Fii Arugol Ben-Gootooɓe Yuusufu ɓen Misira
42
1 Yaaquuba humpitii wonde nendi no woodi leydi Misira. Onsay o wi'i ɓiɓɓe makko ɓen: «E ko honɗun jooɗiɗon ɗoo e ndaarindirgol?» 2 O wi'i ɓe kadi: «Mi nanii wonde nendi no woodi Misira. Yahee ton soodanoyon en ko wuuriren, hara en maayaali.»3 Onsay ben-gootooɓe Yuusufu ɓen sappo yahi Misira fii soodoygol nendi. 4 Kono Yaaquuba immindinaali ɓe e Buniyamiinu miɲɲiraawo Yuusufu on ko fii o wi'uno: «Fii wota tanaa heɓu mo.» 5 Ɓiɓɓe Isra'iila ɓen hewtidi e yimɓe goo arɓe fii soodugol nendi, ko fii hari heege ngen waɗii e nder leydi Kanaana ndin kadi.
6 Tawi ko Yuusufu woni hooreejo leydi ndin, ko kanko kadi yeeyaynoo yimɓe leydi ndin ɲaametee. Ben-gootooɓe makko ɓen hewti, ɓe sujjani mo, ɓe tuggi tiiɗe maɓɓe ɗen ka leydi. 7 Yuusufu yi'i ben-gootooɓe mun ɓen, o anditi ɓe, kono o faytinkinori ɓe wa janano. O yewtiri ɓe no mettiri, o wi'i ɓe: «Ko honto iwuɗon?»
Ɓe jaabii: «Meɗen iwi leydi Kanaana ari fii soodugol ɲaametee.»
8 Yuusufu anditi ben-gootooɓe mun ɓen, kono kamɓe ɓe anditaali mo. 9 Onsay Yuusufu anditi koyɗi ɗi o hoyɗunoo ɓe ɗin. O wi'i ɓe: «Onon ko on tefooɓe bonɓe! Ko andugol lo'ereeji leydi ndin addi on.»
10 Ɓe jaabii mo: «Oo'owoye, koohoojo amen, menen ɓee jiyaaɓe mon, ko yeru soodugol ɲaametee addi men ɗoo. 11 Menen ɗoo fow ko men ben-gootooɓe, ko men yimɓe nunɗuɓe! Menen ɓee jiyaaɓe mon wonaa men tefooɓe bonɓe.»
12 O wi'i ɓe kadi: «Wonaa goonga non, ko fii andugol lo'ereeji leydi ndin addi on!»
13 Ɓe jaabii: «Menen ɓee jiyaaɓe mon, ko men ɓiɓɓe sappoo e ɗiɗo ben-gootooɓe, ɓe leydi Kanaana. Awa toolaajo amen on no wondi e ben amen fewndo ɗoo, oya on maayiino.»
14 Onsay Yuusufu wi'i ɓe: «Ko ɗun tigi mi wonnoo on wowlande, ko on tefooɓe bonɓe. 15 E hino ko mi woni on ndarndorde kon: fodde Fir'awna no wuuri, fannii toolaajo mon on araali, on yaltataa ɗoo. 16 Toɗɗee goɗɗo e mon ko yahana miɲan mon, onon luttuɓe ɓen non on wonay e joge fii yo konguɗi mon ɗin ndarnde anda si ko ɗi goonga. Si tawii wonaa non woniri, fodde Fir'awna no wuuri, haray ko on tefooɓe bonɓe.» 17 Ontuma o waɗi ɓe fow e joge e nder balɗe tati.
18 Ka ɲalaande tammere, Yuusufu wi'i ɓe: «E hino ko waɗoton kon fii yo on daɗu, ɓay min ko mi huloowo Alla: 19 si tawii ko on nunɗuɓe, yo goɗɗo e mon wonu ka suudu joge, luttuɓe ɓen naɓana ɓeynguureeji mon weelaaɗi ɗin nendi. 20 Onsay addanon mi toolaajo mon on, ɗun andoto si ko wowluɗon kon ko goonga, daɗon wareede.» Ɓe waɗi ɗun.
21 Onsay ɓe ŋuni, ɓe wi'i: «Pellet hiɗen fawii hakkee miɲan men, ko fii en yi'uno annde wonkii makko kin fewndo o torii en sulfu, saliɗen jaɓande mo. Ko sabu ɗun ndee tampere heɓiri en.»
22 Ruubaynu ƴetti haala kan, wi'i ɓe: «Mi wi'aano on wota on waɗu kun paykun ko boni, laatii on jaɓanaali lan? Jooni non en ƴantaama ƴiiƴan makkun on.» 23 Hari ɓe andaa wonde Yuusufu no faamude ɗun, ɓay hiɓe waɗunoo nantinoowo hakkunde maɓɓe.
24 Onsay Yuusufu takkitii, o wulli, o arti, o yewtidi e maɓɓe. O nangi Sim'uunu e gite maɓɓe, o sokoyi.
25 Yuusufu yamiri yo bootooji maɓɓe ɗin hebbine nendi, mo kala e maɓɓe wattanee kaalisi ko soodi kon ka nder booto mun. O yamiri kadi yo ɓe jonne njooɓa. Ko ɗunɗoo o waɗani ɓe. 26 Ɓe fawi bootooji maɓɓe nendi ɗin ka hoore mbabbi maɓɓe, ɓe yahi.
27 Fewndo ɓe yiltotoo, goɗɗo e maɓɓe udditi booto mun on fii ƴettangol mbabba mun mban ɲaametee ka ɓe weeri ɗon. O ndaari o tawi jaka kaalisiiji makko ɗi o naɓunoo soodugol ɗin no ka hunduko booto makko. 28 O wi'i ben-gootooɓe makko ɓen: «Mi jonnitaama kaalisiiji an ɗin, e hino ɗi ka booto an ɗoo.»
Ɗun taƴini ɓe deedi, ɓe woni e diwnugol, wi'indira: «Taw ko honɗun Allaahu on waɗi en ɗoo?»
29 Ontuma ɓe hewtitoyi ka ben maɓɓe Yaaquuba e ndii leydi Kanaana, ɓe fillitanii mo ko heɓoyi ɓe kon, ɓe wi'i: 30 «Neɗɗo fewjoowo e hoore leydi ndin yewtirii men mo mettiri, o jogitori men wa tefooɓe bonɓe. 31 Men wi'i mo: ‹Menen ko men nunɗuɓe, wonaa men tefooɓe bonɓe.› 32 Men wi'i mo kadi: ‹Ko men worɓe sappoo e ɗiɗo ben-gootooɓe. Gooto e amen wuuraa, toolaajo on no wondi e ben amen fewndo ɗoo leydi Kanaana.›
33 «Onsay on fewjoowo e hoore leydi ndin wi'i men: ‹E hino no mi andirta si ko on nunɗuɓe, accidee lan e ben-gooto mon goo, ƴetton ɲaameteeji ko yonanta ɓeynguureeji mon weelaaɗi ɗin. 34 Yahon, addanon mi toolaajo mon on fii no mi andira wonaa on tefooɓe bonɓe, ko on nunɗuɓe. Onsay mi jonnita on ben-gooto mon on, heɓon non no njuloron e nder leydi ndin.› »
35 Ɓay ɓe yuppii ko wonnoo ka bootooji maɓɓe kon, tawi bonfo mbuuɗi mo kala e maɓɓe no ka nder booto mun. Nde kamɓe e ben maɓɓe ɓe yi'unoo koy bonfohoy maɓɓe kaalisi, ɓe huli. 36 Onsay ben maɓɓe Yaaquuba wi'i ɓe: «On sendii lan e ɓiɓɓe an ɓen! Yuusufu woodaaka, Sim'uunu woodaaka, jooni hiɗon faalaa ƴettude Buniyamiinu kadi! Ɗun fow ko e hoore an woni yantude.»
37 Ruubaynu wi'i ben mun: «Si mi artiranaali on Buniyamiinu, haray waree ɓiɓɓe an worɓe ɓen ɗiɗo. Jonnee lan mo, min tigi mi artiranay on mo.»
38 Yaaquuba jaabii mo: «Ɓiɗɗo an on yaadataa e mon, ko fii kotoo makko maayiino, ko kanko tun lutti jooni. Si tanaa heɓoyii mo e nder nduu yaadu mon, haray on wonay sabu jippindingol lan e ndee hoore an furɗunde ka wonunde mayɓe ɓen e nder sokola.»