Fii no Issaaqa Du'orani Yaaquuba
27
1 Hari Issaaqa nawyii fota, gite makko ɗen niɓɓitii haa o accii yi'ude. Ontuma o noddi Iisu, afo makko on, o wi'i mo: «Ɓiɗɗo an!»On nootii mo, o wi'i: «Naamu! E hino lan!»
2 Issaaqa wi'i: «Mi nawyii, mi andaa nde mi maayata. 3 Ƴettu non jooni jogaaji maa ɗin, ɗun ko laaɲal maa ngal e ndagaaje maa ɗen, yahaa ka buruure waaɲanoyaa mi mbaroodi. 4 Moƴƴinanaa mi neema welɗo, hara ko no mi faaliraa non, addanaa mi, mi ɲaama, fii yo mi du'ano-ma ado mi mayde.»
5 Tawi Rifqatu no heɗitinoo ɓe fewndo Issaaqa yewtaynoo ɗun Iisu ɓiɗɗo mun on. Iisu yahi ka buruure fii waaɲoygol addana ben mun teewu mbaroodi. 6 Ontuma Rifqatu wi'i Yaaquuba ɓiɗɗo mun on wonde: «Hey, mi nanii ben maa no wi'a kotoo maa Iisu: 7 ‹Addanan teewu mbaroodi, moƴƴinanaa mi neema welɗo, mi ɲaama, fii yo mi du'ano-ma yeeso Joomiraaɗo on ado mi mayde.› 8 Jooni non boobo an, heɗo ko mi hollay-maa kon, waɗaa ko mi yamiray-maa kon. 9 Yahu ka wuro, addanoyaa mi be'oy labaakoy ɗiɗoy, mi moƴƴinana ben maa en neema welɗo, wano welirta ɓe non. 10 Ƴettaa ɗun, naɓanaa ben maa en, ɓe ɲaama, fii yo ɓe du'ano-ma ado ɓe faataade.»
11 Onsay Yaaquuba jaabii yumma mun Rifqatu, o wi'i: «Awa, kono non kotoo an Iisu ko leeɓinɗo, min-le ko mi newɗuɗo. 12 No gasa ka ben an en mowloyammi, ɓe wi'a ko e jalugol ɓe mi woni, mi addana hoore an kuddi, mi faɗa du'aa!»
13 Neene makko wi'i mo: «Yo ndin kuddi ɗon rewtu e an, yo boobo an. An, heɗito lan tun, yahu addanaa mi be'oy koy.»
14 O yahi, o ƴettoyi koy, o addani yumma makko, on moƴƴini neema welɗo no welirta ben makko. 15 Ontuma Rifqatu ƴetti conci Iisu afo makko on ɓurɗi labeede ɗin, wonnooɗi e juuɗe makko ka suudu ɗin, o ɓorni ɗi Yaaquuba toolaajo makko on. 16 O suumiri juuɗe on ɗen e daande nden guri be'oy koy, ɗun ko ɗii nokkeeli ɗiɗi newɗuɗi. 17 Onsay o ƴetti neema welɗo on e bireedi mo o moƴƴinnoo on, o jonni Yaaquuba ɓiɗɗo makko on.
18 On yahi, tawi ben mun, o noddi mo, o wi'i: «Baaba en!»
Issaaqa nootii mo, wi'i: «Naamu, e hino lan! Ko hombo e ɓiɓɓe an ɓen nii?»
19 Yaaquuba wi'i ben mun: «Ko min Iisu, afo mon on nii! Mi waɗii ko wi'uɗon mi kon. Ɓaŋee, mi torike on, tooloɗon, nafoɗon teewu mbaroodi an ndin fii yo on du'ano lan.»
20 Issaaqa wi'i ɓiɗɗo mun on: «Eppa, a yaawii heɓoyde ɗun nee, ɓiɗɗo an!»
Yaaquuba jaabii: «Ko ɓay Alla Joomiraaɗo mon on hawrindinii lan e mun.»
21 Issaaqa wi'i Yaaquuba: «Awa, ɓado lan mi mowle, yo ɓiɗɗo an, mi anda si tawii ko an Iisu nii maa si hinaa.» 22 Yaaquuba ɓattii ben mun Issaaqa, o mowli mo, o wi'i: «Hawa kan ko hawa Yaaquuba, kono juuɗe ɗen ko juuɗe Iisu.» 23 Kono o anditaali mo ɓay juuɗe makko ɗen no leeɓiniri wa kotoo makko Iisu, o du'anii mo. 24 O wi'i mo: «Hara ko an tigi woni Iisu ɓiɗɗo an on?»
O jaabii: «Ko min nii.»
25 Issaaqa wi'i: «Ɓannanan mi ɲaama oo teewu mbaroodi, yo ɓiɗɗo an, fii yo mi du'ano-ma.»
Yaaquuba ɓannani ben mun Issaaqa, o ɲaami, o addani mo kadi njaram, o yari. 26 Ontuma Issaaqa ben makko wi'i mo: «Ɓado lan, lunnoɗaa mi, yo ɓiɗɗo an.»
27 O ɓadii, o lunnii mo, Issaaqa anditi barngol oya ngol e conci ɗin. Ontuma o du'anii mo, o wi'i: «Ka haqiiqa, ngol barngol oo ɓiɗɗo an no wa'i wa urngol ngesa mba Joomiraaɗo on waɗi barki e mun. 28 Yo Allaahu on okke caawa kammu ngun e nguureeji leydi ndin, wondude e nenɗe e njaramji kesi haa ɗuuɗa. 29 Yo jamaaji ɗofto ma, yo leƴƴi jiccano ma. Yo a wonu hooreejo musiɓɓe maa ɓen, yo neene-gootooɓe maa ɓen fow jiccano ma. Kala huɗuɗo ma yo wonu huɗaaɗo, kala du'aniiɗo ma yo wonu du'anaaɗo.»
30 Fewndo Issaaqa gayni du'anaade Yaaquuba, ko Yaaquuba yaltata ka ben mun Issaaqa, tun Iisu iwti ka waaɲo. 31 Kanko kadi o moƴƴini neema welɗo, o naɓani ben makko. O wi'i ben makko: «Baaba en, awa, ɓaŋee nafoɗon teewu mbaroodi ɓiɗɗo mon on fii yo on du'ano lan.»
32 Issaaqa ben makko wi'i mo: «Ko an hombo nii?»
O jaabii: «Ko min Iisu, ɓiɗɗo mon afo on.»
33 Issaaqa diwni diwnol tiiɗungol fota, o wi'i: «Ko hombo-le yahi waaɲoyi addanimmi teewu mbaroodi, mi ɲaami fow ado a arude, mi du'anii mo? Pellet o wonay barkinaaɗo.»
34 Ɓay Iisu nanii konguɗi ben mun ɗin, o sonki sonko tiiɗungo, mettungo fota, o wi'i ben makko: «Du'anee lan min kadi, yo baaba en!»
35 Issaaqa jaabii: «Miɲan maa ardii ƴoyre, o jattii du'aa maa on.»
36 Iisu wi'i: «E hara ko fii ko *Yaaquuba o innetee waɗi si o ɗaynirimmi nii ɗii laabiiji ɗiɗii non? O ƴettiino lan afoyaagal ngal, jooni kadi e hino o jattii du'aa an on.» O wi'i kadi: «Hara on maranaa lan du'aa goo?»
37 Onsay Issaaqa jaabii Iisu, wi'i: «E hino jooni mi waɗii mo hooreejo maa, mi waɗii siɓɓe makko ɓen fow kurkantooɓe mo, mi neeminirii mo nenɗe e njaramji kesi. Ko honɗun non mi waawi waɗande ma jooni, yo ɓiɗɗo an?»
38 Iisu wi'i ben mun: «Hara ko du'aa gooto pet marɗon, baaba en? Du'anee lan min kadi yo baaben!» Onsay Iisu nangi e fesugol towna.
39 Ben makko Issaaqa jaabii mo, wi'i: «Galle maa ɗen woɗɗitoto nguureeji leydi ndin e caawa kammu ngun. 40 Ko kaafa maa kan wurnete, a kurkanto miɲan maa. Kono e nder ko wembotoɗaa kon, a kolmbitoyay kolombowal makko ngal ka daande maa.»
Fii no Yaaquuba Dogiri Labaanu
41 Iisu marani Yaaquuba ngayngu sabu du'aa mo ben maɓɓe du'aninoo mo on. Iisu wi'i ka ɓernde mun: «Ɲande sowru mayde ben an sowti woo, mi waray miɲan an Yaaquuba.»
42 Onsay Rifqatu humpitii konguɗi Iisu afo makko on, o noddi Yaaquuba toolaajo makko on, o wi'i mo: «Awa, kotoo maa Iisu no faala-maa yottorde warugol ma. 43 Jooni non heɗo lan, yo boobo an. Immo dogaa, yahaa Haraana ka kotoo an Labaanu, 44 wonoyaa ka maɓɓe taho haa tikkere kotoo maa nden rippoo. 45 Nde seytaane makko iwoyi e hoore maa woo, o yejjiti ko waɗuɗaa mo kon, mi imminoyay ko artiroye. Hara ko fii honɗun fuutorton mi on ɗiɗoo non ɲande wootere?»
46 Rifqatu wi'i Issaaqa kadi: «Ngurndan an ɗan mettitii lan sabu ɓee jiwɓe Hissiyankeeɓe. Si Yaaquuba kadi resii Hissiyankeejo, wa'uɗo wa ɓee jiwɓe ɗoo, haray ko fii honɗun mi wuuranta hande kadi?»