Fii Koɗu Yaaquuba ngun ka Labaanu
29
1 Yaaquuba nangiti ɗatal, o yaari ka leydi ɓee yimɓe funnaange. 2 O yi'i woyndu ka buruure, tawi gure tati dammi no waalii e binde mayru, tawi ko e ndun woyndu ɗi woowaa yarneede. Tawi omborde mayru on ko hayre njande. 3 Tuma gureele ɗen fow jaɲɲaa, hayre nden tallee, dammi ɗin yarnee, onsay nde wattee ka hoore woyndu.4 Yaaquuba wi'i ngaynaakooɓe ɓen: «Musiɓɓe, ko on ɓe honto?»
Ɓen jaabii: «Ko men ɓe Haraana.»
5 O wi'iti ɓe kadi: «Hara hiɗon andi Labaanu taaniraawo Naahuura on?»
Ɓe jaabii: «Meɗen andi mo.»
6 O wi'i ɓe kadi: «Hara himo e jam?»
Ɓe jaabitii: «Himo e jam! E hino ɗaa toode Raahiilu jiwo makko on ka hewtidata e dammi makko ɗin.»
7 Onsay Yaaquuba wi'i: «Jooni non siwaa niɓɓude, hewtaali taho ka gure ɗen jaɲɲetee. Yarnee dammi ɗin, yahon ornon ɗi.»
8 Ɓe jaabii: «Men waawataa waɗude ɗun ado gure ɗen fow jaɲɲeede, ko onsay men tallata hayre ombirde woyndu ndun, si men yarna dammi ɗin.»
9 Ko fewndo o yewtidata e maɓɓe, Raahiilu hewtidi e dammi ben mun ɗin ɓay kanko kadi ko o ngaynaako. 10 No Yaaquuba yi'irnoo Raahiilu, jiwo Labaanu bandiraawo yumma makko on, wondude e dammi Labaanu ɗin, o ɓattoyii kisan, o talli hayre ombirde woyndu ndun, o yarni dammi kaawu makko Labaanu ɗin. 11 Ontuma Yaaquuba lunnii Raahiilu, o wulli weltaare. 12 Yaaquuba andini Raahiilu ko o musiɗɗo ben makko, awa kadi ko o ɓiɗɗo Rifqatu. On jiwo dogi kisan, humpitoyi ɗun ben mun.
13 No Labaanu kadi nanirnoo ndun ardu Yaaquuba, on ɓiɗɗo bandan makko, o dogi kisan jaɓɓagol mo. Ɓay o tawtii mo, o hirbii mo, o lunnii, o naɓi mo ka galle makko, onsay Yaaquuba fillitanii kaawu mun Labaanu ko feƴƴi kon fow. 14 Ontuma Labaanu wi'i mo: «Pellet, ko en enɗan e ƴiiƴan gootan.» Onsay Yaaquuba wondi e makko lewru.
Fii no Yaaquuba Resiri Raahiilu e Layyatu
15 Onsay Labaanu wi'i Yaaquuba: «Hara ko fii ko a musiɗɗo an yangorantaa mi nii tun? Yeeto lan ko gaseteɗaa yoɓeede.»
16 Tawi Labaanu no mari jiwɓe ɗiɗo. Afo on no wi'ee Layyatu, toolaajo on no wi'ee Raahiilu. 17 Layyatu ko fota-ndarɗeejo, kono Raahiilu kaɲun ko labaaɗo, fota-ŋariijo.
18 Tawi Yaaquuba no yiɗi Raahiilu, o wi'i: «Mi kurkanto on duuɓi jeeɗiɗi fii yo on okkan Raahiilu toolaajo mon on.»
19 Labaanu wi'i: «Ndikkanammi okkugol ma mo edii okkugol mo goɗɗo goo. Wonu ka an ɗoo!» 20 Ontuma Yaaquuba kurkanii mo duuɓi jeeɗiɗi fii resugol Raahiilu, ɗun wa'ani mo wa balɗe seeɗaaje nii, hakkee ko o yiɗunoo mo.
21 Ɓay feƴƴii e ɗun, Yaaquuba wi'i Labaanu: «Wattidee lan non e ɓeyngu an ko fii ahadi men ndin timmii, mi faalaama wontidude e makko.»
22 Labaanu mooɓindiri yimɓe nokkuure nden fow, o waɗi caatal. 23 Ɓay jemmii, o ƴetti Layyatu jiwo makko on, o naɓani Yaaquuba, o yiidi e makko. 24 Labaanu jonni Layyatu korɗo mun no wi'ee Zilfatu ko kurkanoo mo. 25 Ɓay weetii Yaaquuba tawi ko Layyatu. O wi'i Labaanu: «E ko honɗun waɗuɗon mi? Wonaa fii Raahiilu mi yanganii on? Ko fii honɗun ɗaynanɗon mi?»
26 Labaanu wi'i: «Sifa ɗun waɗetaake ka amen, okkitirgol toolaajo on ado afo on. 27 Timmindin yontere nden e oo ɗoo, onsay men okkoyte oya kadi, fii ko yangoytoɗaa kon ka an ɗoo duuɓi jeeɗiɗi kadi.»
28 Yaaquuba waɗi ɗun, o lannintinodi yontere nden e Layyatu. Ontuma Labaanu okki mo non Raahiilu toolaajo mun on, on kadi woni ɓeyngu makko. 29 Labaanu jonni Raahiilu korɗo mun goo no wi'ee Bilhatu ko kurkanoo mo. 30 Yaaquuba watti Raahiilu e suudu, o yiɗi mo ɓuri Layyatu. O golliti ka Labaanu e nder duuɓi jeeɗiɗi kadi.
Fii Ɓiɓɓe Yaaquuba ɓen
31 Ɓay Joomiraaɗo on tawii Layyatu ko aɲaaɗo, o waɗi mo jiidotooɗo. Tawi Raahiilu kaɲun hinaa jiidotooɗo. 32 Layyatu ƴetti reedu, o jibini boobo gorko, o inni on boobo *Ruubaynu, ko fii o wi'uno: «Joomiraaɗo on yi'ii tampere an nden, jooni non moodi an yiɗay lan.»
33 O ƴetti reedu kadi, o jibini boobo gorko, o wi'i: «Joomiraaɗo on nanii wondema ko mi aɲaaɗo, o yeɗii lan oo ɗoo kadi.» Layyatu inni onɗon *Sim'uunu.
34 O ƴetti kadi reedu, o jibini boobo gorko. O wi'i: «E ngal ɗoo non, moodi an ɓannitay lan ko fii mi jiidanike mo ɓiɓɓe tato worɓe.» Ko ɗun waɗi si onɗon innaa *Lewi.
35 O ƴettiti fahin reedu, o jibini boobo gorko, o wi'i: «E ngal ɗoo non mi mantii Joomiraaɗo on.» Ko ɗun waɗi si o inni onɗon *Yahuuda. O acciti jiidagol fewndo ɗon.