Yaadu Ɗimmuru ndun Misira
43
1 Tawi heege no tiiɗi e leydi ndin. 2 Ɓay ɓe gaynii ɲaamude nenɗe ɗe ɓe ittoynoo Misira ɗen, ben maɓɓe wi'i ɓe: «Yiltitee soodanoyon en ɲaametee seeɗa.»3 Yahuuda jaabii mo, wi'i: «Oo fewjoowo e hoore leydi ndin hajino men, wi'i, ‹On yiidataa e an si hinaa on ardu e miɲan mon.› 4 Si tawii on immindinay men e miɲan amen, ɗun men yahay, men soodanoya on ɲaametee. 5 Kono si on immindinaali men e miɲan amen, menen kadi men yahataa, ko fii on fewjoowo wi'uno men: ‹On yiidataa e an si hinaa on ardu e miɲan mon.› »
6 Ontuma ben maɓɓe Isra'iila wi'i ɓe: «Ko fii honɗun bonaniɗon e an, hollituɗon on neɗɗo wonde hiɗon mari ben-gooto goo?»
7 Ɓe jaabii mo: «On neɗɗo landino men fota fii amen e fii musidal amen ngal fow, o wi'i: ‹Hara ben mon no wuuri haa jooni? Hara hiɗon jogii ben-gooto goo?› Men jaabino mo-le ko o landii men kon. Ko honno men sogitortonoo o wi'ayno men: ‹Ardee e miɲan mon›?
8 Onsay Yahuuda wi'i ben mun Isra'iila: «Accee immindinon mi e suka on, men yaada, ɗun en daɗay hara en maayaali, menen woo, onon woo, ɓiɓɓe amen ɓen woo. 9 Ko min landitoytoɗon mo, ko min ƴantoyton mo. Si wonii mi artiranaali on mo, si tawii mi tawtinaali on mo, haray miɗo fawii hakkee mon haa poomaa. 10 Si tawno men tonganooki ɗoo, harayno men yiltitinoke laabiiji ɗiɗi.»
11 Ben maɓɓe Isra'iila wi'i ɓe: «Ɓay wonirii nii, e hino ko waɗoton kon: wattee ngaluuji leydi men ndin ka nder bootooji mon ko neldon on neɗɗo. Naɓoron nebbe wujeteeɗe seeɗa e njuuri seeɗa e junjuranji e urngallooji e ɓiɓɓe leɗɗe ƴakketeeɗe wi'eteeɗe fustugan e lawjan. 12 Naɓoron kadi kaalisi cowalle ɗiɗi ko naɓornoɗon aranun kon, jonniton ɓe kaalisiiji ɗi ɓe waɗunoo ka hunduko bootooji mon ɗin, no gasa hara ko faljere ɗun waɗiraa. 13 Ƴettee miɲan mon, yiltitoɗon kisan ka on neɗɗo. 14 Yo Allaahu Jom Bawgal on waɗu haa on neɗɗo yurmee on, o acca artidon e oya ben-gooto mon e Buniyamiinu. Awa si tawii kadi no hoddiraa yo ɓiɓɓe an ɓen fuuto lan, haray yo ɓe fuuto lan.»
15 Ontuma ɓe ƴetti ɗin neldaariiji e kaalisiiji cowalle ɗiɗi ko ɓe naɓornoo aranun kon, wondude e Buniyamiinu, ɓe yahi Misira, ɓe tawoyi Yuusufu.
16 Ɓay Yuusufu yiidii ɓe e Buniyamiinu, o wi'i mbatulaajo galle makko ɗen: «Wernoy ɓee ka suudu an, hirsanaa ɓe, moƴƴinanaa ɓe nafakka, ko fii ko min e maɓɓe soƴƴidata hande.»
17 Mbatulaajo on waɗi ko Yuusufu yamiri mo kon, o naɓi hoɓɓe ɓen ka galle Yuusufu. 18 Ɓay ɓe naɓaama ka galle Yuusufu, ɓe huli, hiɓe wi'a: «Ko sabu ɗii kaalisiiji ɗi ɓe waɗunoo ka bootooji men ɓe addiri en ɗoo, fii no ɓe yanira e men, ɓe doola en, ɓe waɗa en jiyaaɓe maɓɓe, ɓe jaɓa mbabbi men ɗin.»
19 Ɓe ɓadii mbatulaajo galle Yuusufu ɗen, ka dambugal, 20 ɓe wi'i mo: «Accanee men hakkee, yo koohoojo amen, hari men ariino ɗoo fii soodugol ɲaametee. 21 Fewndo ko men hootaynoo, ɓay men waalii e laawol, men udditi bootooji amen ɗin, men tawi kaalisiiji mo kala e amen no ka hunduko booto mun, wano men addirnoo ɗi non, tawi non ko kanji tigi, ɗi fawaa, ɗi ŋakkaa, awa men artirii ɗi. 22 Men addorii kaalisi goo kadi fii soodugol ɲaameteeji, men andaa non ko hombo wattunoo kaalisiiji ɗin ka bootooji amen.»
23 O jaabii ɓe: «Wonee e jam, wota on hulu. Ko Alla mon on, on Alla ben mon, okki on ndii jawdi ndi tawuɗon ka nder bootooji mon. Min mi hendino kaalisiiji mon ɗin.» Ontuma o addani ɓe Sim'uunu. 24 On werni ɓe ka suudu Yuusufu, o okkori ɓe ndiyan, ɓe sembii, o addani mbabbi maɓɓe ɗin kadi ɲagama. 25 Onsay ɓe yaltini neldaariiji ɗi ɓe neldunoo Yuusufu ɗin si o artoyii ɲalorma, ko fii hari ɓe nanii wonde ko ɗon ɓe soƴƴidata e makko.
26 Ɓay Yuusufu hewtii ka suudu, ɓe hewtini mo neldaari ndi ɓe neldi mo ndin, e hoore hiɓe sujjani mo ka leydi. 27 O landii si hiɓe e jam, o wi'i ɓe kadi: «Taw si ben mon, ɓee mawɓe ɓe wowlannoɗon mi fii mun no e jam, taw si hiɓe wuuri haa jooni?»
28 Ɓe jaabii mo: «Ben amen, oo jiyaaɗo mon, no e jam, haa jooni hiɓe wuuri.» Ɓe sujjani mo e dow yankinaare.
29 Onsay Yuusufu ɓanti gite, o yi'i Buniyamiinu miɲan makko, neene-gooto makko on, o wi'i ɓe: «Hara ko oo ɗoo wi'unoɗon mi wonde ko toolaajo mon on?» Onsay o wi'i on: «Yo Allaahu yeɗe moƴƴere yo ɓiɗɗo an!» 30 Yuusufu yalti kisan, ko fii hari yurmeende miɲan makko heewii e ɓernde makko, haa o faalaama wullude. O naati ka kaybonru makko, o fesi. 31 Ontuma o sulmii, o yalti, o wawtii hoore makko, o wi'i ɓe: «Ɓannee soƴƴaari ndin.»
32 Ɓe waɗani mo feere, ɓe waɗani ben-gootooɓe makko ɓen feere, ɓe waɗani Misirayankooɓe ɲaamidaynooɓe e maɓɓe ɓen feere, ko fii Misirayankooɓe ɓen gasataano hawtidude e Aabirayankeejo, ɓay hari ɗun no harmani ɓe. 33 Ben-gootooɓe Yuusufu ɓen joɗɗiniraa yeeso makko, wano ɓe heccindiriri non, mo kala e maɓɓe no ndaara oya e hoore ŋalaw. 34 Onsay Yuusufu ƴetti e ko mun kon, ɓeydani ɓe. Tawi geɓal Buniyamiinu ngal no ɓuri ɗuuɗude geɓe ɓeya ɗen laabi jowi. Ɓe ɲaami, ɓe yaridi e makko haa ɓe mandili.