Fii Yahuuda e Tamaaru
38
1 Fewndo on saa'i Yahuuda woɗɗitoyii ben-gootooɓe mun ɓen, o yahi ka gorko Adulaamiyankeejo wi'eteeɗo Hiira. 2 Ko ɗon Yahuuda yi'i jiwo mo ben mun woni Kanaaniyankeejo wi'eteeɗo Su'aa. O tiggi mo, o watti mo e suudu. 3 On ƴetti reedu, o jibini boobo gorko, boobo on innaa Iiri. 4 O ƴetti kadi reedu, o jibini boobo gorko, o inni mo Uunaana. 5 O jibini fahin boobo gorko, o inni onɗon Siila. Fewndo o jibinta mo, tawi himo ka wi'etee ɗon Kaziiba.6 Onsay Yahuuda ƴettani Iiri, afo mun on, debbo wi'eteeɗo Tamaaru. 7 Tawi Iiri afo Yahuuda on ko bonɗo yeeso Alla, Joomiraaɗo on ƴettiti mo.
8 Ontuma Yahuuda wi'i Uunaana: «Yahu non jooni ka sonnaajo kotoo maa on, nattanaa mo ɲalaande, heɓanaa kotoo maa jurriya.» 9 Ɓay Uunaana no andunoo wonde ɓen ɓiɓɓe wonataa ɓiɓɓe mun, tuma o yiidunoo e ɓeyngu kotoo makko woo, o hibbayno maniiyu makko on ka leydi, fii tun wota o heɓan kotoo makko jurriya. 10 Tawi kon ko o waɗaynoo no boni ka Alla, Joomiraaɗo on ƴettiti mo kanko kadi.
11 Ontuma ben maɓɓe Yahuuda wi'i Tamaaru esiraawo mun on: «Yahu heynoyoɗaa ka galle ben maa en haa Siila mo an njanɗa.» (Tawi Yahuuda no sikka onɗon kadi maayiray wano kotiraaɓe mun ɓen maayiri non.) Tamaaru yahi, wonoyi ka galle ben mun.
12 Ɓay nettoyii, ɓeyngu Yahuuda on faatii, on ko jiwo Su'aa. Ɓay Yahuuda yarlike faatunde nden, o yahi Timnata ka taƴanooɓe mo leeɓi dammi makko ɗin woni ton, wondude e Hiira oo weldiɗɗo makko Adulaamiyankeejo. 13 Tamaaru ɓanginanaa ɗun, o wi'aa: «E hino ɗaa ka esiraaɓe maa ɓen yahata Timnata fii taƴoygol leeɓi dammi maɓɓe ɗin.»
14 Ɓay kanko Tamaaru o tawii Siila njanɗii kono haa jooni o tigganaaka mo, o ɓortii conci makko keyngu ɗin, o tiggii, o suumii. O jooɗoyii ka naatirgal hoɗo Aynayim, ɗun ko laawol Timnata.
15 Yahuuda yi'i mo, sikki ko o cagaajo sabu ko o buumii kon. 16 O gundii mo ka laawol, o wi'i mo: «Accu yiiden.» (Tawi Yahuuda anditaali ko esiraawo makko on non.)
On jaabii mo: «Ko honɗun okkataa mi fii yo en yiidu?»
17 O jaabitii: «Mi addante be'un an goo.»
Debbo on wi'i: «E hoore a accay ɗoo seedee haa addoyaa kun.»
18 Yahuuda jaabii: «Ko seedee honɗun mi jonnay-maa?»
Debbo on wi'i: «Ko maandinirɗun maa ɗun e lukkitorgol mun ngol e tuggordu ndu jogiɗaa ndun.» Ontuma o jonni mo, ɓe yiidi. (Ɓawto ɗun, Tamaaru ƴettani mo reedu.) 19 Tamaaru immii, yahi, onsay o itti tiggaare nden, o ɓornii conci makko keyngu ɗin.
20 Onsay Yahuuda jonni be'un kun oo weldiɗɗo makko Adulaamiyankeejo fii no o hettira seedeeji ɗi o accunoo e juuɗe debbo on ɗin. Kono on tawoyaali mo. 21 O landii yimɓe nokkuure ka on debbo wonnoo ɗon, o wi'i: «E ko honto oo debbo cagaajo, wonnooɗo laawol Aynayim woni?»
Ɓe jaabii mo: «Debbo cagaajo alaa ɗoo.»
22 O yiltitii ka Yahuuda, o wi'i mo: «Mi tawoyaali mo. Hay yimɓe nokkuure nden wi'ii lan wonde debbo cagaajo alaa ton.»
23 Yahuuda wi'i: «Yo o maru ko o jogii kon fii wota en wirtu hoore men. Min doo, mi naɓanii mo be'un kun, kono a tawaali mo.»
24 Ɓay wano lebbi tati feƴƴii, Yahuuda yeetaa wonde: «Tamaaru esiraawo maa on wonii jeenoowo. Hay o ƴettii reedu e nder jeeno makko ngon.»
Onsay Yahuuda wi'i: «Yaltinee mo, o sunnee.»
25 Ɓay ɓe fokkintinii mo ka yaasi, ontuma o nuli e esiraaɓe makko, o wi'i: «Ko oo gorko jeyɗo ɗii piiji ɗoo woni baaba nduu reedu an. Etee andon ko hombo jeyi oo maandinirɗun e lukkitorgol mun e nduu tuggordu.»
26 Yahuuda anditi ɗin piiji, o wi'i: «Oo debbo no ɓurimmi feewude, ɓay mi jombanaali mo Siila ɓiɗɗo an on.» Gila ɗun kanko e Yahuuda ɓe yiiditaali e mbalndi.
27 Ɓay fewndike ka o jibina, tawi ko funeeɓe o saawi. 28 Fewndo o jibinta, goɗɗo e maɓɓe yaltini jungo, debbo wallitotooɗo on nangi ngo, haɓɓi ngo gaarawol boɗewol, o wi'i: «Ko oo ɗoo attotoo yaltude.» 29 Kono on nattiti jungo ngon. Ciwto makko on yalti. Onsay debbo wallitotooɗo on wi'i: «Ko yolnde honde udditanɗaa hoore maa!» Ko ɗun waɗi si onɗon innaa Faarisa. 30 Ontuma ɗimmo on yalti, oo mo gaarawol boɗewol ngol woni ka jungo mun, ɓe inni onɗon Zaaraha.