Fii Jardukun Yuusufu kun
44
1 Onsay Yuusufu yamiri mbatulaajo mun on, o wi'i: «Ƴettu ɗii bootooji ɓee hoɓɓe, loowaa ton ɲaameteeji yeru mo bee e maɓɓe ko waawata naɓude, wattaa mbuuɗi mo kala e maɓɓe ka hunduko booto mun. 2 Wattaa kadi jardukun an kaalisi kun ka hunduko booto toolaajo on, wondude e kaalisi coggu nendi makko ndin.» Mbatulaajo on waɗi ko Yuusufu yamiri ɗun kon.3 Ɓay weetii bimbi, hoɓɓe ɓen wattaa e laawol, kamɓe e mbabbi maɓɓe ɗin. 4 Tawi ɓe yaltii ka saare, kono ɓe muutaaki, fewndo ko Yuusufu nuli mbatulaajo mun on, o wi'i mo: «Immo, jokkitaa ɓee hoɓɓe. Si a hewtitike ɓe, wi'aa ɓe: ‹Ko fii honɗun yoɓiranɗon moƴƴere nden bone? 5 On jogaaki jardukun kun koohoojo an on yarirta kun, o waɗa ndureyaagal? Ko ko boni waɗuɗon ɗoo.› »
6 Mbatulaajo on hewtitii ɓe, o yottini ngal nulal e maɓɓe. 7 Ɓe jaabii mo: «Hara ko fii honɗun oo koohoojo amen wowlirani nii? Yo waɗugol sifa oo bone woɗɗito men, menen ɓee jiyaaɓe mon! 8 E hin-le, hay men artiranii on kaalisiiji mon ɗi men yiitoyi ka nder bootooji amen leydi Kanaana. Awa ko honno men wujjirta kaalisi maa kaŋŋe ka suudu oo koohoojo mon? 9 Kala mo yiiruɗaa ɗun e hakkunde amen, menen ɓee jiyaaɓe mon, yo o sahinbine, menen luttuɓe ɓen men wonta jiyaaɓe mon, onon oo koohoojo amen.»
10 Mbatulaajo on jaabii: «Awa en fottii e ko wi'uɗon kon. Kala yiiraaɗo ɗun wonay maccuɗo an, haray onon luttuɓe ɓen, bone fawaaki on.»
11 Mo kala jippini booto mun on ka leydi heɲa, udditi. 12 Mbatulaajo on liɲi ɓe, o fuɗɗori afo on, o sakkitori toolaajo on. O tawi jardukun kun ka booto Buniyamiinu. 13 Onsay ɓe aani haa ɓe seeki dolokkaaji maɓɓe ɗin. Mo kala rondintini mbabba mun mban, ɓe yiltitii ka saare.
14 Yahuuda e ben-gootooɓe mun ɓen tawti Yuusufu ka galle mun, tawi o yaltaali. Ɓe yani ka leydi yeeso makko. 15 Onsay Yuusufu wi'i ɓe: «E ko honɗun waɗuɗon ɗoo? On andaa aaden wano an min no waawi waɗude ndureyaagal, anda ko wirnii?»
16 Onsay Yahuuda jaabii mo: «Ko honɗun men wowlanta koohoojo amen on, e ko honɗun men haalata? Ko honno men sortorta e ɗun? Allaahu on feɲɲinii bone jiyaaɓe mon ɓen. Jooni non, men wonii maccuɓe mon, menen e oo yiiraaɗo kun jardukun mon.»
17 Ontuma Yuusufu wi'i ɓe: «Yo waɗugol ɗun woɗɗito lan. Ko mo jardukun kun yiitaa e juuɗe mun on tun wonata maccuɗo an. Onon luttuɓe ɓen on hootay ka ben mon e hoore jam.»
18 Onsay Yahuuda ɓadii mo, wi'i: «Mi torike on, onon oo koohoojo an, newnanee lan min oo jiyaaɗo mon mi yewtida e mon, hara on tikkanaali lan, min oo jiyaaɗo mon, ko fii hiɗon wa'i wa Fir'awna. 19 Hiɗon andi yo koohoojo amen, on landino men, menen ɓee jiyaaɓe mon, maakuɗon, si meɗen mari baaba maa ben-gootooɓe. 20 Men jaabii on yo koohoojo an, meɗen mari baaba nayeejo e miɲan daɲaaɗo e nder nayeewu ben amen. Kotoo makko feƴƴiniino, ko kun paykun tun neene makkun luttiri. On-le, ben amen no yiɗi mo. 21 On wi'uno men, menen ɓee jiyaaɓe mon, yo men addanoy on kun paykun haa seedoron kun ɗee gite mon. 22 Men jaabii on, yo koohoojo an, alaa no kun paykun seedira e ben amen. Si ɓe seedii tun, ɗun wonay sabu maɓɓe. 23 Wi'uɗon men, menen ɓee jiyaaɓe mon, si tawii men ardaali e toolaajo amen on, en yiidataa hande kadi.
24 «Ɓay men hewtitoyii ka ben amen, oo jiyaaɗo mon, men yeetii ɓe ɗii konguɗi mon, yo koohoojo an. 25 Ɓawto ɗun, ben amen wi'i men: ‹Yiltitee soodanoyon en ɲaametee seeɗa.› 26 Men jaabii ɓe: ‹Alaa no men yaara, kono si tawii ko menen e toolaajo amen on, men yahay ko fii men waawoytaa yiidoyde e on neɗɗo si tawii wonaa men wondu e toolaajo amen on.» 27 Ben amen, oo jiyaaɗo mon, wi'uno men, ‹Hiɗon andi ɓeyngu an jibinananno worɓe ɗiɗo, 28 oya on yaltiino gila neeɓii, pellet o waɗaama ceeli-ceeli, ko fii haa hande mi yiitaali mo. 29 Si tawii non jooni on naɓanii lan ooɗoo kadi, tanaa heɓoyii mo ton, haray on jippindinay lan e ndee hoore an furɗunde ka wonunde mayɓe ɓen e nder sokola.› »
30 Onsay Yahuuda wi'i mo: «Jooni non, si men hootii ka ben amen, oo jiyaaɗo mon, men wondaa e kun paykun kun ɓe waɗi wonkii maɓɓe fow e mun, 31 ɓe yi'ii men e ɓaawo makko, ɗun wonay sabu maɓɓe. Haray menen, ɓee jiyaaɓe mon, men wonay sabu jippingol ben amen, oo jiyaaɗo mon, e on sala mun furɗuɗo, ka wonunde mayɓe ɓen e nder sokola. 32 Ko fii min, oo jiyaaɗo mon, mi ƴettanno ben amen ahadi fii kun paykun, mi wi'i ɓe: ‹Si mi artiranaali on kun paykun mon, haray miɗo fawii hakkee mon haa poomaa.›