Fii no Yaaquuba Yiltitori Kanaana
31
1 Yaaquuba nani konguɗi ɓiɓɓe Labaanu ɓen, ɓen no wi'a: «Yaaquuba ƴettii ko ben men marnoo kon fow, ko ndii jawdi ben amen o heɓiri ɗee jawle ɗoo fow.» 2 Yaaquuba ndaari tawi ndarɗe Labaanu ɗen wa'anaa mo wano woowiri non.3 Ontuma Joomiraaɗo on daalani Yaaquuba: «Yiltito ka leydi baabiraaɓe maa ɓen, ka musidal maa, mi wonday e maa.»
4 Yaaquuba nulani Raahiilu e Layyatu yo ɓen yahu, ɓe fottoya ka wuro makko. 5 O wi'i ɓe: «Mi ndaarii mi tawii ndarɗe ben mon ɗen wa'anaa lan wano woowiri non, kono min, Alla ben an on no wondi e an. 6 Onon tigi hiɗon andi mi yanganike ben mon, beru doole an ɗen fow. 7 Awa kadi ben mon janfike lan, o yiltindirii njoddi an ndin laabi sappo. Kono Allaahu on newnanaali mo waɗugol lan ko boni. 8 Si o wi'uno: ‹Toɓɓaaɗi ɗin wonay njoddi maa›, harayno dammi ɗin fow rimayno toɓɓaakoy. Si o wi'uno kadi: ‹Ciifinɗi ɗin fow wonay njoddi maa›, harayno dammi ɗin fow rimayno ciifinkoy. 9 Ko non Allaahu on jaɓitiri wuro ben mon ngon e juuɗe makko, o yeɗimmi.
10 «Ɓay saa'i ka dammi ɗin hubindiraynoo ɗon hewtii, mi hoyɗi ciikuliiji wondinaynooɗi ɗin no waɗi ciifi e toɓɓe e baadoy. 11 Malaa'ikaajo Allaahu on wi'immi e nder ngol koyɗol: ‹Yaaquuba!›
«Mi jaabii: ‹Naamu, e hino lan!›
12 «O wi'i kadi: ‹Ɓantu gite maa ɗen, ndaaraa, ciikuliiji wonɗi wondinde ɗin fow ko waɗuɗi ciifi e toɓɓe e baadoy, ko fii mi yi'ii ko Labaanu waɗu-maa kon fow. 13 Ko min woni Alla on daalannooɗo ma e ndee nokkuure Bayti'iila nde darnunoɗaa hayre e mun, maandinirɗaa hibbugol nebban e hoore mayre, ka waɗannoɗaa mi ɗon woondoore. Jooni non, immo, yaltaa e ndii leydi, hootaa ka jibinaɗaa ton.› »
14 Onsay Raahiilu e Layyatu jaabii moodi mun: «Taw si meɗen mari kadi ndondi maa geɓal ka galle ben amen ɗoo? 15 Taw si ben amen waɗaano men jananɓe? Ko fii ɓe yeeyiino men, ɓe ɲaamii coggu amen ngun. 16 Kala jawdi ndi Allaahu on ƴettiti e juuɗe ben amen, ko menen e ɓiɓɓe amen ɓen jeyi. Jooni non, waɗee kala ko Allaahu on daalani on.»
17 Onsay Yaaquuba immii, ƴawni ɓiɓɓe makko ɓen e rewɓe makko ɓen ka hoore ngelooɗi. 18 O naɓori gureele makko ɗen fow, e kala jawle ɗe o mooɓunoo Fadaani-Araama, o yaari ka ben makko Issaaqa, ɗun ko e ndii leydi Kanaana.
19 Ko fewndo Labaanu yahi taƴoygol leeɓi dammi mun ɗin, Raahiilu ari wujji sanamuuji ben mun ɗin. 20 Yaaquuba kaɲun janfii Labaanu, Araamiyankeejo on, ɓay o ɓanginanaali mo eggudu makko ndun. 21 O immii, o dogidi e kala ko o marnoo, o lumbi maayo ngon, o yaari ka pelle Galaada.
Fii no Labaanu Jokkitiri Yaaquuba
22 Ka ɲallal tammal, Labaanu andinaa wonde Yaaquuba dogii. 23 Onsay Labaanu immodi e musiɓɓe mun ɓen, ɓe jokkiti mo e nder balɗe jeeɗiɗi, ɓe tawoyi mo ka pelle Galaada. 24 Kono e nder jemmaare, Allaahu on feeɲani Labaanu, on Araamiyankeejo, e nder koyɗol, o daalani mo: «Reeno yewtoygol Yaaquuba ko woni woo, woni bonii woni moƴƴii.»
25 Ɓay Labaanu hewtitike Yaaquuba, tawi Yaaquuba darnii suudu makko bagi ndun ka hoore fello. Labaanu e musiɓɓe mun ɓen kadi darni ka pelle Galaada ɗon.
26 Onsay Labaanu wi'i Yaaquuba: «Ko honɗun waɗuɗaa? Ko fii honɗun janfaniɗaa mi, si soggiraa jiwɓe an ɓen wa kasooɓe hare? 27 Ko honɗun moltaniɗaa doguɗaa, suuɗiɗaa mi, a andinaali lan? Andu-le mi newnanteno yahaa e nder yima ama, hoɗa korli, senƴina talinji. 28 E ngal ɗoo a gerdii komoyaagal, ɓay a newnanaali lan waynondirgol e jiwɓe an ɓen e taaniraaɓe an ɓen. 29 Miɗo marnoo feere waɗugol on ko boni, kono e oo jemma feƴƴuɗo, Alla ben maa on daalanno lan, o wi'i: ‹Reeno yewtoygol Yaaquuba ko woni woo, woni bonii woni moƴƴii!› 30 Jooni non, a yahii yahudee sabu sawteende galle ben maa ɗen, kono ko fii honɗun non wujjanɗaa mi allaaji an ɗin?»
31 Onsay Yaaquuba jaabii Labaanu, o wi'i: «Hari miɗo huli wota on jattitanan jiwɓe mon ɓen. 32 Kono non kala on mo yiiruɗon allaaji mon ɗin ko rammoowo! Jooni non ndaaree e yeeso ɓee musiɓɓe men ɗoo, kala ko jeyɗon ka an ɗoo, ƴetton.» Kono tawi Yaaquuba andaa wonde Raahiilu wujjiino allaaji ɗin.
33 Onsay Labaanu naatoyi ka suudu bagi Yaaquuba e ka suudu Layyatu e ka suudu horɓe ɓen, o yiitaali hay huunde. O yalti ka suudu Layyatu, o naati ka suudu Raahiilu. 34 Tawi Raahiilu ƴettiino sanamuuji ɗin, o suuɗii ɗi ka hirke ngelooba mban, o jooɗike e hoore majji. Labaanu ɗaɓɓiti e nder suudu ndun fow, o yiitaali hay huunde. 35 Onsay Raahiilu wi'i ben mun: «Wota on tikku yo baaba en fii ko mi immaaki kon ka mi jooɗii ɗoo, ko fii miɗo wondi e farilla.» Ben makko Labaanu ɗaɓɓiti sanamuuji ɗin, yiitaali.
36 Tikkere Yaaquuba nden ɓeydii, o yeddondiri e Labaanu. Onsay Yaaquuba jaabii Labaanu, o wi'i: «Ko honɗun mi bonni, e ko junuubu hombo mi waɗi, si jokkiron mi ɓernde sattunde? 37 Ɓay on ndaarii e nder pawle an ɗen fow, ko honɗun yi'uɗon e ko jeyaa ka suudu mon? Hollon mi ɗun tigi e yeeso siɓɓe men ɓen ɗoo, ɓe wona seedee hakkunde men, enen ɗiɗo. 38 Gila mi ari ka mon ɗoo heɓii nii duuɓi noogay, hay nde wootere be'i mon ɗin e baali mon ɗin hawkaali. E hoore ɗun kadi mi ɲaamaali ga'i baali wuro mon ngon. 39 Awa kadi si dammol waranooma e ladde, mi artirantaano on, haray ko min fawtinoo ɗun. E hoore ɗun, on landitotono lan kala ko wujjaa e nder mun, jemma e ɲalorma. 40 E hino no mi wonirnoo, ɲallal ngal fow nguleendi no piyammi, jemma on fow miɗo ngoɓa jaangol haa ŋorre an fow fuutoo mi. 41 Ko ɗunɗoo mi feƴƴini e nder ɗii duuɓi noogay ka galle mon. Mi kurkanike on duuɓi sappoo e nay fii resugol jiwɓe mon ɓen ɗiɗo, duuɓi jeegoo fii heɓugol ka dammi mon, e hoore ɗun on yiltindirii njoddi an ndin laabi sappo. 42 Si Alla ben an, on Alla Ibraahiima, on Alla mo Issaaqa hulata, wondaano e an, on accitayno lan e hoore jungo meho. Kono Allaahu on yi'i tampere an nden e yangi juuɗe an ɗen, onsay o heƴi hakkunde men hanki jemma.»
43 Onsay Labaanu wi'i mo: «Ɓee rewɓe ko ɓiɓɓe an, ɓee ɓiɓɓe maɓɓe ko taaniraaɓe an, ngoo wuro ko wuro an, e kala ko yi'uɗaa ɗoo ko min jeyi. Hara hande ko honɗun mi waawi waɗande ɓee ɓiɓɓe an rewɓe e ɓee ɓiɓɓe maɓɓe ɓe ɓe jibini? 44 Jooni non, aru enen ɗiɗo, ƴettoden ahadi, ko wona seedee hakkunde an e maa.»
45 Ontuma Yaaquuba ƴetti hayre, o darni nde fii maandingol. 46 Yaaquuba wi'i musiɓɓe mun ɓen: «Mooɓee kaaƴe.» Ɓe hocci kaaƴe, ɓe waɗi mowre. Ɓe jooɗii e hoore nden mowre, ɓe nafii. 47 Labaanu toɗɗii nden nokkuure *Yagar-Sahaduuta. Yaaquuba kaɲun inni nden nokkuure Galiidu.
48 Labaanu wi'i: «Ndee mowre ɗoo wonii seedee hakkunde men hande.» Ko ɗun waɗi si ɗon innaa *Galiidu. 49 Ɗon no wi'ee kadi Misfaata, ɓay Labaanu wi'uno: «Yo Joomiraaɗo on aynu hakkunde men tuma wirnondirɗen. 50 Si a tilfii ɓiɓɓe an rewɓe ɓen, maa a resii rewɓe goo, a wattii e maɓɓe, haray wonaa neɗɗo wonata hakkunde men, maanditoɗaa wonde ko Alla wonata seedee hakkunde men.»
51 Ontuma Labaanu wi'i Yaaquuba kadi: «E hino ɗoo ndee mowre kaaƴe e ndee hayre dariinde ɗe mi waɗi hakkunde men. 52 Ndee mowre e ndee hayre ko seedee. Mi yawtataa ndee mowre mi yaara ka maa, an kadi wota a yawtu ndee mowre ardaa ka an fii waɗugol bone. 53 Yo Alla Ibraahiima on, on Alla Naahuura, on Alla ben maɓɓe, ɲaawu hakkunde men.»