Fii no Yuusufu Tooɲiraa Sokaa
39
1 Ismaa'iilayankeeɓe ɓen naɓi Yuusufu Misira. Oo Misirayankoojo wi'eteeɗo Fuuti-Faara, mbatulaajo e hooreejo suufaaɓe Fir'awna ɓen, sooditi mo e juuɗe ɓen Ismaa'iilayankeeɓe.2 Tawi Joomiraaɗo on no wondi e Yuusufu, kala ko o golli kelɗa. Hari himo ka galle jom makko Fuuti-Faara, on Misirayankoojo. 3 Fuuti-Faara tawi Joomiraaɗo on no wondi e Yuusufu, kala ko o nangani, Joomiraaɗo on okkay mo kutu mun. 4 Yuusufu kurkanii jeyɗo mo on, o heɓi sulfu makko, on halfini mo galle mun ɗen, o watti kala ko o jeyi e juuɗe makko. 5 Gila ɲande o halfinnoo Yuusufu galle makko ɗen e kala ko o jeyi, Joomiraaɗo on waɗi barki e ɗen galle on Misirayankoojo sabu Yuusufu. Kin barki layi e kala ko on jeynoo, gila ka suudu haa ka gese. 6 O acci kala ko o jeyi e juuɗe Yuusufu, o haajanooka hay e huunde si hinaa ɲaametee makko on.
Tawi kadi Yuusufu ko moƴƴa mbaadiijo, labaaɗo. 7 Ɓay feƴƴii e ɗun, ɓeyngu jom makko watti tenƴinde Yuusufu, o wi'i mo: «Accu waaliden!»
8 Kono Yuusufu salii, o wi'i ɓeyngu jom makko: «E hino jom an haajaaka hay e huunde ka nder galle gaa. O wattii kala ko o jeyi e juuɗe an. 9 Hay gooto ɓuraa lan ka nder galle ɗoo. O toŋanaa lan hay fus si wonaa an, ɓay an ko a sonnaajo makko. Ko honno mi waɗirta on bakkatu njano, haa mi fawoo junuubu e yeeso Allaahu on?» 10 Tawi ɲande woo ɲande ko non o wowliranaynoo Yuusufu, kono on jaɓaali hay ɓattagol mo, hinaa fere waalida e makko.
11 Ɲande goo Yuusufu naati ka suudu fii gollugol, tawi hay gooto e yimɓe galle ɗen alaa ka nder suudu ton. 12 Onsay ɓeyngu Fuuti-Faara on nangi mo dolokke on, wi'i mo: «Waaliden.» Yuusufu wippitii, accidi mo e dolokke mun on, dogi, yalti.
13 Ɓay debbo on tawii Yuusufu accidii mo e dolokke mun on, dogii, yaltii, 14 o noddi gollooɓe ka nder galle ɓen, o wi'i: «Ndaaree, en addanaama Aabirayankeejo ko jiiɓa en. O yanii e an fii yo men waalidu. Kono mi sonki, mi noddi faabo. 15 Nde o tawnoo mi sonkii, mi noddii faabo, o accidimmi e dolokke makko on, o dogi, o yalti.»
16 Onsay debbo on wallini dolokke Yuusufu on takko mun haa moodi makko hewtiti. 17 O siforani nii moodi makko, o wi'i: «Oo jiyaaɗo Aabirayankeejo mo addanɗaa en ɗoo yanii e an fii jiiɓugol lan. 18 Ɓay mi noddii faabo, mi sonkii, o accidimmi e dolokke makko on, o dogi, o yalti.»
19 Ɓay Fuuti-Faara nanii ko ɓeyngu mun sifanii mo kon, wi'i: «E hino ko jiyaaɗo maa on waɗimmi kon», o tikki tikkudee, 20 o nangi Yuusufu, o soki mo ka kasooɓe lanɗo on sokii ɗon ka nder kaso. Yuusufu woni ɗon e joge.
21 Tawi Joomiraaɗo on no wondi e Yuusufu, o holli mo giggol tiiɗungol, o yeɗi mo sulfu yeeso hooreejo kaso ngon. 22 On hooreejo kaso ngon halfini Yuusufu kasooɓe wonɓe ton ɓen fow. Kala ko waɗetenoo ton ko Yuusufu fewjaynoo. 23 Hooreejo kaso ngon haajanooka hay e huunde e ko o halfini Yuusufu kon, ko fii Joomiraaɗo on no wondi e Yuusufu, himo okki mo kadi kutu e kala ko o huuwaynoo.