Fii no Yuusufu Andintinori Ben-Gootooɓe mun ɓen
45
1 Tawi Yuusufu waawataa hande kadi wawtaade hoore mun e tawnde wonnooɓe takko makko ɓen. O sonki, o wi'i: «Yaltinee kala wonɗo takko an!» Fewndo Yuusufu andintinii ben-gootooɓe mun ɓen, tawi o wondaa e goɗɗo goo. 2 Yuusufu fesi ko tiiɗi haa Misirayankooɓe ɓen nani, ɗun nanii haa ka galle Fir'awna.3 Onsay Yuusufu wi'i ben-gootooɓe mun ɓen: «Ko min woni Yuusufu! Taw si hara ben an no wuuri haa jooni?» Kono hay gooto e ben-gootooɓe makko ɓen waawaali mo jaabaade, ɓay hari hiɓe heewunoo kulol yeeso makko.
4 Yuusufu wi'i ɓe kadi: «Mi torike on, ɓadee lan.» Onsay ɓe ɓadii mo. O wi'i ɓe: «Ko min woni Yuusufu, on ben-gooto mon, mo yeeyunoɗon naɓaa Misira. 5 Jooni wota on maapo, wota on monondiran fii ko yeeyunoɗon mi kon, mi addaa ɗoo. Sabu ko fii dandugol wonkii Allaahu on ardinimmi yeeso mon. 6 Waɗii nii duuɓi ɗiɗi gila heege fuɗɗii e ndii leydi. Awa e nder duuɓi jowi kadi remetaake sakko soɲitee. 7 Ko Allaahu on imminirimmi yeeso mon, ko fii hiwugol on no luttiron ka aduna, wallitoo on no wuuriron e dow kisiyee mawɗo. 8 Jooni non wonaa onon addimmi ɗoo, kono ko Allaahu on addimmi. O waɗimmi tugalal Fir'awna, koohoojo e hoore galle makko ɗen e fewjoowo e hoore leydi Misira ndin fow. 9 Yiltitee heɲa ka ben an, wi'on ɓe: ‹E hino ko Yuusufu ɓiɗɗo mon on wi'i kon: Allaahu on waɗii lan koohoojo e hoore leydi Misira ndin fow. Yo on seeno heɲa, 10 hoɗon ka leydi Gaasaana, wonon takko an, onon e ɓiɓɓe mon e taaniraaɓe mon, wondude e na'i mon e dammi mon e kala ko jeyɗon. 11 Ɗun mi dankoto on ɗon, ko fii heege ngen waɗay fahin e nder duuɓi jowi, fii wota on mule, onon e ɓeynguure mon nden e kala ko jeyɗon.›
12 «Onon e miɲan an Buniyamiinu, on seedorii gite mon ɗen wonde ko min Yuusufu tigi woni on wowlande. 13 On sifanto ben an fii ngal teddungal ngal mi teddinaa Misira, e kala ko yi'uɗon. Addoyee ben an ɗoo heɲa.»
14 Onsay o hirbii miɲan makko Buniyamiinu, o fesi. Buniyamiinu kadi wulli e daande makko, 15 o lunnii ben-gootooɓe makko ɓen fow kadi, himo fesa. Ɓawto ɗun, ben-gootooɓe makko ɓen yewtidi e makko.
16 On kibaaru andii ka galle Fir'awna wonde ben-gootooɓe Yuusufu ɓen hewtii. Ɗun weli Fir'awna e mbatulaaɓe mun ɓen. 17 Fir'awna wi'i Yuusufu: «Wi'u ben-gootooɓe maa ɓen yo ɓe rondin mbabbi maɓɓe ɗin, ɓe yiltoo leydi Kanaana, 18 ɓe ƴettoya ben mon e ɓeynguureeji mon ɗin, ɓe ara haa ka an. Mi yeɗay ɓe ko ɓuri moƴƴude e ndii leydi Misira, ɓe nafoo dakamme leydi ndin.
19 Mi yamirii ma yahugol wi'a ɓe: ‹E hino ko waɗoton kon: Ƴettee giri-giriije e ndii leydi Misira ka bakoyon ɓiɓɓe mon ɓen e rewɓe mon ɓen, wondude e ben mon, aron. 20 Wota on wullan fii ko accoton ton kon, ko fii piiji ɓuruɗi moƴƴude e nder leydi Misira ndin fow wonanay on.»
21 Ɓiɓɓe Isra'iila ɓen waɗi ko ɓe wi'aa kon. Yuusufu jonni ɓe giri-giriije e dow yamiroore Fir'awna, o yooɓini ɓe kadi. 22 O okkori mo bee e maɓɓe conci ko ɓornoo. Buniyamiinu kaɲun o okki mo tammaaji teemeɗɗe tati kaalisi, e dolokkaaji jowi ko o ɓornoo. 23 E hino ko o neldi ben makko kon: o rondini mbabbi sappo gori piiji ɓurɗi moƴƴude e leydi Misira ndin, o rondini kadi mbabbi sappo deyi nenɗe e bireedi e neemaaji goo ko ben makko yooɓoo ka laawol nde no ara. 24 Ontuma o watti ben-gootooɓe makko ɓen e laawol, ɓay ɓe fokkitii, o wi'i ɓe: «Wota on haɓu dey ka laawol!»
25 Ɓe yalti Misira, ɓe hewtiti ka ben maɓɓe Yaaquuba leydi Kanaana. 26 Ɓe humpiti ben maɓɓe wonde Yuusufu no wuuri haa jooni, hay ko kanko woni fewjude e hoore leydi Misira ndin. Kono ngol kongol diwi Yaaquuba, ɓay o hoolanooki ɓe.