Fii Koyɗi Fir'awna ɗin
41
1 Ɓay duuɓi ɗiɗi feƴƴii, Fir'awna hoyɗi himo darii daande Niiluwol. 2 O yi'i kolce jeeɗiɗi na'i laatiiɗi, ngarbuɗi no ƴawa Niiluwol, oorira ka kalinre. 3 O yi'i kadi kolce jeeɗiɗi ɲookuɗi, horiiɗi no ƴawa Niiluwol ɓawto ɗiya arani, daroo takko majji daande Niiluwol. 4 Tun, ɗin na'i ɲookuɗi horiiɗi ɲaami ɗiya jeeɗiɗi laatiiɗi ngarbuɗi. Fir'awna fini fewndo ɗon.5 O ɗantii kadi, o hoyɗi ɗimmun. O yi'i cawti jeeɗiɗi sembuɗi labaaɗi no funta e bagawol gootol. 6 O yi'i kadi cawti jeeɗiɗi sewuɗi, ɗi bifi yorni no funta ɓawto ɗiya arani. 7 Tun, sewuɗi ɗin moɗi ɗiya cawti sembuɗi hebbinɗi. Fir'awna fini fewndo ɗon kadi, o tawi jaka ko koyɗol.
8 Ɓay weetii bimbi, tawi hakkil Fir'awna fow no jiiɓii. O nodditi kala ndureejo wondude e gandiɗuɓe ɓen fow e nder leydi Misira, o fillitanii ɓe ɗii koyɗi makko. Kono hay gooto waawaali firande ɗi Fir'awna.
9 Onsay hooreejo halfinaaɓe njaramji ɗin wi'i Fir'awna: «Hande mi anditii fii bonnere an goo. 10 Fir'awna tikkanno mbatulaaɓe mun ɓen. Onsay o waɗimmi e joge ka suudu hooreejo aynooɓe tata makko on ɓen, wondude e hooreejo juɗooɓe bireedi ɓen. 11 Men ɗiɗoo non, men hoyɗidi e nder jemma gooto, mo bee koyɗol feerewol, koyɗol kala e firo mun. 12 Tawi meɗen wondi e suka Aabirayankeejo, on ko jiyaaɗo hooreejo suufaaɓe mon ɓen. Men fillitanii mo ɗin koyɗi amen, o firani men ɗi, o firi koyɗol mo bee e amen. 13 Ɗun waɗiri wano o siforani men non tigi. Jonnituɗon mi golle an ɗen, wenguɗon ɗimmo an on.»
14 Onsay Fir'awna nulani Yuusufu, on yaltinaa tinna ka kaso. Yuusufu fembii, ɓornii conci goo, o yahi ka Fir'awna.
15 Fir'awna wi'i Yuusufu: «Miɗo hoyɗi koyɗol, kono mi heɓaali ko firanammi ngol. Mi nanii wonde hiɗa waawi firude koyɗol ngol fillitanaɗaa.»
16 Onsay Yuusufu jaabii Fir'awna, o wi'i: «Wonaa min dey, ko Allaahu on okkata on firo moƴƴo.»
17 Onsay Fir'awna wi'i Yuusufu: «Mi yi'ii ka koyɗol an, miɗo darii daande Niiluwol. 18 Mi yi'i kolce jeeɗiɗi na'i ngarbuɗi laatiiɗi no ƴawa Niiluwol, oorira ka kalinre. 19 Mi yi'i kadi kolce jeeɗiɗi horiiɗi ɲookuɗi no ƴawa ɓawto ɗiya arani. Hari haa hande mi yi'aali kaanirɗi non e nder ndii leydi Misira. 20 Ɗin na'i horiiɗi kaanuɗi ɲaami ɗiya kolce jeeɗiɗi ngarbuɗi. 21 Ɗi ɲaami ɗin, hay andaaki e deedi majji ɗi ɲaamii goɗɗun, hiɗi kaaniri wano ɗi kaanirnoo. Ko fewndo ɗon mi fini.
22 «Mi yi'i fahin e nder koyɗol goo cawti jeeɗiɗi hebbinɗi labaaɗi no funta e bagawol gootol. 23 Mi yi'i kadi cawti jeeɗiɗi sewuɗi ɗayɗuɗi, ɗi bifi yorni, no funta ɓawto ɗiya arani. 24 Cawti sewuɗi ɗin moɗi cawti labaaɗi ɗin. Mi fillitanii ndureeɓe ɓen ɗin koyɗi, kono hay gooto firanaali lan ɗi.»
25 Yuusufu wi'i Fir'awna: «Ɗii koyɗi mon ko gooti, yo Fir'awna. Allaahu on hollay woni Fir'awna ko o aroyta waɗude. 26 Na'i labaaɗi ɗin jeeɗiɗi ko duuɓi jeeɗiɗi, awa kadi cawti labaaɗi ɗin jeeɗiɗi ko duuɓi jeeɗiɗi. Ɗii koyɗi ko gooti. 27 Ɗii na'i jeeɗiɗi horiiɗi ɲookuɗi ƴawunooɗi ɓawto ɗiya arani, ko duuɓi jeeɗiɗi, awa kadi ɗii cawti jeeɗiɗi mehi, ɗi bifi ɗin yorni, ko duuɓi jeeɗiɗi heege aroyayɗi.
28 «Wano mi wi'irnoo on non, yo Fir'awna, Allaahu on no hollude Fir'awna ko o aroyta waɗude. 29 E hino ka duuɓi jeeɗiɗi haarannde tiiɗunde aranta leydi Misira ndin fow, 30 onsay duuɓi jeeɗiɗi heege hikka ɗon, haa leydi Misira ndin yejjita nden haarannde, ko fii ngen heege mehinɗinay leydi ndin. 31 Haarannde leydi ndin anditoytaake, hakkee ko ngen heege hikkoytoonge ɗon tiiɗoyta. 32 Ko woni sabu ngol koyɗol ɗimmitude ko ɓay ko huunde tabitunde immorde ka Allaahu on, nde Allaahu on tigi yawnorta waɗugol.
33 «Jooni non, yo Fir'awna ɗaɓɓu aaden faamuɗo gandiɗuɗo, o waɗa mo hoore e leydi Misira ndin. 34 Yo Fir'awna accu, o toɗɗoo hooreeɓe ko yaha e nder leydi Misira ndin, ƴanta jowaɓun kala ko soɲitaa e nder ɗii duuɓi jeeɗiɗi haarannde. 35 Yo ɓen mooɓitu kala ɲaameteeji e ɗii duuɓi moƴƴi arayɗi, ɗen nenɗe maree e juuɗe Fir'awna, ɗun wona ɲaametee maraaɗo ka ca'e. 36 Ɗin ɲaameteeji wonana leydi ndin maral fii ɗii duuɓi jeeɗiɗi heege aroyayɗi e nder ndii leydi Misira, hara leydi ndin re'iraaka ngen heege.»
Fii no Yuusufu Lamminiraa Misira
37 Nden yewtere Yuusufu weli Fir'awna e mbatulaaɓe mun ɓen. 38 Ontuma Fir'awna wi'i ɓe: «Taw si en heɓay wano oo neɗɗo ɗoo e wondude e Ruuhu Allaahu on?»
39 Fir'awna wi'i Yuusufu: «Ɓay Allaahu on andinii ma ɗunɗoo fow, hay gooto alaa faamuɗo gandiɗiri wa maa. 40 Ko an tigi wonata hooreejo galle an ɗen, awa kadi jamaa an on fow wonay e ley kongol maa. Ko jullere laamu nden tun mi ɓurdu-maa.»
41 Fir'awna wi'i Yuusufu kadi: «Awa, mi lamminii ma e hoore leydi Misira ndin fow!» 42 Fir'awna itti hurundaare mun maandinirnde nden ka jungo mun, o sorni nde ka hondu Yuusufu. O ɓorni mo conci dimi, o watti mo koɗol kaŋŋe ka daande. 43 O ƴawni mo e hoore giri-giriwal ngal pucci pooɗata hikkiingal mo ngal, suufaaɓe makko ɓen no ewnoo, wi'a: «Waɗee bolol!» Ko nii Fir'awna waɗiri Yuusufu hooreejo e leydi Misira ndin fow.
44 Onsay Fir'awna wi'i Yuusufu: «Ko min woni Fir'awna! Kono si hinaa e duŋayee maa, hay gooto townataa jungo maa koyngal e nder leydi Misira ndin fow.» 45 Onsay Fir'awna okki Yuusufu innde goo, ɗun ko Safnaata-Faniiha, o tiggani mo Asnaatu, on ko ɓiɗɗo Fuuti-Feera, yottinoowo sadaka on Uuna. Ɓawto ɗun, Yuusufu yalti jindugol e leydi Misira ndin.
46 Hari Yuusufu ko mo duuɓi cappanɗe tati fewndo ko Fir'awna, oo lanɗo Misira, jonnata mo nden darnde. Onsay Yuusufu yalti e tawnde Fir'awna fii jindugol e nder leydi Misira ndin fow. 47 E nder ɗin duuɓi jeeɗiɗi haarannde, to'ea leydi ndin hebbini fota. 48 Yuusufu mottindiri ɲaameteeji leydi Misira ndin e nder ɗin duuɓi jeeɗiɗi haarannde, o mari ɗin ɲaameteeji ka ca'e, o mari e saare kala ɲaameteeji soɲaaɗi e ɗen gese binde mayre. 49 Yuusufu mottindiri nenɗe wa njaareendi ndin ka baharu, ɗuuɗeendi majje on ɗuuɗi haa acci etaade, ko fii hari ɗun no ɗuuɗi haa feƴƴiti.
50 Ado hitaande heege aranere nden naatude, tawi Asnaatu, ɓiɗɗo Fuuti-Feera, yottinoowo sadaka on Uuna, jibinanii Yuusufu ɓiɓɓe worɓe ɗiɗo. 51 Yuusufu inni afo on *Manasse, ko fii o wi'uno: «Allaahu on yejjintinii lan tampereeji an ɗin e ɓeynguure ben an nden.» 52 O inni jatturu ndun *Efrayiima, ko fii o wi'uno: «Allaahu on waɗii lan jiidotooɗo e leydi ndi mi tampunoo.»
53 Ɗii duuɓi jeeɗiɗi haarannde e ndii leydi Misira timmi, 54 ontuma ɗii duuɓi jeeɗiɗi heege fuɗɗori wano Yuusufu wi'irnoo non. Tawi heege waɗii e ɗeya leyɗe fow, kono hari ɲaametee no woodi e nder leydi Misira ndin fow. 55 Onsay ɓay heege waɗii e leydi Misira ndin fow, jamaa on woytii e Fir'awna fii ɲaametee. Fir'awna wi'i Misirayankooɓe ɓen: «Yahee ka Yuusufu, waɗon ko o yamiri on woo.»
56 Ɓay heege ngen waɗii e leydi ndin fow, ontuma Yuusufu yaltini ɲaameteeji maranooɗi ɗin. O yeeyi ɗi Misirayankooɓe ɓen, ko fii hari heege ngen no tiiɗi e nder leydi Misira ndin fow. 57 Onsay yimɓe leyɗe ɗen fow ari Misira soodugol ɲaametee e juuɗe Yuusufu, ɓay hari heege ngen tiiɗii fota e leyɗe ɗen fow.