32
1 Bimbi nden ɲande Labaanu immii law, o hirbii ɓiɓɓe makko ɓen e taaniraaɓe makko ɓen, o du'anii ɓe. Ontuma o immii fii hootugol ka makko. 2 Yaaquuba kadi nangiti laawol mun. Malaa'ikaaɓe Alla ari fotti e makko. 3 Ɓay Yaaquuba yi'ii ɓe, o wi'i: «Ɗoo ko daaka Allaahu!» O toɗɗanii nden nokkuure innde *Mahanayiima.Fii Nulal Yaaquuba ngal e Iisu
4 Yaaquuba nuli woɓɓe ko hikkoo yeeso makko yaha ka kotoo makko Iisu e ndii leydi Sa'iira, ka fulawaa Aduuma. 5 O yamiri ɓe, o wi'i: «E hino ko wi'oyton Iisu koohoojo an on kon: ‹Yaaquuba nduu kurkaadu mon wi'ii wonde: Ko haa hande mi koɗinoo ka kaawu an Labaanu. 6 Miɗo jogii na'i e dammi e mbabbi e kurkaaduuɓe worɓe e rewɓe. Mi imminii ko andinoya on onon koohoojo an on fii yo on sulfinanan.› »
7 Ɓay ɓen ɓe Yaaquuba nulunoo artii, ɓe wi'i mo: «Men yahii haa ka kotoo maa Iisu, kanko tigi himo arude fottugol e maa, himo wondi e worɓe teemeɗɗe nayo.»
8 Yaaquuba huli fota, o maapii. O senditi yimɓe makko ɓen, o waɗi ɓe mojobe ɗiɗi, o waɗiri non kadi dammi ɗin e na'i ɗin e ngelooɗi ɗin, 9 o wi'i: «Si Iisu fottii e konu aranu ngun, o foolii ngun, no gasa ka konu ɗimmu ngun daɗoya.»
10 Onsay Yaaquuba torii Alla, o wi'i: «Yaa an Alla ben an Ibraahiima, yaa an Alla ben an Issaaqa, Joomiraaɗo, ko an yamirimmi, wi'i: ‹Yilto ka leydi maa e ka musidal maa, mi moƴƴoto e maa.› »
11 Yaaquuba wi'i kadi: «Mi hewtaa ngol giggol sella-findewol ngol waɗanɗaa mi, min nduu kurkaadu maa. Fewndo mi lumbaynoo Yurdayniwol, tawi ko tuggordu an ndun tun mi joginoo, jooni non mi wontii mojobe ɗiɗi. 12 Dandan masiibo kotoo an Iisu, ko fii miɗo huli wota o aru, o piyammi, o piyidammi e rewɓe an ɓen e ɓiɓɓe mun ɓen. 13 Ɓay a wi'uno lan: ‹Mi moƴƴoto e maa, mi yaɲɲira jurriya maa on wa ndii njaareendi ka baharu ndi limotaako.› »
14 Ko ɗon Yaaquuba waalunoo. O ƴetti e nder jawle makko ɗen ko o nelda kotoo makko Iisu, 15 ɗun-le ko: be'i teemeɗɗe ɗiɗi deyi e ciikuliiji noogay, baali teemeɗɗe ɗiɗi deyi e ga'i baali noogay, 16 ngelooɗi cappanɗe tati deyi wondude e ɓikkoy mun muynaykoy, kolce cappanɗe nay na'i e ga'i sappo, mbabbi noogay deyi e mbabbi sappo gori.
17 O ƴetti ɗi, o halfiniri kurkaaɗi makko ɗin wuro wuro, o wi'i ɓe: «Hikkee yeeso an, waɗon sagara hakkunde gure ɗen.» 18 O yamiri hikkiiɗo yeeso on, o wi'i: «Si a fottii e kotoo an Iisu, o landike ma: ‹Ko hombo jeyu-maa e ko honto yahataa, e ko hombo jeyi ngoo wuro wongo yeeso maa?›, 19 a jaaboray mo nii, wi'aa: ‹Ko Yaaquuba, kurkaadu maa ndun jeyi ɗi, ko Iisu koohoojo an on neldaa ɗi, kanko tigi himo arude ɓaawo amen.› »
20 O yamiri ɗun kadi ɗimmo on e tammo on e kala jokkuɓe ɗen gure. O wi'i ɓe: «Ko nii yewtirton Iisu nde fottuɗon e makko woo, 21 on wi'ay: «E hino Yaaquuba, kurkaadu maa ndun, kaɲun kadi, ka arata ɓaawo amen too.» (Tawi Yaaquuba no miijoo: «Mi walliniray ɓernde makko nden ndii neldaari ndi mi ardini yeeso an ɗoo. Onsay si men yiidii, no gasa o jaɓɓoray lan welo-welo.»)
22 O hikkini neldaari ndin yeeso, e nden jemmaare ɗon o waali ka daaka. 23 O immii e nder on jemma, o ƴetti rewɓe makko ɓen ɗiɗo e horɓe makko ɓen ɗiɗo e ɓiɓɓe makko ɓen sappoo e goo, o lumbi Yabuukawol. 24 O ƴetti ɓe, o lumbiniri ka lumbirde, wondude e ko o jeyi kon fow.
Fii Tippiro Yaaquuba ngon
25 Ɓay Yaaquuba luttitii kaɲun tun ɓaawo, gorko ari, yani e makko, ɓe piiri haa ka peeral fajiri. 26 Nde on tawnoo foolataa mo, o uttii mo ka keeci, keeci Yaaquuba ɗin jolkitii e nder ko ɓe piirata kon. 27 Onsay on gorko wi'i mo: «Accitan mi yaha, ɓay fajiri on feerii!»
Yaaquuba jaabii mo: «Mi accitataa ma fannii a du'anaaki lan.»
28 Gorko on wi'i mo: «E ko honno wi'eteɗaa?»
O jaabii: «Ko Yaaquuba».
29 Gorko on wi'i mo: «A wi'etaake Yaaquuba hande kadi, jooni ko *Isra'iila wi'eteɗaa, ko fii a catike e Alla e neɗɗanke, a heɓii polgal.»
30 Yaaquuba landii mo, wi'i: «Yandi, yeeto lan no inneteɗaa!»
On jaabii mo: «Ko honɗun landantoɗaa innde an nden?» Onsay on gorko du'anii mo ɗon.
31 Yaaquuba toɗɗanii nden nokkuure innde, o inni nde *Fanuu'iila, ko fii o wi'uno: «Mi yi'ii Allaahu on gite e gite, kono wonkii an kin daɗii.»