Fii no Sakiima Dooliri Diinatu
34
1 Diinatu, on jiwo mo Layyatu jibinani Yaaquuba, yalti fii yiidugol e jiwɓe leydi ndin. 2 Sakiima, ɓiɗɗo Hamuura Hiwiyankeejo on, ɗun ko lanɗo leydi ndin, yi'i mo, nangi mo, waalidi e makko, hersini mo. 3 O watti Diinatu, on jiwo Yaaquuba, wonkii makko. O yiɗi jiwo on fota, o mbelɗii ɓernde jiwo on. 4 Sakiima wi'i Hamuura ben mun: «Resanee lan oo jiwo.»5 Fewndo Yaaquuba nani wonde Diinatu jiwo makko on tuuninaama, tawi ɓiɓɓe makko worɓe ɓen no yahi ngayna. O jebbilii haa ɓen arti.
6 Hamuura ben Sakiima yahi ka Yaaquuba fii yewtidugol e makko. 7 Ɓay ɓiɓɓe Yaaquuba ɓen iwtii aynugol, ɓe humpitii ɗun. Ɓe ŋalɗi, ɗun metti ɓe, ɓe tikki fota, sabuna Sakiima waɗii borre-ɲaa ka ɓeynguure Isra'iila, fii ko o dooli jiwo Yaaquuba on kon, ɗun wonaa ko haani.
8 Hamuura wi'i ɓe: «Sakiima, oo ɓiɗɗo an, waɗii ɓernde mun nden fow e oo jiwo mon. Mi torike on, okkanee lan mo oo jiwo mon, o resa. 9 Ƴettindiranen, men ƴetta jiwɓe mon ɓen, onon kadi ƴetton jiwɓe amen ɓen. 10 Hoɗiden, ɗun leydi ndin wonay e sookeeje mon. Hoɗon, njuloɗon, ɗaɓɓon halal ɗoo.»
11 Sakiima wi'i ben Diinatu e kotiraaɓe Diinatu ɓen: «Si on sulfinanii lan, mi ittay ko landiɗon mi woo. 12 Happanee lan teŋe yottiiɗo e jawdi ƴamal no ndi foti woo, mi jonnay on. Kono okkee lan tun jiwo mon on, mi resa.»
13 Ɓiɓɓe Yaaquuba ɓen jaabori Sakiima e ben mun Hamuura ƴoyre, ɓay hari Sakiima tuuniniino Diinatu bandiraawo maɓɓe on. 14 Ɓe wi'i ɓe: «Menen, ko huunde sattande men non nde men waawataa waɗude, okkugol bandiraawo amen on aaden mo sunninaaka, ko fii ɗun no hersinanii men. 15 Men newnanii on faale mon on woo, si tawii on wa'ii wano men wa'i non, hara kala duhiiɗo e mon sunninte. 16 Ontuma men okkoyay on jiwɓe amen ɓen, menen kadi men ƴettana on jiwɓe mon ɓen, hoɗiden, wonten jamaa gooto. 17 Kono si on jaɓaali sunnineede, men ƴettay jiwo amen on, men yaha.»
18 Tawi ɗin konguɗi maɓɓe ɗon no henani Hamuura e Sakiima ɓiɗɗo mun on. 19 Suka on nennaaki waɗugol ɗun, ko fii himo jiɲani jiwo Yaaquuba on fota, tawi kadi ko kanko woni ɓiɗɗo ɓuraaɗo teddineede on ka galle ben makko.
20 Hamuura e Sakiima ɓiɗɗo mun on yahi ka naatirgal saare maɓɓe, ɓe wi'i worɓe saare maɓɓe nden: 21 «Ɓee arɓe ɗoo no wondani en e ɓuttu, yo ɓe wonu ka leydi ɗoo, ɓe golla e mayri, ko fii leydi ndin no yaaji beru maɓɓe. En ƴettay jiwɓe maɓɓe ɓen, enen kadi okken ɓe jiwɓe men ɓen. 22 Kono non ɓee worɓe jaɓii hoɗidugol e men, wonten jamaa gooto woo, si tawii kala duhiiɗo e men sunninirte wano maɓɓe non. 23 Taw si ɗee gureele maɓɓe e jawle maɓɓe e ko hedditii fow wontanay en? Jaɓen tun faale maɓɓe on fii yo ɓe hoɗidu e men.»
24 Kala tawanooɗo e ngal mottondiral ka naatirgal saare nani ko Hamuura e Sakiima ɓiɗɗo mun on wowli kon, jaɓi, sunninaa.
25 Ɲande timmunoo balɗe tati, hari hiɓe wondi e muuseendi, onsay ɓiɓɓe Yaaquuba worɓe ɓen ɗiɗo, ɗun ko Sim'uunu e Lewi, ɓen ko kotiraaɓe Diinatu, mo kala e maɓɓe ƴetti kaafa, ɓe naati e ndee saare ɓuttunde, ɓe wari kala gorko. 26 Ɓe wariri Hamuura e Sakiima ɓiɗɗo mun on kaafa, ɓe ƴetti Diinatu ka galle Sakiima, ɓe yahi. 27 Ɓiɓɓe Yaaquuba ɓen ari e mayɓe ɓen, ɓe jatti keyeeji saare nden, sabu ko bandiraawo maɓɓe on tuuninanoo kon. 28 Ɓe ƴetti na'i ɗin e dammi ɗin, wondude e mbabbi ɗin e kala ko wonnoo ka saare e ka gese, 29 ɓe halori jawle ɗen fow wondude e ɓikkoy e rewɓe, ɓe jatti kala ko wonnoo ka galleeji ton.
30 Ontuma Yaaquuba wi'i Sim'uunu e Lewi: «On addanii lan sokola e hoore ɲiddingol lan e hakkunde ɓee hoɗuɓe e ndii leydi, wano ɓee Kanaaniyankeeɓe e ɓee Feriiziyankeeɓe. Hiɗon andi min mi ɗuuɗiraaka yimɓe, si ɓe hawtitii e hoore an, ɓe piyay lan haa ɓe mulidammi e ɓeynguure an nden.»
31 Kono ɓiɓɓe makko ɓen jaabii mo: «Ko honɗun o waɗirani nii bandiraawo amen on wa si on ko cagaajo?»