Fii no Yaaquuba Hootiri Kanaana
35
1 Allaahu on daalani Yaaquuba: «Immo, yahaa Bayti'iila, hoɗoyaa ton, darnoyaa ton layyorde fii on Allaahu feeɲannooɗo ma fewndo dogaynoɗaa kotoo maa Iisu.»2 Yaaquuba wi'i ɓeynguure mun nden e kala ɓe o wondunoo e mun: «Hawkee kala sanamuuji ɗi jogiɗon, laɓɓinon hoore mon, ɓornoɗon conci goo. 3 Immoɗen yahen Bayti'iila, mi darnoya ton layyorde fii oo Allaahu jaabinannooɗo lan fewndo mi maapinoo, on wondunooɗo e an e nder ndun yaadu an.» 4 Ɓe jonni Yaaquuba kala sanamuuji ɗi ɓe joginoo, wondude e koɗi noppi maɓɓe ɗin. Onsay Yaaquuba iri ɗi fow e ley ngal leggal njanal wonungal takko Sakiima.
5 Onsay ɓe iwi ɗon. Tun, kulol Allaahu on ari e hoore ɗen ca'e hunditunooɗe ɓe, hay gooto jokkitaano ɓiɓɓe Yaaquuba ɓen.
6 Yaaquuba hewti Luuzu, ɗun ko Bayti'iila, e ndii leydi Kanaana, kanko e jamaa mo o wondunoo on fow. 7 O waɗi ɗon layyorde, o wi'i nden nokkuure Al-Bayti'iila, ko fii ko ɗon Allaahu on feeɲannoo mo fewndo o dogaynoo kotoo makko.
8 Ɓay Dabuuratu, muyninnooɗo Rifqatu on, faatike, o surraa e ley ngal leggal wi'eteengal Leggal Wullaandu wongal ley Bayti'iila.
9 Ɓay Yaaquuba iwtii Fadaani-Araama, Allaahu on feeɲani mo kadi, waɗi barki e makko. 10 Allaahu on daalani mo: «Ko Yaaquuba wi'etenoɗaa, kono a wi'etaake hande kadi Yaaquuba, ko Isra'iila noddeteɗaa.» Ko nii o okkiri mo ndee innde *Isra'iila.
11 Allaahu on daalani mo kadi: «Ko min woni Alla Jom Ɓural, heɓu ɓiɓɓe, ɗuuɗaa. Jamaa iway e maa, moftal jamaaji iway e maa kadi. Awa kadi lamɓe yaltay e keeci maa. 12 Ndii leydi ndi mi yeɗi Ibraahiima e Issaaqa, mi yeɗete ndi, mi yeɗay ndi kadi jurriya maa aroyoowo ɓaawo maa on.» 13 Ɓay Allaahu on gaynii mo daalande ɗun e nden nokkuure, onsay Allaahu on ƴenti.
14 Yaaquuba darni hayre e nden nokkuure nde Allaahu on daalani mo e mun, o hibbi sadaka hibbeteeɗo e hoore mayre, o juuri nde kadi nebban. 15 Yaaquuba inni nden nokkuure nde Allaahu on daalani mo e mun Bayti'iila.
Fii Jibineede Buniyamiinu e Mayde Raahiilu
16 Ɓe iwi Bayti'iila, tawi hakkunde ɗon e Ifraata no pooɗii, ɗun hawrondiri e jibingol Raahiilu, o heɓi satteende e mun fota. 17 Fewndo ŋata on fiɗi mo, debbo wallitotooɗo mo on wi'i mo: «Wota a hulu ko fii a heɓii kadi boobo gorko.» 18 Fewndo Raahiilu timmata, o inni boobo on *Buni-Awni, kono ben boobo on inni mo *Buniyamiinu. 19 Raahiilu faatii, o surraa ka laawol Ifraata, ɗun ko Bayti-Lahiimi. 20 Yaaquuba waɗi hayre ka hoore yenaande, nden hayre ko maandinorde yenaande Raahiilu nden haa jooni.
21 Isra'iila iwi ɗon, o darnoyi suudu makko bagi ndun gaɗa *Magdal-Idri. 22 Fewndo Isra'iila hoɗunoo e ndin leydi, Ruubaynu yahi waalidoyi e Bilhatu, *taaraajo ben makko on. Ben makko Isra'iila humpitii fii ɗun.
Ɓiɓɓe worɓe Yaaquuba ɓen ko ɓe sappoo e ɗiɗo:
23 Ɓiɓɓe Layyatu worɓe ɓen, ko Ruubaynu afo Yaaquuba on, e Sim'uunu e Lewi e Yahuuda e Yassaakara e Zabuluunu.
24 Ɓiɓɓe Raahiilu ɓen kadi ko Yuusufu e Buniyamiinu.
25 Ɓiɓɓe Bilhatu, korɗo Raahiilu on, ko Daana e Naftali.
26 Ɓiɓɓe Zilfatu, korɗo Layyatu on kadi, ko Gaada e Asiira.
Ko ɓee ɗoo woni ɓiɓɓe worɓe Yaaquuba ɓe o daɲanaa Fadaani-Araama ɓen.
Fii Mayde Issaaqa
27 Yaaquuba arti takko ben mun Issaaqa, ɗun ko Mamra, ka wi'etee ɗon Qiriyat-Arba'a e ndii leydi Habruuna, ka Ibraahiima e Issaaqa arnoo koɗii ɗon. 28 Ngurndan Issaaqa ɗan hawruno duuɓi teemedere e cappanɗe jeetati. 29 O foofi foofaango sakkitoro, o faatii, o tawtoyi maamaaɓe makko ɓen, tawde o yeɗaama ngurndan e balɗe. Ɓiɓɓe makko ɓen Iisu e Yaaquuba wattini mo.