Fii no Yaaquuba Yiidiri e Iisu
33
1 Yaaquuba ɓanti gite, haynii Iisu no ara wondude e worɓe teemeɗɗe nayo. Onsay o senditi ɓiɓɓe ɓen e hakkunde Layyatu e Raahiilu e horɓe ɓen ɗiɗo. 2 O feƴƴini horɓe ɓen e ɓiɓɓe mun ɓen yeeso, o hikkini ɗon Layyatu e ɓiɓɓe mun ɓen, o watti Raahiilu e Yuusufu ɓaawo. 3 Onsay kanko tigi o hikkii yeeso maɓɓe, himo waɗa yaha jiccoo haa timmi laabiiji jeeɗiɗi, hawri o ɓadondirii e kotoo makko. 4 Onsay Iisu dogi fotti e makko, hirbii mo, wengii e daande makko, lunnii mo, tun ɓe fesi. 5 Iisu ɓanti gite, o yi'i rewɓe ɓen e fayɓe ɓen, o wi'i: «E ko homɓe woni ɓee ɓe wonduɗaa?»Yaaquuba jaabii: «Ko ɓee fayɓe ɗoo Allaahu on yeɗirimmi sulfu mun on, min nduu kurkaadu maa.» 6 Onsay horɓe ɓen wondude e ɓiɓɓe mun ɓen ɓadii ɓe, jiccii. 7 Layyatu e ɓiɓɓe mun ɓen kaɲun kadi ɓadii ɓe, jiccii. Ontuma Yuusufu e Raahiilu kadi ɓadii jiccii.
8 Ontuma Iisu wi'i: «E ko honɗun waɗataa ɗee gure ɗe mi fotti e mun fow?»
Yaaquuba jaabii: «Ko fii heɓugol sulfu mon, onon koohoojo an on.»
9 Iisu wi'i: «Miɲan, a tawdan e ngalu, maru ko jeyɗaa kon.»
10 Yaaquuba jaabii mo: «Oo'o, mi jeejii ma, si tawii a sulfinanii lan, jaɓu koo ko mi neldu-maa. Ko fii miɗo ndaarira yeeso maa ngon wano mi ndaarirta Allaahu on non, ɓay a jaɓɓorii lan no moƴƴiri. 11 Mi torike ma, jaɓu ndii neldaari ndi mi neldu-maa, ɓay Allaahu on yeɗii lan sulfu, miɗo yonni fow.» O jeeji ɗon Iisu haa on jaɓi.
12 Iisu wi'i: «Immoɗen yahen, mi hikkanto en yeeso.»
13 Yaaquuba jaabii: «Koohoojo an, hiɗon andi miɗo wondi e fayɓe ɓe aƴƴaa, e kadi miɗo wondi e baali e na'i muynooji, si en karhii yaadu majji on, hay si ko ɲallal gootal, dammi ɗin fow yeway. 14 Koohoojo an, hikkee yeeso an, min nduu kurkaadu mon, min mi jokkiray doy no fayɓe ɓen e wuro hikkiingo yeeso an ngon waawiri yaarude woo, haa mi hewtoya ka mon, leydi Sa'iira, yo koohoojo an.»
15 Iisu wi'i: «Awa yo mi accide e yimɓe an goo.»
Yaaquuba jaabii: «Hara ko fii honɗun? Min yo mi heɓu tun sulfu e mon, yo koohoojo an.»
16 Nden ɲande Iisu nangiti laawol Sa'iira. 17 Kono Yaaquuba kaɲun yahi Sukuuta, o darnani hoore makko suudu, o waɗani gureele makko ɗen togooji. Ko ɗun waɗi si nden nokkuure wi'aa *Sukuuta.
Fii no Yaaquuba Hewtitiri Kanaana
18 Ɓay Yaaquuba iwii Fadaani-Araama, o hewti e jam moƴƴere e ndee saare Sakiima jeyaande e ndii leydi Kanaana, o daakii ka sera saare ɗon. 19 O soodi e juuɗe ɓiɓɓe Hamuura, ɗun ko ben Sakiima, tumbere leydi nde o darnunoo suudu makko bagi e mun nden. O yoɓani nde tammaaji teemedere. 20 O darni ɗon layyorde, o inni nden *Al-Allaahu Isra'iila.