Fii Koyɗi Mbatulaaɓe Fir'awna ɓen
40
1 Ɓay feƴƴii e ɗun, ɲande goo halfinaaɗo njaramji wondude e juɗoowo bireedi lanɗo Misira on waɗi jom maɓɓe lanɗo Misira on bone. 2 Fir'awna tikkani ɓen mbatulaaɓe mun ɗiɗo, ɗun ko hooreejo juɗooɓe bireedi ɓen e hooreejo halfinaaɓe njaramji ɓen. 3 O nangi ɓe, o watti ɓe e juuɗe hooreejo aynooɓe kaso ngon, on naadi ɓe ka nder kaso ka Yuusufu sokaa ɗon. 4 Hooreejo aynooɓe kaso ngon ƴetti ɓen ɗiɗo halfini Yuusufu, on dankii ɓe. Ɓe neeɓi ton seeɗa e joge.5 Ɲande goo, ɓen mbatulaaɓe ɗiɗo, ɗun ko halfinaaɗo njaramji on e juɗoowo bireedi Fir'awna on, ɓen sokidaaɓe e kaso, hoyɗidi e nder jemma gooto, mo bee koyɗol feerewol, koyɗol kala e firo mun.
6 Ɓay weetii, Yuusufu ari ndartugol ɓe, tawi hiɓe aani. 7 Ontuma, o landii ɓen mbatulaaɓe Fir'awna, ɓe o sokidaa ka kaso jom makko, o wi'i ɓe: «E ko honɗun niɓɓituɗon hande?»
8 Ɓen jaabii mo: «Meɗen hoyɗi goɗɗun, kono alaa ko firana men.»
Yuusufu wi'i ɓe: «Wonaa Allaahu on firo woodani? Awa, yeetee lan ko hoyɗuɗon.»
9 Hooreejo halfinaaɓe njaramji ɗin fillitanii Yuusufu koyɗol mun ngol, o wi'i: «E nder koyɗol an ngol, mi yi'i delbol yeeso an. 10 Tawi ngol delbol no mari calɗi tati. Ɗin calɗi fiini, foƴƴi, waɗi dukke wiiɲu ɓenduɗe. 11 Tawi jardukun Fir'awna kun no e juuɗe an. Mi ƴetti ɓiɓɓe wiiɲu ɓen, mi haami ɗe ka jardukun Fir'awna, mi watti kun e juuɗe Fir'awna.»
12 Onsay Yuusufu wi'i mo: «Ko ɗunɗon firi: calɗi ɗin tati ko balɗe tati. 13 E nder balɗe tati Fir'awna ɓantay hoore maa nden, o jonnite darnde maa nden, wattaa mo jonnude njaramji makko ɗin, wano wonirannoɗaa mo non aranun. 14 Kono non ko yo a anditoy fii an, hollaa mi moƴƴere tuma heɓoyɗaa hettaare, wowlanaa Fir'awna fii an, wonanaa mi sabu yaltugol e nder ngoo kaso. 15 Ko fii min, ko ka leydi Aabirayankeeɓe ɓen mi jattaa. Awa ɗoo kadi hay fus mi bonnaa ko mi sokiree e nder kaa ngayka.»
16 Ɓay hooreejo juɗooɓe bireedi ɓen tawii ngon firo ɗon no moƴƴi, o wi'i Yuusufu: «Awa min, ko mi hoyɗi ko miɗo rondii debehoy tatoy bireedi. 17 Hari no ka nder debehun dowhun kala noone bireedi fii Fir'awna. Kono tawi colli ɗin no ɲaamude ko woni e nder kun debehun kun mi rondii.»
18 Onsay Yuusufu jaabii mo, wi'i: «Ko ɗunɗon firi: debehoy koy tatoy ko balɗe tati. 19 E nder balɗe tati Fir'awna ɓantay hoore maa nden, o taƴa nde, o wenge e leggal, colli ɗin ɲaama teewu maa ngun.»
20 Nden ɲalaande tammere hawri ko ɲalaande anditugol fii jibineede Fir'awna. O waɗani mbatulaaɓe makko ɓen caatal. O ɓanti hoore hooreejo halfinaaɓe njaramji ɓen e hoore hooreejo juɗooɓe bireedi ɓen e yeeso mbatulaaɓe makko ɓen. 21 O jonniti hooreejo halfinaaɓe njaramji makko ɗin darnde mun nden, on watti jardukun kun e juuɗe Fir'awna. 22 Onsay o wengi hooreejo juɗooɓe bireedi ɓen wano Yuusufu siforannoo ɓe non. 23 Kono hooreejo halfinaaɓe njaramji ɗin anditaali fii Yuusufu few, o yejjiti fii makko.