Fii Koyɗi Yuusufu ɗin
37
1 Yaaquuba hoɗi e ndii leydi Kanaana ndi ben makko koɗinoo e mun. 2 E hino taariika Yaaquuba kan: Tawi Yuusufu paykun kun duuɓi sappoo e jeeɗiɗi no aynidaynoo e kotiraaɓe mun ɓen wuro. Kun paykun no wondunoo e ɓen ben-gootooɓe mun, ɗun ko ɓiɓɓe Bilhatu ɓen e ɓiɓɓe Zilfatu ɓen, ɓen rewɓe ben makko. Tawi non Yuusufu no yewtaynoo ben maɓɓe boneeji kotiraaɓe mun ɓen.3 Tawi non Isra'iila, ɗun ko ben maɓɓe Yaaquuba, no yiɗunoo Yuusufu ɓuri ɓiɓɓe mun ɓen fow, ko fii o daɲuno mo e nder nayeewu makko. O moƴƴinani mo dolokke pikkaaɗo. 4 Ben-gootooɓe makko ɓen tawi ben maɓɓe no yiɗunoo mo ɓuri ɓe fow, ɓe aɲi mo, ɓe wowlirantaano mo no newori.
5 Yuusufu hoyɗi koyɗol, o sifanii ngol ben-gootooɓe makko ɓen, ɓe ɓurti mo non aɲude. 6 O wi'i ɓe: «Heɗee non, mi sifanoo on koyɗol ngol mi hoyɗi ngol. 7 Tawi hiɗen e nder ngesa, hiɗen haɓɓa ba'e. Tun, waare an nden immii, darii, ba'e mon ɗen hunditi waare an nden, ɗe sujjani nde.
8 Onsay ben-gootooɓe makko ɓen wi'i mo: «Hara ko goonga a laamoto men, kaa hara ko haqiiqa a wonay fewjoowo e hoore amen kadi?» Ɓe ɓurti mo aɲude kadi sabu ɗin koyɗi e ɗin konguɗi makko.
9 O hoyɗi koyɗol goo kadi, o sifanii ngol ben-gootooɓe makko ɓen, o wi'i ɓe: «E hino ko mi hoyɗi kon kadi. Naange ngen e lewru ndun wondude e koode sappoo e go'o, no sujjanimmi.»
10 Ɓay o sifanike ɗun ben makko e ben-gootooɓe makko ɓen, ben makko feli mo, wi'i: «E ko honɗun ngol koyɗol maa firi? A sikku min e neene maa e ben-gootooɓe maa ɓen, men sujjante?» 11 Ben-gootooɓe makko ɓen ɓurti mo nawlude, kono ben makko mari ɗun maanditii.
Fii no Ben-Gootooɓe Yuusufu ɓen Yeeyirnoo mo
12 Ɲande goo, ben-gootooɓe makko ɓen yahuno Sakiima fii aynoygol wuro ben maɓɓe ngon. 13 Isra'iila wi'i Yuusufu: «Hiɗa andi ben-gootooɓe maa ɓen no yahi aynoygol Sakiima. Aru mi nule e maɓɓe.»
O jaabii ɓe: «Awa.»
14 Isra'iila wi'i mo: «Yahu ndaaroyaa si ben-gootooɓe maa ɓen no e jam, e si tawii wuro ngon no daɗi, araa humpitaa mi.» O immini mo ka aynde Habruuna fii yahugol Sakiima.
Ɓay Yuusufu hewtii Sakiima, 15 goɗɗo tawi himo jinda ka ladde, on landii mo: «E ko honɗun ɗaɓɓataa?».
16 O jaabii: «Ko ben-gootooɓe an ɓen mi woni ɗaɓɓitude. Yandi, yeeto lan ka ɓe woni aynirde.»
17 On neɗɗo wi'i mo: «Ɓe iwiino ɗoo, ko fii mi nanii hiɓe wi'a, ‹Mahen Duutaana.› »
Ontuma Yuusufu jokkiti ben-gootooɓe mun ɓen haa o tawoyi ɓe Duutaana. 18 Ɓe haynii himo ara ka woɗɗi. Ado o hewtude ka ɓe woni ɗon, tawi ɓe haldii sahinbingol mo. 19 Mo bee e maɓɓe wi'i: «E hino ɗaa hoyɗoowo on ka arata. 20 Jooni non, aree waren mo, untoyen mo e nder woyndu goo, wi'oyen ko kullii ɲaaɗungii ɲaami mo. Ontuma en yi'ay si ɗin koyɗi makko laatoyto.»
21 Ɓay Ruubaynu nanii ɗun, o eɓɓi jattitugol mo e juuɗe maɓɓe, o wi'i ɓe: «Wota en wonu sabu makko.» 22 Ruubaynu wi'i ɓe kadi: «Wota on hibbu dey ƴiiƴan, untee mo tun e nder nduu woyndu ka ladde ɗoo, wota on fawu mo jungo.» (Ko o wiirunoo ɗun ko fii no o dandira mo e juuɗe maɓɓe, o natta mo ka ben maɓɓe.)
23 Ɓay Yuusufu hewtii ka ben-gootooɓe mun ɓen woni ɗon, ɓe ɓorti mo dolokke on - on dolokke pikkaaɗo mo o ɓorninoo. 24 Onsay ɓe ƴetti mo, ɓe untoyi ka nder woyndu. Tawi hay huunde alaa e nder ndun woyndu, awa kadi ndiyan alaano e mayru.
25 Ontuma ɓe jooɗii fii ɲaamugol. Ɓe ɓantoyi gite maɓɓe, ɓe haynii lappol seteeɓe Ismaa'iilayankeeɓe no iwra leydi Galaada, ngelooɗi maɓɓe no rondii junjuranji e nebbeele wujeteeɗe e urngallooji ɗi ɓen naɓaynoo leydi Misira. 26 Onsay Yahuuda wi'i ben-gootooɓe mun ɓen: «Ko nafa honɗun woodani en warugol oo ben-gooto men suuɗen ƴiiƴan makko? 27 Accee yeeyen mo ɓee Ismaa'iilayankeeɓe, hara en fawaali mo jungo, ko fii oo ko ben-gooto men, ko enɗan men.» Ɓe nanani mo, ɓe jaɓi.
28 Ɓay ɓen njulaaɓe iwɓe Midiyaani hewtii ɗon, ben-gootooɓe Yuusufu ɓen ƴawni mo ka nder woyndu, ɓe yeeyi mo ɓen Ismaa'iilayankeeɓe tammaaji noogay kaalisi, ɓen naɓori mo Misira.
29 Ruubaynu aroyi non ka woyndu, o tawi Yuusufu alaa ton. O seeki conci makko ɗin. 30 O yiltii ka ben-gootooɓe makko ɓen, o wi'i ɓe: «Paykun kun alaa ton! E min non jooni ko honno mi waɗata?»
31 Ontuma ɓe hirsi ngaari mbeewa, ɓe ƴetti dolokke Yuusufu on, ɓe moddini mo ƴiiƴan. 32 Ɓe ƴetti on dolokke pikkaaɗo, ɓe naɓani ben maɓɓe, ɓe wi'i: «Awa meɗen yi'i ɗoo goɗɗun. Ndaaree si tawii ko dolokke ɓiɗɗo mon on nii, maa si hinaa.»
33 Yaaquuba anditi on dolokke, o wi'i: «Ko dolokke ɓiɗɗo an on tigi nii! Kullii ɲaaɗungii ɲaamii mo! Yuusufu waɗaama ceeli-ceeli!» 34 Yaaquuba seeki conci mun ɗin, o ɓaaɓii conci heynorɗi, o heynii ɓiɗɗo makko on balɗe buy. 35 Ɓiɓɓe makko worɓe e rewɓe ari yarlingol mo, kono o salii yarlineede, himo wi'a: «Ko e nder keyngu mi tippotoo ka wonunde mayɓe ɓen mi tawtoya ɓiɗɗo an on!» O lutti e fesugol Yuusufu mo makko.
36 Njulaaɓe iwɓe Midiyaani ɓen yeeyitoyi Yuusufu Misira. Ɓe yeeyi mo oo wi'eteeɗo Fuuti-Faara, on ko mbatulaajo e hooreejo suufaaɓe Fir'awna ɓen.