben mun nden: «Jooni miɗo yahude mi humpita Fir'awna wondema onon ben-gootooɓe an ɓen e ɓeynguure ben an wonnoonde leydi Kanaana nden, on hewtii ka an ɗoo. 32 Mi wi'a mo kadi wonde ko on ngaynaakooɓe dammi e ne'ooɓe, on ardii e gureele mon na'i e dammi ɗen, e kala ko jeyɗon. 33 Nde Fir'awna noddi on, landii on ko honɗun woni golle mon, 34 on jaaboroyay mo nii: ‹Menen, ɓee jiyaaɓe mon, ko men ngaynaakooɓe gila cukankaaku amen, menen e mawɓe amen ɓen.› Ko nii waawirton hoɗude e ndii leydi Gaasaana, ko fii Misirayankooɓe ɓen no harmini ne'ooɓe dammi ɓen.»