30
1 Ɓay Raahiilu tawii jiidanaaki Yaaquuba, onsay o nawli jaaja makko. O wi'i Yaaquuba: «Jonnan, min kadi ɓiɓɓe, si hinaa ɗun mi maayay!»2 Ɓernde Yaaquuba metti kisan, o wi'i Raahiilu: «Hara ko min woni Alla, on salaniiɗo ma jiidi?»
3 Raahiilu wi'i mo: «E hino ɗoo Bilhatu, korɗo an on, yiidu e makko, o jibinanammi ka hoore koyɗe an ɗoo, min kadi mi heɓa ɓiɓɓe immorde e makko.»
4 O okki mo Bilhatu, korɗo makko on, ko wonana mo ɓeyngu, Yaaquuba yiidi e makko. 5 Ontuma Bilhatu ƴetti reedu, o jibinani Yaaquuba boobo gorko. 6 Raahiilu wi'i: «Ɓay Allaahu on ɲaawiranii lan nii, o jaabinanii lan, o yeɗii lan boobo gorko.» Ko ɗun waɗi si o inni on boobo *Daana.
7 Bilhatu, on korɗo Raahiilu, ƴetti fahin reedu, o jattorani mo boobo gorko. 8 Raahiilu wi'i: «Mi gertike jaaja an ko tiiɗi, haa mi wawtike mo.» O inni on boobo ɗon *Naftali.
9 Ɓay Layyatu kadi tawii accii jiidi, o ƴetti Zilfatu, korɗo makko on, o okki Yaaquuba ko wonana mo ɓeyngu. 10 Zilfatu, korɗo Layyatu on, jibinani Yaaquuba boobo gorko. 11 Layyatu wi'i: «Mi arsikaama!» O wi'i on boobo *Gaada.
12 Zilfatu, korɗo Layyatu on, jattorani Yaaquuba boobo gorko. 13 Layyatu wi'i: «Eppa mi malii! Rewɓe ɓen wi'ay ko mi malaaɗo.» O inni on boobo *Asiira.
14 Ruubaynu yalti fewndo soɲitugol ngawri, o tawi leɗɗe lekki jiidi ka ngesa, o addorani ɗen neene makko Layyatu. Ontuma Raahiilu wi'i Layyatu: «Mi torike ma, okkoran ɗee leɗɗe lekki jiidi ɗe oo ɓiɗɗo maa addan-maa!»
15 On jaabii mo: «Kere ko jattuɗaa moodi an kon yonaali ma haa ka ƴettaa kadi ɗee leɗɗe lekki jiidi ɗe oo ɓiɗɗo an addanimmi?»
Ontuma Raahiilu jaabii: «Awa jooni on yiiday e nder oo jemma ɗoo fii yo mi heɓu ɓiɓɓe leɗɗe ɗe oo ɓiɗɗo maa addan-maa.»
16 Kiikiiɗe ko moodi maɓɓe Yaaquuba iwtata golle, Layyatu yalti, jaɓɓii mo, wi'i: «Ko ka an naatirton, ko fii ko leɗɗe lekki jiidi ɗe ɓiɗɗo an on addanimmi ɗen mi tolmiri on.» O waaliri ka makko nden ɲande.
17 Allaahu on jaabinani Layyatu, o ƴetti reedu, o jibinani Yaaquuba boobo gorko njowaɓo on. 18 Layyatu wi'i: «Allaahu on yoɓii lan sabu ko mi okki moodi an en oo korɗo an kon.» O inni mo *Yassaakara.
19 Layyatu ƴetti kadi reedu, o jibinani Yaaquuba boobo gorko njeegaɓo on. 20 Onsay Layyatu wi'i: «Allaahu on okkii lan dokkal moƴƴal. E ngal ɗoo non moodi an teddinay lan, ko fii mi jiidanike ɓe worɓe njeegoo.» O inni mo *Zabuluunu. 21 Ɓawto ɗun, o jibinoyi non boobo jiwo, o inni mo Diinatu.
22 Onsay Allaahu on yeƴƴitii non Raahiilu, o jaabinani mo, o newnani mo jiidagol. 23 Onsay o ƴetti reedu, o jibini boobo gorko. O wi'i: «Allaahu on ittanii lan kaa hersa an.» 24 O inni on boobo *Yuusufu, o wi'i: «Yo Joomiraaɗo on ɓeydanan boobo gorko kadi.»
Fii Wuro Yaaquuba ngon
25 Ɓay Raahiilu jibinii Yuusufu, Yaaquuba wi'i Labaanu: «Jooni non newnanee lan mi hoota ka leydi an, 26 accon mi naɓora rewɓe an e ɓiɓɓe an ɓe mi yanganii on fii mun ɓen, ɓay onon tigi hiɗon gelii yangi ki mi yanganii on kin.»
27 Onsay Labaanu wi'i mo: «Miɗo faalaa yo a sulfinanan wonaa ɗoo, ko fii mi taskike mi tawii ko sabu maa Joomiraaɗo on waɗiri barki e an. 28 Jooni non hottano lan njoddi maa ndi faalaɗaa ndin, mi jonnete.»
29 Yaaquuba wi'i mo: «Onon tigi hiɗon andi no mi yangorani on e ko honno wuro mon ngon kadi yeɲiri e juuɗe an, 30 ko fii ɗii seeɗaaji ɗi marnoɗon ado mi arde ɗoo ɓeydike fota jooni. Awa kadi ko gila mi hewti ka mon ɗoo Joomiraaɗo on waɗi barki e mon. Jooni non ko honde tuma min kadi mi yangantoo ɓeynguure an nden?»
31 Onsay Labaanu wi'i mo: «Hara ko honɗun mi jonnete?»
Yaaquuba jaabii: «Wota on jonnan hay huunde. Si tawii on waɗanii lan ko mi wi'oyta on kon, mi ornay fahin dammi mon ɗin, mi aynana on ɗi kadi. 32 Hande yo mi yahu ka wuro, mi suɓa, mi hikkindira kala dammi wonduɗi e toɓɓe e baade, e kala baalii lahii e hakkunde baali ɗin, e kala mbeewa wondumba e baade e toɓɓe e hakkunde be'i ɗin. Haray ko ɗinɗon wonata njoddi an ndin. 33 Nunɗal an ngal andoyto tuma seeniɗon tinugol ko gasata wonude njoddi an ndin kon. Kala ɗi tawoyɗon aldaa e baade maa toɓɓe e hakkunde be'i ɗin, e kala baalii ngii tawata wonaa lahii e hakkunde baali ɗin, haray wonanii lan nguyka.»
34 Labaanu wi'i: «Awa, yo woniran en no wi'irɗaa non.» 35 Nden ɲande tigi Labaanu hikkindiri kala ciikuliiji wonduɗi e ciifi e baade, e kala deyi wonduɗi e toɓɓe e baade, maa rawnitayɗi, e kala baali lahi e hakkunde baali ɗin, o watti ɗi e juuɗe ɓiɓɓe makko worɓe ɓen. 36 Ontuma o woɗɗitori Yaaquuba ka yaaretee balɗe tati. Onsay Yaaquuba lutti ɗon e aynugol dammi Labaanu hedditiiɗi ɗin.
37 Yaaquuba ƴetti calɗi kecci noone leɗɗe tati, o ciifi ɗi haa ko rawni kon yaltiti. 38 Ontuma o ƴetti ɗin calɗi ciifaaɗi, o waɗi ɗi ka nder kunnaaje yarirɗe yeeso ka dammi ɗin yarata ɗon nde hiɗi ara yarugol. Nde ɗi ari yarugol, hara hiɗi siwrani hubindirgol, 39 ɗi hubindira yeeso ɗin calɗi, ɗi rima ɓikkoy koy ciifi maa toɓɓe maa baade.
40 Yaaquuba pottina ɓikkoy koy feere, o fewtina dammi heddiiɗi ɗin hella dammi Labaanu waɗuɗi ciifi ɗin e ɓawlitayɗi ɗin. Ko non o heɓiri gure feereeje, o ɓannindiraali ɗi e dammi Labaanu ɗin. 41 Tuma woo nde dammi yeɗɗuɗi ɗin faalaa wondineede, Yaaquuba waɗayno ɗin calɗi ka nder kunnaaje yeeso ɗin dammi fii yo ɗi hubindir yeeso ɗin calɗi. 42 Si o tawii dammi ɗin no ɲooki, o waɗataa ɗin calɗi ka kunnaaje. Ko wano non, ɲookuɗi ɗin wontirani Labaanu, yeɗɗuɗi ɗin wontirani mo kanko Yaaquuba. 43 Ko e nder ɗun, jawle makko ɗen yaaji fota, o heɓi dammi ɗuuɗuɗi, e kurkaaduuɓe worɓe e rewɓe, o heɓi ngelooɗi e mbabbi kadi.