28
1 Issaaqa noddi Yaaquuba, du'anii mo, o yamiri mo, o wi'i: «Wota a resu debbo Kanaaniyankeejo woo. 2 Immo, yahaa Fadaani-Araama, ka soro maa Batuu'iila, ƴettoyaa ton jiwo e hakkunde geɗalɓe kaawu maa Labaanu ɓen. 3 Yo Allaahu Jom Bawgal on waɗu barki e maa, o ɗuɗɗina jiidi maa ndin, o yaɲɲe yaɲɲudee, fii no wontiraa moftal jamaaji. 4 Yo Allaahu on yeɗide e jurriya maa on kii barki ki o yeɗunoo Ibraahiima fii yo a halor ndii leydi ndi wonɗaa koɗo e mun, ndin ndi Alla yeɗunoo Ibraahiima.» 5 Issaaqa immini Yaaquuba fii yahugol Fadaani-Araama, ka Labaanu ɓiɗɗo Batuu'iila Araamiyankeejo on, on ko bandiraawo Rifqatu, yumma Yaaquuba e Iisu.6 Ɓay Iisu ndaarii tawii Issaaqa du'anike Yaaquuba, o imminii mo Fadaani-Araama fii resoygol ton debbo, o ndaari kadi o tawi fewndo ko Issaaqa du'antonoo mo, o yamirno mo, o wi'i: «Wota a resu debbo Kanaaniyankeejo», 7 o tawi kadi Yaaquuba ɗoftike ben mun e yumma mun, o yahii Fadaani-Araama, 8 kanko Iisu o faamii kadi wonde ɓee jiwɓe Kanaaniyankeeɓe no metta ben makko Issaaqa, 9 ko ɗun waɗi si o yahi haa ka Ismaa'iila, o resoyi ton debbo no wi'ee Mahalatu, on ko bandiraawo Nabaayuuta, ɓiɗɗo Ismaa'iila mo Ibraahiima, o tawtini mo ɓeya rewɓe makko.
Fii Koyɗol Yaaquuba ngol
10 Yaaquuba iwi Birsabaa, o sutanii Haraana. 11 O hewti e nokkuure, o waali ɗon, ko fii hari naange ngen mutoyii. O ƴetti hayre e nden nokkuure ko o awloo, o waalii. 12 O hoyɗi ɓargal no darii ka leydi, juggoyii ka kammu. Malaa'ikaaɓe Alla ɓen no waɗa ɗon ƴawa tippoo.
13 Tawi Joomiraaɗo on no e hoore ngal ɓargal, o daali: «Ko min woni Joomiraaɗo on, on Alla maama maa Ibraahiima e Alla Issaaqa. Ko ndii leydi ndi waaliɗaa e mun mi yeɗete, an e jurriya maa on. 14 Jurriya maa on ɗuuɗiray wa mbullaari ndin ka leydi, a layiray nano e ɲaamo, hirnaange e funnaange. Awa kadi bolondaaji aduna on fow barkinte sabu maa, an e jurriya maa on. 15 Awa andu, min tigi miɗo wondi e maa, mi reenete kala ka yaaruɗaa, mi artire kadi e ndee nokkuure, ko fii mi selataa ma fannin mi hunnaali ko mi fodu-maa kon.»
16 Ontuma Yaaquuba fini e nder ngol koyɗol, o wi'i: «Pellet, Joomiraaɗo on no e ndee nokkuure, hari-le min mi andaano ɗun!» 17 O huli, o wi'i: «Eppa ndee nokkuure no hulɓinii nee, hinaa hay fus nii ko hinaa suudu Alla, ɗoo ko dambugal kammuuli ɗin nii!»
18 Yaaquuba immii bimbi law, o ƴetti nden hayre nde o awlinoo, o darni nde, o maandini, o hibbi nebban e hoore mayre. 19 O inni nden nokkuure Bayti'iila. (Kono hari nden saare ko Luuzu wi'etee.)
20 Yaaquuba woondani Allaahu on, o wi'i: «Si tawii Allaahu on no wondi e an, o reenii lan e ngol laawol ngol mi yahata e mun ɗoo, o neeminii lan, o okkii lan ko mi ɓornoo, 21 e si mi hewtitii ka galle ben an e jam, haray Joomiraaɗo on wonay Alla an. 22 Ndee nokkuure ka ndee hayre nde mi maandini, darii ɗoo, wonay suudu Alla. E hoore ɗun, mi okkay Alla sappaɓun e kala ko o okkimmi kon haa timma.»